Geiq Luqdwz 2 - Gij Baujcingq Moq Caeuq Geij Bonj Gij Baujcingq Daeuzdaeuz

Luqdwz roeb Boh'ahswh

¹ Ndaw ranz goeng gojyez Nazngozmij, Hijliqmijlwz, ndaw cuz de miz boux beixnuengx doengzdangz haemq caen he, gij coh de heuh Boh'ahswh. Boh'ahswh dwg boux gangj vah vunz couh dingq he, caiq dwg boux vunz fouq he.

² Miz ngoenz he, lwgsau vaihguek Luqdwz cam meh gyaboz de naeuz: “Gou ijsiengj bae reih mienh nyaeb mienh doek, saekseiz dauq roeb ndaej saek boux simndei, dauq hawj gou youq ndaw reih de nyaeb mienh doek, ndaej lwi?” Meh gyaboz de han naeuz: “Ox, ndaej hah, lwg hax; bae bax.”

³ Yiengq Luqdwz bae daengz ndaw reih le, de couh siengj gaenhangx gyoengq vunz gvej mienh cug mienh mwnq nyaeb mienh doek. Hoeng ngamqngamq luj letlet dingjlingz gaiq reih mienh mwnq dwg gaiq reih Hijliqmijlwz cuz dih Boh'ahswh.

⁴ Mbouj geij caez, Boh'ahswh dajlwh Bwzliqhaengz Singz ma daengz ndaw reih. De dongx gyoengq hoiq gvej mienh mwnq naeuz: “Yehhozvaz caeuq sou doxcaeuq youq!” Gyoengqde han naeuz: “Muengh Yehhozvaz soengq fuk hawj mwngz!”

⁵ Couh youq mwhneix, Boh'ahswh sawqmwh myaeg yawjraen miz dihdah he ndwn youq henz reih de. De raen le, couh cam boux hoiqdaeuz de, cam naeuz: “Dah mwnq dwg dah lwgsau byawz lah?”

⁶ Boux de han naeuz: “Dwg lwgsau Mohyaz, dajlwh Mohyaz gaenhangx Nazngozmij ma he.

⁷ De haetneix daihcaeux couh daeuj lo; de gouz gou naeuz ndaej mbouj ndaej hawj de gaenhangx gyoengq vunz gvej mienh mwnq nyaeb mienh doek. Dajlwh haetneix daeuj daengz seizneix, caenhgag cawzok bae ndaw diengz naengh yaep he sat lo, cungj mij deuz goq.”

⁸ Boh'ahswh dingq le, couh goq bae doiq Luqdwz naeuz: “Lwg hax, gou naeuz mwngz ni, mwngz youq ndaw reih gou nyaeb mienh doek ndaej lo. Gaejyungh bae daixlingh mwnq nyaeb lo, cenmonz youq dineix ndaej lo, caeuq gij hoiq vunzbaz gou youq ndaej lo.

⁹ Gyoengqde bae daengz mwnqlaw gvej, mwngz caemh gaen bae daengz mwnqlaw. Gou menhcij raengq gyoengq hoiq vunzsai hauxseng mwnq, mboujcwnj gyoengqde hangz mwngz. Gyoengq hoiq gou caemh coux miz geij gang raemx; hauhnaeuz mwngz hozhawq nex, seizbienh bae daek gw.”

¹⁰ Luqdwz dingq de yienghneix naeuz le, couh majcangq gvih roengzma sax de, naeuz: “Liuh mbouj daengz daemxmwngz cuqhiq daengz gou, guh hwj gou doeksaet bae. Gou dwg vunz vaihguek he, hoeng daemxmwngz doiq gou ndaej baenxlai ndei!”

¹¹ Boh'ahswh han naeuz: “Gou senqsi cix dingqri naeuz mwngz dajlwh goeng mwngz rai le, mwngz cungj doiq gyaboz mwngz baenxlai ndei, vwt bohmeh bonjfaenh, vwt diegseng bonjfaenh, gaen gyaboz daeuj daengz dieg cix seng, vunz cix seng neix.

