Lizsij dih Gaihcij 44 - Gij Baujcingq Moq Caeuq Geij Bonj Gij Baujcingq Daeuzdaeuz

Yozswz yungh geiqmaeuz louz Benqyajminj

¹ Gajlaeng, Yozswz raengq boux guenjgya de naeuz: “Mwngz dawz doenghheij daeh gyoengqde cwnqliengq coux rim bae; duz lawz gyoengqde doz ndaej geijlai couh coux geijlai. Caemhcaiq dawz gak vunz dih ngaenz coengq haeuj gak vunz hih daeh bae,

² caiq dawz aen cenj ngaenz coux laeuj gou coengq youq boux ceiq oiq he ndaw daeh de bae, caeuq gij ngaenz doxcaeuq coengq.” Yiengq boux guenjgya caemh ciuq gij vah Yozswz bae guh lo.

³ Daengz haet daixngeih ranz baex rongh he, Yozswz couh hawj gyoengq beixnuengx de daiq doengh daeh haeux duq doengh duz lawz gyoengqde ok singz maj lo.

⁴ Hoeng ngamqngamq ok singz mbouj geijlai gyae, Yozswz couh doiq boux guenjgya de naeuz: “Mwngz majcangq bae boenq gyoengq vunz mwnq. Boenq dawz le, couh saemjcam gyoengqde naeuz: ‘Bouxcawj gou doiq faenhsou baenxlai ndei; faenhsou mbouj boixaen sat lo, hoeng, dauqfanj boixhaemz.

⁵ Aen cenj neix mbouj dwg aen cenj bouxcawj gou haz? Aen cenj neix dwg de aeu ma gw laeuj he, caemh dwg aeu ma yaep bazgvaq he. Faenhsou yienghneix guh gaeuq sieb hoh!’”

⁶ Gajlaeng boux guenjgya boenq dawz gyoengqde le, couh ciuq Yozswz raengq hih gij vah mwnq bae naeuz gyoengqde.

⁷ Gyoengqde han naeuz: “Goengjau, mwngz gangj gij vah neix dauqdaej dwg gijmaz iqswh nex? Gyoengqraeuz coengzlaiz mij guh cungj saeh neix goq!

⁸ Mwngz caemh rox gyoengqraeuz, mbat gaxgonq youq ndaw daeh raeuz raen dih doenghgij ngaenz mwnq, mbat neix vanzlij cenmonz dajlwh Gyahnamz daiq daeuj boiz hawj faenhsou; gyoengqraeuz baeq caeg aeu gij gimngaenz bouxcawj mwngz hwj?

⁹ Goengjau, hauhnaeuz mwngz raen gyoengqraeuz ndaw neix bouxlawz yo miz aen cenj mwnq nex, couh dawz bouxlawz gajrai; gyoengqraeuz lij lw hih vunz nyienh'eiq hawj mwngz guh hoiq.”

¹⁰ Boux guenjgya couh han naeuz: “Ndaej hah, faenhsou yienghneix gangj caemh miz dauhleix leuz, hoeng gou caenhgag youq laeng bouxlawz cimh ndaej raen aen cenj, couh gag hawj bouxlawz guh bouxhoiq gou lah; lij lw hih vunz mij miz coih law.”

Benqyajminj ngaiz gaeb

¹¹ Gajlaeng gyoengqde cungj vaiqdi dajlwh gwnz gumq duz lawz dawz doengh daeh roengzma, nyungjnyungj nyatnyat vaiqdi vaiqdi gej bak daeh.

¹² Yiengq boux guenjgya couh dajlwh boux daeggo daeuz gyenjcaz roengzma daengz boux ceiq iq he Benqyajminj. Gajlaeng engq youq ndaw daeh Benqyajminj raen aen cenj he,

¹³ guh hwj gyoengq beixnuengx de cungj siengsim hwj gag mbek gij buh bonjfaenh vaih liux, caiq doiqyungz dawz doengh daeh haeux doz hwnj gwnz gumq duz lawz bae, gaen goeng guenjgya maj daengz ndaw singz.

¹⁴ Youzdaq caeuq gij beixnuengx de bae daengz ndaw ranz Yozswz; Yozswz vanzlij youq ranz. Gyoengqde couh youq dangqnaj de gvih roengzma sax de.

¹⁵ Gajlaeng Yozswz doiq gyoengqde naeuz: “Faenhsou gingqyienz guh ok cungj saeh neix! Nanzdauh faenhsou mbouj rox, luj gou yienghneix dih vunz, baenzbaenz cungj rox yaep bazgvaq maz?”

