Gihduz Hawj Vunz Rox 6 - Gij Baujcingq Moq Caeuq Geij Bonj Gij Baujcingq Daeuzdaeuz

Hoi gij lab fung gienj saw

¹ Gajlaeng gou yawjraen duz yiengzlwg mwnq mbek caet mwnq lab fung gienj saw mwnq hih daixit mwnq hih mwhde, gou dingqri seiq duz doenghduz mwnq hih duz he gij sing de luj byajraez nwih naeuz: “Daeuj!”

² Gajlaeng gou couh yawjraen miz duz max bieg he; boux gwih youq gwnz gumq duz de dawz naqgung hwj. Boux de ciep aeu aen dang vuengz cij ndaej daenj hih aen gyokraeuj mwnq le, couh bae doxhoenx lo. De dwg hingz le caiq ndaej hingz.

³ De mbek daengz daixngeih mwnq lab fung hih mwhde, gou caiq dingqri daixngeih duz naeuz: “Daeuj!”

⁴ Gajlaeng gou couh yawjraen miz duz max hoengz he; boux gwih duz de mwnq ndaej ndaek fag giemq hung he, ndaej miz gienz ndaej hawj lajmbwn fatseng hoenxciengq, ndaej hawj vunz doxgaj.

⁵ De mbek daengz daixsam mwnq lab fung hih mwhde, gou dingqri daixsam duz naeuz: “Daeuj!” Gajlaeng gou couh yawjraen miz duz max ndaem he; boux gwih duz de ndaw fawz de dawz miz aen denhbingz he.

⁶ Gajlaeng gou caiq dingqri youq ndaw seiq duz mwnq lujnaeuz miz sing naeuz: “Ngoenz he dih ngaenzhong cijngamq ndaej cawx it cingh hih mienh'iq; ngoenz he dih ngaenzhong cijngamq ndaej cawx sam cingh hih mienhhung. Youz caeuq laeuj mbouj ndaej luenh sai.”

⁷ De mbek daengz daixseiq mwnq lab fung hih mwhde, gou dingqri daixseiq duz naeuz: “Daeuj!”

⁸ Gajlaeng, gou couh yawjraen miz duz max mong he; boux gwih duz de mwnq gij coh de heuh ‘Rai,’ gaen youq gajlaeng de hih couh dwg ‘Ndawlaep.’ Gyoengqde miz gienz ndaej aeu giemq aeu iekvangh aeu binghraq caeuq aeu duz nyaen yak ma byaeu gij vunz lajmbwn dih seiq faenh cih it.

⁹ De mbek daengz daixhaj mwnq lab fung hih mwhde, gou yawjraen laj aen luz dajbwiz miz doenghheij vunz vih cenzgangj gij vah Cangqdiq caeuq vih gij saedsaeh Cangqdiq guh cingqyinz hwj ngaiz gaj hih doenghgij vunz mwnq hih hoenzsaenz,

¹⁰ hemq goggog naeuz: “Veijdaq dih caenhgag mwngz cij dwg caencwnz dih Cangqdiq hax, ij daengj daengz seizlaw mwngz cij saemjbuenq doenghgij vunz gaj raeuz he, hawj gyoengqde bauqwngq dawz nej?”

¹¹ Gyoengqde yienghneix hemq naeuz le, gajlaeng gijgij hoenzsaenz cungj ndaej diuz buhbauz bieg he. Gajlaeng, caiq miz sing doiq doenghheij hoenzsaenz mwnq naeuz, hawj gyoengqde caiq daengjdaengj, daengj daengz doenghheij caeuq gyoengqde doxdoengz swqhaeuh Cangqdiq dih doenghheij beixbeix nuengxnuengx caemh ij ngaiz gaj he daeuj caeuq gyoengqde ndaej gaeuq soq le cij ndaej.

¹² De mbek daengz daixroek mwnq lab fung hih mwhde, gou raen deih doengh youqgaenj raixcaix, gyangjngoenz cix laep saengxsaengx liux, laep hwj ndaem luj boiq ndaem bae, aen ndwen bienq hoengz luj lwed nwih,

¹³ ndaundeiq gwnzmbwn doek byoegbyoeg roengzbae luj go mak uzvahgoj gij mak mijyaengz sug he ngaiz rumz hung ci hwj doek yienghmwnq.

¹⁴ Aen mbwn luj gienj saw ngaiz gienj hwnjdaeuj yienghmwnq mij raen haem lo; bya'bya ndoindoi haijdauj haijdauj cungj daj mwnq yienzlaiz he nod deuz lo.

¹⁵ Lajmbwn sojmiz hih vuengz hah, daqcwnz hah, canghgywnh hah, vunz fouq hah, miz gienz miz ciq hih hah, caeuq sojmiz hih hoiq caeuq swqyouz hih vunz hah cungj ndoj haeuj ndaw gamj ndaw rin bae liux.

¹⁶ Gyoengqde vanzlij gouz bya, gouz rin naeuz: “Laemx roengz gwnz ndang raeuz daeuj bax! Dawz gyoengqraeuz yo hwnjdaeuj, hawj raeuz ndaej ndoj goq boux naengh youq aen lungzeij mwnq caeuq duz yiengzlwg mwnq dih aeuqheiq bax!

¹⁷ Aenvih mwh gyoengqde aeuqheiq hih daengz lo; miz byawz ndwn ndaej gaenj nej?”