Ok Ngaihgiz 12 - Gij Baujcingq Moq Caeuq Geij Bonj Gij Baujcingq Daeuzdaeuz

Ciet Bienqgoqbae

¹ Yehhozvaz youq Ngaihgiz doiq Mohsih caeuq Yaqlwnz naeuz:

² “Ij aeu ndwen neix ma guh binaengz dih daixit ndwen.

³ Faenhsou ij raengq sojmiz dih gij vunz Hijswzlez, ndwen neix cojcib, moix it hoh dih cawjranz cungj ij vih aen gya bonjfaenh genj aeu duz yiengzlwg he, it hoh it duz.

⁴ Hauhnaeuz hoh he vunz daiq noix, gw mbouj ndaej duz yiengzlwg he liux nex, hoh mwnq couh ij caeuq gekleiz de doxgaep aeu duz yiengzlwg he, caemh ij ciuq miz geijlai vunz, gak vunz gw ndaej geijlai ma faen.

⁵ “Faenhsou cwnjbiq yiengzlwg hax, ij daj ndaw menzyiengz aeu haj cixnaeuz daj ndaw yiengzbya ndaw de aeu cungj ndaej. Aeu duz ndei ndwtndwt giencangq he, bi he dih yiengzlwg daeg,

⁶ aeu ma diuh hwj daengz ndwen neix cibseiq hauh haemh de raixra. Sojmiz dih Hijswzlez vunz cungj ij dawz doengh duz yiengzlwg genj okdaeuj mwnq gaj bae.

⁷ Gaj le, couh aeu gij lwed de ma hoz haeuj bakdoumonz hih begdou hah, goemqdou hah bae. Youq ranzlawz gw, couh hoz ranzlawz.

⁸ Ngwnz mwnq gyoengqde ij aeu feiz ma hangq yiengzlwg gw, caemh caeuq mij fat goq hih bingj hah, byaek haemz hah, doxcaeuq gw.

⁹ Mbouj ndaej gw nohyiengz ndip, engq mbouj ndaej aeu raemx ma cawj hwj gw; ij baenx duz mbouj buq dungx hwj hangq gw.

¹⁰ Mbouj ndaej lw daengz ngoenz daixngeih daihcaeux; hauhnaeuz lw daengz ngoenz daixngeih daihcaeux nex, ij aeu feiz ma vueng bae.

¹¹ Faenhsou gw noh yiengzlwg hih mwhde, ij cug diuz sairwet gaenj hwj, caemh ij daenj haiz ndei hwj, ndaw fawz caemhcaiq dawz faexdwngx ndei hwj guh ndei cwnjbiq, caemh ij vaiqdi vaiqdi gw cij ndaej. Gij neix dwg Yehhozvaz dih aen ciet Bienqgoqbae.

¹² “Aenvih ngwnz mwnq gou ij bae lieb cenz Ngaihgiz, dawz Ngaihgiz sojmiz dih lwgdaeuz, mboujguenj vunz haj cixnaeuz doengh duz cukseng, cungj ij gajrai liux bae. Gou dwg Yehhozvaz; gou yienghneix guh, couh ndaej cingqmingz gyoengqde dih cwnz mij'z yungh, mbouj ndaej baujhuq gyoengqde.

¹³ Gij lwed gwnz begdou couh dwg geiqhauh faenhsou soj youq dih ranz. Gou baex raen lwed couh bienq goq faenhsou bae; gou gaj gij lwgdaeuz Ngaihgiz mwhde, mbouj ngaiz haih daengz faenhsou law.

¹⁴ “Faenhsou ijaeu geiqniemh ngoenz neix, vih Yehhozvaz souj aen ciet neix, yungjyenj dingh roengzma. Faenhsou seiqseiq daihdaih cungj ij souj aen ciet neix.”

¹⁵ Yehhozvaz vanzlij caiq naeuz: “Youq ndaw caet ngoenz neix, faenhsou mbouj ndaej gw gij fat goq dih bingj. Ngoenz daixdaeuz, faenhsou dawz ndaw ranz sojmiz dih yauqmuj gveng deuz liux bae. Youq ndaw caet ngoenz ndaw de, hauhnaeuz miz vunz gw gij bingj fat goq he, couh ij ngaiz daj ndaw minzcuz Hijswzlez boenq okbae, mbouj suenq aen minzcuz Hijswzlez dih vunz.

¹⁶ Daixit ngoenz caeuq daixcaet ngoenz, faenhsou ij doxcomz hwj baiq gou. Ndaw song ngoenz neix, caenhgag cawzok ndaej cwnjbiq gij gw he, sojmiz dih hong cungj mbouj ndaej guh.

¹⁷ “Faenhsou ij souj aen ciet Cawz Yauqmuj neix; aenvih gou dwg youq aen ciet neix hih ngoenz daixdaeuz he daiq gyoengq vunz Hijswzlez ok Ngaihgiz ma, sojhij faenhsou ijaeu souj ngoenz neix, dingh ngoenz neix ma guh seiqseiq daihdaih yungjyenj dih gveihdingq.