¹⁶ Yiengq Youzdaq han naeuz: “Daengz mwhneix, raeuz doiq bouxcawj raeuz miz maz vah gangj laem, caemh mij vah ndaej gangj lo. Vunz caeuq doxgaiq cungj youq dineix; nanzdauh raeuz lij gag hemq vuengj maz? Cangqdiq gaenq caz ok bouxhoiq mwngz dih coih lo! Seizneix raeuz caeuq boux youq laeng de cimh ndaej aen cenj mwnq cungj dwg bouxhoiq mwngz.”

¹⁷ Yozswz dingq le, han naeuz: “Mbouj hah, gou mbouj dwg gij iqswh neix! Gou caenhgag aeu boux youq laeng de cimh ndaej raen aen cenj mwnq ma caeuq gou guh hoiq lah. Lij lw hih vunz cungj ndaej bingzbingz an'an maj cimh daxboh faenhsou.”

Youzdaq bang Benqyajminj gouzcingz

¹⁸ Gajlaeng, Youzdaq couh byaij bae dep Yozswz, gouz Yozswz naeuz: “Bouxcawj hax, cingj mwngz hawj gou gangj conz vah he naeuz mwngz ni. Giqyienz mwngz dang hung dang ak ndaej luj goengjvuengz lo, gouz mwngz gaejyungh doiq gou fatheiq.

¹⁹ “Mbat gaxgonq mwngz cam goq gyoengqraeuz naeuz: ‘Faenhsou dwg mbouj dwg vanzlij miz daxboh caeuq miz goengjlungz nuengxau?’

²⁰ Gajlaeng gyoengqraeuz han naeuz: ‘Raeuz vanzlij miz daxboh nienzgeij laux he caeuq miz daegnuengx nienzgeij lij iq laem. Daegnuengx iq neix dwg daxboh nienz laux le cij seng miz he. Daeggo caeuq de doxdaep saejndw he gaenq rai lo; meh seng de lij caenhgag miz de laem lo, sojhij daxboh dwzbez ndiep de.’

²¹ “Bouxcawj hax, mwngz raengq raeuz hawj raeuz daiq de daeuj hawj mwngz caenra raen de.

²² Raeuz caemh naeuz mwngz ni goq, laeq lwgngez neix mbouj ndaej liz boh de; hauhnaeuz de mbouj youq lo, boh de gaengjdingq ngaiz rai.

²³ Hoeng, mwngz caenhrox naeuz: ‘Hauhnaeuz faenhsou mbouj daiq daegnuengx iq daeuj nex, couh mboujcwnj caiq daeuj raen gou.’

²⁴ “Gyoengqraeuz maj daengz daxboh raeuz, couh dawz gij vah mwngz gangj naeuz de ni.

²⁵ Gajlaeng, daxboh caiq hawj gyoengqraeuz dauq daeuj cawx di haeux he.

²⁶ Yiengq, gyoengqraeuz naeuz: ‘Hauhnaeuz daegnuengx iq caeuq gyoengqraeuz bae nex, gyoengqraeuz couh bae; daegnuengx iq mbouj bae, raeuz caemh mbouj ndaej caiq raen boux vunz mwnq.’

²⁷ Daxboh raeuz doiq gyoengqraeuz naeuz: ‘Faenhsou rox hah, Lahgyez caenhgag seng hawj gou song daeglwg sat lo.

²⁸ Miz daeg he gaenq mij youq lo, daengz seizneix gauqcaez cungj mij raen de lo, aiq ngaiz duz nyaen sik soiq liux lo.

²⁹ Seizneix faenhsou caiq ij daiq daeg neix bae; hauhnaeuz de youq dangjroen ngaiz miz maz saeh nex, yiengq caemhdangq faenhsou hawj gou vunz laux rai ra mbouj laep lo!’

³⁰ “Bouxcawj hax, gij mingh daxboh raeuz caeuq gij mingh laeq lwgngez neix riengh youq itheij he. Yiengq, hauhnaeuz seizneix laeq nuengx neix mbouj caeuq raeuz itheij maj daengz daxboh raeuz mwnq nex,

³¹ daxboh raeuz yawj mbouj raen laeq nuengx neix nex, de gaengjdingq mij mingh lo. Yiengq couh dwg naeuz raeuz bonjfaenh gag hawj boh bonjfaenh laux le rai ra mbouj laep lo!

³² “Aenvih gou yiengq daxboh baujcingq goq laeq nuengx neix bingzan, naeuz: ‘Hauhnaeuz gou mbouj ndaej daiq daegnuengx neix ma hawj mwngz nex, gou nyienh'eiq baenx seiqvunz rap coih,’

^33-34 yiengq seizneix laeq nuengx neix mbouj ndaej gaen gou maj, gou mij naj maj raen daxboh, hawj de souh daengz yienghneix nanh. [33]Sojhij, bouxcawj hax, gou seizneix gouz mwngz hawj gou louz roengzma, dingj laeq nuengx iq neix hawj mwngz guh hoiq, hawj laeq nuengx neix gaen doengh daeggo de maj.”