¹² Mwngz doiq vunz baenxlai ndei, muengh Hijswzlez dih cwnz Yehhozvaz doiq mwngz engqgya ndei lai geij boix, caemh muengh de luj duz gaeqmeh yienghmwnq aj gij fwed de okdaeuj hawj mwngz ndoj haeuj laj de bae ndaej baujhuq.”

¹³ Luqdwz dingq le, caiq naeuz: “Bouxcawj gou hax, docih mwngz lo! Mwngz doiq gou baenxlai ndei; yienznaeuz gou daiqlienz guh gij hoiq mwngz cungj mbouj boiqndaej lah, hoeng, mwngz lij gangj gij vah ndei neix ma vued gou.”

¹⁴ Gajlaeng daengz gw haeuxringz hih mwhde, Boh'ahswh heuh Luqdwz goq daeuj naeuz: “Cimzcimz gij menqbauh raeuz yawj; aeu ciengq ma demj gw bax!” Couh yienghneix, Luqdwz couh caeuq gyoengq hoiq mwnq itheij naengh roengzma gw. Boh'ahswh caiq aeu mienh ceuj hawj de gw, hawj de gw imq hwj vanzlij lw.

¹⁵ Yiengq gw haeux sat le, Luqdwz couh majcangq bae nyaeb mienh doek lo. Boh'ahswh caiq raengq gyoengq hoiq de naeuz: “Cungjsuenq naeuz de caiq bae ndaw dong mienh nyaeb aeu, sou cungj mbouj ndaej naeuz de,

¹⁶ mbouj danhcij yienghneix, faenhsou vanzlij yot gij mienh okdaeuj coengq youq lajdoem hwj ajcaih de nyaeb ndaej haemq vaiq. Faenhsou ijaeu ndaejgeiq, mboujcwnj haep de haqx.”

¹⁷ Luqdwz couh yienghneix caiq lienzdaemh bae nyaeb mienh doek, itcig nyaeb daengz yiengqhaemh. Gajlaeng de dawz ngoenz mwnq soj nyaeb ndaej dih mienh ma daj, daj ndaej baenx loz, ceng mbouj geij miz samcib gaen yienghneix.

¹⁸ Daj ndei le, de couh dawz loz mienh neix caeuq haeuxringz de gw lij lw he aeu maj daengz ndaw singz hawj meh gyaboz de.

¹⁹ Yiengq Nazngozmij raen mehbawx de nyaeb ndaej baenx lai mienh le, couh cam de naeuz: “Mwngz ngoenzneix bae mwnqlaw nyaeb mienh lah? Yaeb ndaej baenxlai lai, muengh boux bang mwngz mwnq ndaej miz fuk!” Luqdwz dingq le, couh naeuz meh gyaboz de ni, naeuz: “Ngoenzneix gou bae gaiq reih mienh Boh'ahswh nyaeb mienh.”

²⁰ Nazngozmij dingq le, naeuz: “Ox! Muengh Yehhozvaz soengq fuk hawj de! Yehhozvaz doiq ndaw ranz raeuz baenxlai ndei; mboujguenj boux rai boux lix, de cungj dwg yungjyenj aiq.” De vanzlij caiq naeuz: “Boh'ahswh dwg ndaw cuz raeuz dih boux beixnuengx caemh nginz caemh rag he; de miz swzyimq goqhoh raeuz!”

²¹ Luqdwz dingq meh gyaboz de yienghneix naeuz le, caiq naeuz: “De vanzlij naeuz gou, hawj gou gaenhangx gyoengq hoiq de nyaeb mienh, itcig nyaeb daengz gvej sat.”

²² Gajlaeng Nazngozmij han naeuz: “Ox lwg hax, yienghneix cingq baenz luh. Mwngz couh youq ndaw reih Boh'ahswh gaen gyoengq hoiq vunzbaz de bax. Hauhnaeuz mwngz bae gij reih daixlingh boux nyaeb, caemh lau ngaiz vunz hangz hah.”

²³ Couh yienghneix, Luqdwz itcig gaenhangx gyoengq hoiq vunzbaz mwnq nyaeb mienh, nyaeb daengz gvej mienh sat. Luqdwz caemh vanzlij caeuq meh gyaboz de itheij youq.