¹⁸ Dajlwh ndwen daixdaeuz cibseiq hauh haemh de, itcig daengz ngeihcib it hauh haemh de, faenhsou ij gw bingj nex, caenhgag ndaej gw gij mij fat goq dih bingj.

¹⁹ Youq caet ngoenz ndaw de, gak vunz ndaw ranz bonjfaenh mboujcwnj miz yauqmuj; famz youq ndaw caet ngoenz neix gw fat goq dih doxgaiq, mboujlwnh bouxlawz, lingh aen minzcuz dih vunz cix ndaej, aen minzcuz bonjfaenh cix ndaej, cungj ij ngaiz daj mwnq dieg Hijswzlez vunz boenq okbae.

²⁰ Youq mwnq faenhsou youq hih mwnq, miz fat goq dih doxgaiq, faenhsou cungj mbouj ndaej gw.”

Daixit aen ciet Bienqgoqbae

²¹ Yiengq, Mohsih couh heuh gij vunz Hijswzlez gangj vah couh baenz he daeuj, doiq gyoengqde naeuz: “Faenhsou ij naeuz gij vunz ni, hawj moix it hoh cungj ij genj aeu duz yiengzlwg he, aeu ma gaj hwj goq aen ciet Bienqgoqbae.

²² Gaj le, couh aeu gaem nywjvaiz he, aeu ma yomx haeuj ndaw buenz lwed yiengz bae le, couh hoz haeuj bakdoumonz hih goemqdou caeuq song mbiengj begdou bae. Itcig daengz ngoenz daixngeih daihcaeux, faenhsou bouxlawz caemh mbouj ndaej ok bakdou bonjfaenh,

²³ aenvih Yehhozvaz ij lieb cenz Ngaihgiz, ij gaj gij lwgdaeuz Ngaihgiz; de lieb raen bakdou bouxlawz gwnz goemqdou caeuq song mbiengj begdou hoz miz lwed hih, couh bienq goq bae, mbouj hawj bouxcai de haeuj ndaw ranz mwnq bae gaj gij lwgdaeuz faenhsou.

²⁴ “Gij neix faenhsou caeuq doengh daih gajlaeng faenhsou cungj ij yungjyenj soenhsouj.

²⁵ Baezneix, faenhsou bae daengz Yehhozvaz baujcingq soengq hawj faenhsou dih mwnq dieg mwnq nex, caemh ij soenhsouj, caemh ij ciuq yienghneix guh.

²⁶ Hauhnaeuz heij lwg faenhsou cam naeuz: ‘Yienghneix guh dwg gijmaz iqswh nex?’

²⁷ faenhsou couh han naeuz: ‘Gij neix couh dwg soengq hawj Yehhozvaz dih ciet Bienqgoqbae guh dajbwiz he. Aenvih mwh gij vunz Hijswzlez youq Ngaihgiz mwhmwnq, de gaj gij lwgdaeuz Ngaihgiz, hoeng, de bienq goq aen ranz gij vunz Hijswzlez, mbouj gaj gij vunz Hijswzlez raeuz, nyiuz gyoengqraeuz.’” Gij vunz Hijswzlez dingq le, couh gvih roengzma sax Yehhozvaz.

²⁸ Yiengq, gyoengqde caemh ciuq Yehhozvaz raengq Mohsih caeuq Yaqlwnz dih yienghmwnq bae guh lo.

Gaj lwgdaeuz

²⁹ Daengz gyangjngwnz, Yehhozvaz dawz Ngaihgiz sojmiz dih lwgdaeuz cungj gajrai liux; mboujguenj lwg goengjvuengz haj cixnaeuz lwg boux youq ndaw lauz hih vunzfamh, sojmiz dih lwgdaeuz caeuq doengh duz cukseng dih lwgdaeuz cungj ngaiz gaj liux,

³⁰ guh hwj ngwnz mwnq goengjvuengz caeuq gyoengq gaen henz ndang de hah, gyoengq hoiq de hah, gyoengq beksingq de hah cungj singj hwj hwnq liux. Baenx cenz guek Ngaihgiz cungj cenznaengz sing daej vunzrai; mij saek ranz naeuz mij vunz rai.

^31-32 Ngwnz mwnq, goengjvuengz heuh Mohsih caeuq Yaqlwnz bae, doiq gyoengqde naeuz: “Vaiq bae bax! Faenhsou caeuq doenghheij vunz Hijswzlez, [32a]daiqlienz doenghheij yiengzyiengz cwzcwz faenhsou cungj [31b]vaiqdi daj ndaw guek gou ok maj, ciuq faenhsou gangj hih yienghmwnq bae baiq Yehhozvaz bax! [32b]Caemh cingj faenhsou gouz Yehhozvaz hoh fuk hawj gou bax.”

