Hijfuzsoj Saw 2 - Gij Baujcingq Moq Caeuq Geij Bonj Gij Baujcingq Daeuzdaeuz

Caeuq Gihduz itheij dauqlix

¹ Doenghbaez faenhsou dwg rai hih, aenvih faenhsou famh coih, mbouj dingq gij vah Cangqdiq.

² Mwhde, faenhsou dwg gaen gij vunz aen seiqgyaiq neix guh saeh hih, dwg dingq aen seiqgyaiq neix gaem gienz dang daeuz dih fangzvuengz hih, couh dwg seizneix yungx doenghheij vunz mbouj dingq gij vah Cangqdiq hih Sajdanq lo.

³ Gizsaed gyoengqraeuz doenghbaez bouxboux cungj dwg caeuq gyoengqde doxdoengz, ciuq aen ndangnoh bonjfaenh siengjmuengh, siengj guh gijmaz couh guh gijmaz. Sojhij gyoengqraeuz caeuq gizdah vunz mij maz faenbied, baenjsingq cungj dwg doegsieb he, cungj dwg ij ngaiz souh daengz Cangqdiq fad.

⁴ Hoeng, hojsik vunz dih Cangqdiq, de baenxlai aiq gyoengqraeuz,

⁵ daiqlienz youq mwh gyoengqraeuz famh coih suenq dwg vunzrai hih mwhde, de cungj hawj gyoengqraeuz caeuq Yehsuh Gihduz itheij dauqlix—faenhsou ndaej gouq dwg aenvih de haijliengh.

⁶ De gaenq hawj gyoengqraeuz caeuq Gihduz itheij dauqlix, itheij naengh youq gwnzmbwn, itheij ndaej gaem gienz.

⁷ De yienghneix guh dwg siengj hawj gyoengqraeuz seiqseiq daihdaih cungj rox de dunghgoq Yehsuh Gihduz hwj doiq gyoengqraeuz baenxlai haijliengh, baenxlai aiq.

⁸ Faenhsou ndaej gouq dwg vih Cangqdiq dih haijliengh hwj faenhsou sinq de cij ndaej gouq; mbouj dwg faenhsou gag ndaej law, dauq dwg Cangqdiq begbeg nyok hawj hih lah;

⁹ caemh mbouj dwg vih faenhsou soj guh hih, yienghneix faenhsou couh mbouj ndaej gag haenh bonjfaenh lo.

¹⁰ Hoeng, gyoengqraeuz dwg Cangqdiq dwzbez saeqsim cauh okdaeuj he; de dunghgoq Yehsuh Gihduz daeuj hawj gyoengqraeuz ndaej miz mingh, muzdiz dwg ij hawj gyoengqraeuz guh gij ndeisaeh de senqsi cix giqvaq ndei he.

Baengh Gihduz ndaej doxhuz

¹¹ Sojhij faenhsou wnggai ndaejgeiq, faenhsou seng okdaeuj couh mbouj dwg Youzdaiq vunz. (Doenghbaez doenghheij gag naeuz bonjfaenh gaenq gozlij hih Youzdaiq vunz, gyoengqde yawj faenhsou dangq dwg mij gozlij goq hih vunz; gizsaed doenghheij Youzdaiq vunz gozlij goq he cijmboujgoq dwg vunz aeu fawz ma gozlij hih lah, gaenhbaenj mbouj ndaej hawj boux de guh daengz hab'eiq habhoz Cangqdiq.)

¹² Mwhmwnq faenhsou caeuq Gihduz mij gvanhaeh, caemh mbouj ndaej gaep haeuj gij vunz Hijswzlez, doiq Cangqdiq dih gij baujcingq lienz diuzgyenq mwnq caemh mij rox saek di, mbouj miz Cangqdiq mbouj rox Cangqdiq, caenhgag rox goq mij'z muengh dih saenghhoz lah.

¹³ Mwhmwnq faenhsou caeuq gij vunz Cangqdiq mij maz gvanhaeh, hoeng, seizneix faenhsou dauq ndaej baengh Gihduz riuz lwed hwj ndaej gaep haeuj gij vunz de,

¹⁴ aenvih Yehsuh Gihduz couh dwg hawj gyoengqraeuz ndaej hozbingz he. De vih ij cek fuk ciengz hawj vunz doxhaemzcaeuz mwnq hwj hawj gij vunz Youzdaiq caeuq lingh aen minzcuz hih vunz ndaej doxhuz,

¹⁵ de couh aeu rai ma cawz Mohsih dih fazliz gveihdingq. De yienghneix guh dwg ij hawj Youzdaiq vunz caeuq daixlingh aen minzcuz hih vunz ndaej youq ndaw lwgra Cangqdiq bienqbaenz cungj vunz he, caemh ndaej doxhuz.

¹⁶ De dunghgoq ding rai youq gwnz gyaq cixcib hwj ndaej hawj song mbiengj doxhaemzcaeuz hih ndaej bienqbaenz buek vunz he, ndaej luj aen ndang he, ndaej caeuq Cangqdiq doxhuz.

¹⁷ De daeuj cenz gij ndei siuhsiz hawj faenhsou doenghheij linghvaih minzcuz mbouj rox Cangqdiq he ndaej hozbingz, caemh hawj gyoengqraeuz doenghheij rox Cangqdiq hih Hijswzlez vunz ndaej hozbingz.

¹⁸ Vih de hwj seizneix gyoengqraeuz baenjlaiz song cungj mbouj doengz hih vunz cungj ndaej dunghgoq doengz boux Hoenzsaenz he hwj ndaej caeuq Cangqdiq Bohmbwn miz gvanhaeh.

¹⁹ Yiengq, ciuq yienghneix ma yawj, faenhsou couh mbouj caiq dwg linghvaih minzcuz hih vunz caeuq dwg bouxhek haem lo, dauq dwg caeuq gij vunz Cangqdiq caemh aen guek he, dwg caeuq Cangqdiq caemh ranz vunz he.

²⁰ Ranz neix cijyauq dwg hij dwzbaijyienz caeuq boux boux cenz gij vah Cangqdiq ma guh giek, hij Yehsuh Gihduz bonjfaenh de ma guh gangqloz;

²¹ baenx aen ranz cungj dwg baengh de cij ndaej doxlienz hwnjdaeuj, cij ndaej menhmenh hwnq hwnjdaeuj guhbaenz aen ranz Cangqdiq he.

²² Faenhsou linghvaih minzcuz hih vunz caemh dwg aen ranz neix hih faenh he, couh dwg Hoenzsaenz Cangqdiq youq he.