Hihbwzlaiz Saw 3 - Gij Baujcingq Moq Caeuq Geij Bonj Gij Baujcingq Daeuzdaeuz

Yehsuh beij Mohsih veijdaq

¹ Sojhij, caeuq gyoengqraeuz doxdoengz cungj dwg Cangqdiq senj hawj hwnj gwnzmbwn bae hih gak boux beixnuengx hax, faenhsou wnggai ngeixngeix Yehsuh, boux gyoengqraeuz nginh hih dwzbaijyienz caeuq goengjsae dajbwiz daeuzdaeuz neix bax.

² De dwg boux Cangqdiq dinghlaeb caemh dwg sinq ndaej goq he, caemh dwg luj Mohsih yienghmwnq Cangqdiq doiq de guenjleix gij vunz de yienghmwnq sinq ndaej goq he.

³ Hoeng, de beij Mohsih vanzlij ndaej najrongh ndaej lai, cingq luj boux guh hwnq ranz he beij aen ranz mwnq vanzlij dij.

⁴ Caiq gyacangq sojmiz hih ranz cungj dwg miz boux hwnq he, hoeng, sojmiz hih cingq dwg Cangqdiq cauh okdaeuj he.

⁵ Mohsih dwg bouxhoiq ndaw ranz Cangqdiq, dwg lauxsaed sinq ndaej goq he; de dwg yienh ok baezneix ij gangj he.

⁶ Hoeng, Gihduz dwg daeglwg Cangqdiq, dwg guenjleix Cangqdiq cenz ranz sojmiz hih. Yiengq, hauhnaeuz gyoengqraeuz baujciz mbouj lau, gyenhciz sinq gyoengqraeuz soj muengh hih nginhnaeuz dwg najrongh hih nex, gyoengqraeuz couh dwg ndaw ranz Cangqdiq hih vunz lo.

Mbouj sinq hih vunz couh ngaiz satsoq

⁷ Sojhij cingq luj Hoenzsaenz Cangqdiq naeuz: Seizneix hauhnaeuz faenhsou dingqri daengz gij sing Cangqdiq nex,

⁸ faenhsou couh mbouj ndaej simgyeng nga'ngangq, mbouj ndaej luj doenghbaez gij vunz Hijswzlez youq rogndoi yienghmwnq sawq Cangqdiq yex Cangqdiq ndatheiq,

⁹ aenvih mwhde gij cojgoeng faenhsou youq rogndoi youq seiqcib bi ndaw de, gannaeuz yawjraen Cangqdiq soj guh hih lah, hoeng, dauq mbouj sinq Cangqdiq, dauq sawq de, gaujniemq de.

¹⁰ Couh vih yienghneix, Cangqdiq cij doiq aen nienzdaiq mwhde hih vunz ndatheiq hwj naeuz: “Aen sim gyoengqde siengzseiz mazmwnh, gingqyienz mbouj rox aen sim gou.”

¹¹ Sojhij Cangqdiq couh ndatheiq hwj fazsiq naeuz: “Gyoengqde gaengjdingq mbouj ndaej miz faenh yangjcouq gij yietbaeg gou.”

¹² Gak boux beixnuengx hax, faenhsou ijaeu siujsim, mienxndaej faenhsou ndaw de miz vunz mbouj sinq, sim doegsieb hwj couh yiem seiqseiz lix dih Cangqdiq mbouj gaen seiqseiz lix dih Cangqdiq.

¹³ Cijaeu vanzlij miz ngoenz he, faenhsou couh ijaeu ngoenzngoenz doxson doxbang, yienghneix couh mienxndaej faenhsou miz vunz souh daengz coih coemx hwj sim bienq gyeng.

¹⁴ Caemh cijaeu hauhnaeuz gyoengqraeuz cungj ndaej gyenhciz luj gaxgonq ngamq sinq yienghmwnq sinq Gihduz hih sim gyenhdingq, yungjyenj mbouj bienq, gyoengqraeuz couh ndaej caeuq Gihduz guxdoih.

¹⁵ Sojhij, daixgya ijaeu ndaejgeiq, mbouj ndaej lumz ndaw Singqgingh ndaw de soj sij naeuz hih: Seizneix hauhnaeuz faenhsou dingqri gij sing Cangqdiq hih, couh mbouj ndaej simgyeng, nga'ngangq, mbouj ndaej luj gaxgonq yienghmwnq yex Cangqdiq fatheiq.

¹⁶ Faenhsou wnggai rox, mbouj dingq gij vah Cangqdiq, yex de fatheiq hih dwg byawz nej? Mbouj dwg doenghheij Mohsih daj Ngaihgiz daiq okma hih vunz maz?

¹⁷ Caemh dwg byawz hawj Cangqdiq fatheiq seiqcib bi baenxlai caez nej? Mbouj dwg doenghheij famh coih hwj ngaiz seihaiz baij youq rogndoi hih vunz maz?

¹⁸ Cangqdiq caiq doiq byawz fazsiq goq naeuz gyoengqde mbouj ndaej yangjcouq gij yietbaeg de nej? Mbouj dwg doenghheij nga'ngangq mbouj dingq Cangqdiq hih vunz maz?

¹⁹ Yiengq, ciuq yienghneix ma yawj, gyoengqde mbouj ndaej yangjcouq gij yietbaeg Cangqdiq hih dwg aenvih gyoengqde mbouj sinq Cangqdiq.