³³ Gajlaeng, gij vunz Ngaihgiz caenhrox ci, caenhrox ci gij vunz Hijswzlez, ci gyoengqde vaiqdi daj ndaw guek gyoengqde ok ma. Gyoengqde naeuz: “Faenhsou caiq mbouj vaiqdi ok maj nex, gyoengqraeuz cungj ij ngaiz rai liux bae.”

³⁴ Yiengq gij vunz Hijswzlez couh dawz ngauq mienh mijyaengz fat goq he coux haeuj ndaw buenz gaenx mienh bae, caemh aeu buh ma duk hwj, couh gwed hwnj gwnz hongzmbaq bae.

³⁵ Gyoengqde caemh ciuq Mohsih raengq hih yienghmwnq bae guh, laeng gij vunz Ngaihgiz aeu gim hah, ngaenz hah, buh hah.

³⁶ Yehhozvaz sawj gij vunz Ngaihgiz yawjhwnj gij vunz Hijswzlez; gij vunz Hijswzlez heuh gyoengqde aeu gijmaz, gyoengqde couh hawj gijmaz. Couh yienghneix, gij vunz Hijswzlez couh dangq ndaej dajlaeng gyoengqde dued aeu gij saizcanj gyoengqde lo.

Gij vunz Hijswzlez ok Ngaihgiz

³⁷ Gajlaeng gij vunz Hijswzlez couh dajlwh Lanzswz byaij bae Suhgoz. Cawzok vunzbaz caeuq lwgngez, caenhgag vunzsai daihgaiq miz roekcib fanh vunz.

³⁸ Caemh miz lingh aen minzcuz hih vunz, caeuq yiengzyiengz cwzcwz cungj caemh caeuq gyoengqde bae.

³⁹ Aenvih gyoengqde dajlwh Ngaihgiz ngaiz boenq okma daiq gaenjgib lai, mbouj ndaej cwnjbiq gijmaz doxgaiq gw, caenhgag miz daj Ngaihgiz daiq okma hih mij fat goq hih ngauq mbamienh gaenx ndei ndaej aeu ma hangq hah, cik hah hwj gw yw iek sat lo.

⁴⁰ Gij vunz Hijswzlez youq Ngaihgiz youq baenx seiqbak samcib bi.

⁴¹ Ngamqngamq muenx seiqbak samcib bi dih ngoenz mwnq, Yehhozvaz daiq sojmiz hih Hijswzlez minzcuz daj Ngaihgiz okma.

⁴² Youq ngwnz mwnq, cungj dwg Yehhozvaz hen gyoengqde baenxngwnz, dwg de dajlwh Ngaihgiz daiq gyoengqde okma dih ngwnz, sojhij gij vunz Hijswzlez seiqseiq daihdaih cungj ij geiqniemh ngwnz neix.

Ciet Bienqgoqbae dih gveihdingq

⁴³ Yehhozvaz doiq Mohsih caeuq Yaqlwnz naeuz: “Ciet Bienqgoqbae dih gveihdingq dwg yienghneix: Lingh aen minzcuz dih vunz cungj mboujcwnj gw ciet Bienqgoqbae dih yiengzlwg.

⁴⁴ Hoeng, gij vunz yungh ngaenz cawx ma hih hoiq, caemh youq gwnz ndang de gozlij goq dih vunz ndaej gw.

⁴⁵ Camqciz doz youq mwnq dieg mwnq dih vunz, caeuq daj vaihdieg goq daeuj guh hong hih vunz caemh mbouj ndaej gw.

⁴⁶ “Gw hih mwhde, ij youq ndaw ranz gw; mbouj ndaej dawz ok rog bae. Gij ndok duz yiengzlwg, it diuz ndok cungj mbouj ndaej dwg raek.

⁴⁷ “Sojmiz dih Hijswzlez vunz cungj ij souj aen ciet neix.

⁴⁸ Hauhnaeuz miz boux lingh aen minzcuz hih vunz he youq mwnq faenhsou mwnq youq, caemh nyienh'eiq souj Yehhozvaz dih aen ciet Bienqgoqbae, yiengq, ndaw ranz de sojmiz dih vunzsai cungj ij gozlij, gajlaeng cij ndaej luj gij vunz Hijswzlez ityiengh souj ciet Bienqgoqbae. Mbouj gozlij dih vunz cungj mbouj ndaej gw ciet Bienqgoqbae dih yiengzlwg.

⁴⁹ Mboujguenj Hijswzlez vunz haj cixnaeuz lingh aen minzcuz doz youq he dih vunz, cungj ij soenhsouj gij gveihdingq neix.”

⁵⁰ Gajlaeng sojmiz dih Hijswzlez vunz cungj ciuq Yehhozvaz raengq Mohsih caeuq Yaqlwnz hih yienghmwnq bae guh.

⁵¹ Yehhozvaz yienghneix raengq sat le, couh youq ngoenz neix, de couh ciuq baenx aen cuz baenx aen cuz hwj dajlwh Ngaihgiz daiq gyoengqde okma.