Feihliqmaenz Saw 1 - Gij Baujcingq Moq Caeuq Geij Bonj Gij Baujcingq Daeuzdaeuz

¹ Gou dwg Baujloz, dwg vih Yehsuh Gihduz hwj ngaiz gyaeng hih, dwg caeuq boux beixnuengx raeuz Dizmohdaiq sij saenq hawj faenhsou hih. Cinhngaiq dih caeuq raeuz itheij guh hong dih Feihliqmaenz beixnuengx, mwngz ndei!

² Youq ndaw ranz mwngz doxcomz dih gyauqveiq, faenhsou ndei! Yaqfeihyaq dahnuengx caeuq caeuq raeuz itheij swqhaeuh Yehsuh luj boux bing yienghmwnq mbouj lau rai dih Yaqgihbuq, faenhsou ndei!

³ Muengh Cangqdiq daxboh raeuz caeuq Yehsuh Gihduz bouxcawj raeuz doiq faenhsou haijliengh, hawj faenhsou bingzan!

Haenh Feihliqmaenz

⁴ Feihliqmaenz, gou siengzseiz haenh Cangqdiq gouz Cangqdiq hih mwhde cungj daez daengz mwngz, siengzseiz vih mwngz hwj docih raeuz dih Cangqdiq,

⁵ aenvih gou dingq naeuz mwngz doiq bouxcawj raeuz Yehsuh miz sinqsim, caeuq doiq sojmiz gvi haeuj Cangqdiq dih vunz cungj miz aiqsim.

⁶ Gou muengh mwngz rox daengz Cangqdiq dunghgoq Yehsuh Gihduz hwj nyok hawj mwngz baenxlai ndei le, hawj mwngz caeuq doenghheij sinq Yehsuh hih vunz doxcomz engqgya ndaej raen miz ndeisaeh.

⁷ Feihliqmaenz beixnuengx hax, gij vunz gvi haeuj Cangqdiq he cungj vih mwngz dih aiqsim hwj roxnginh angq raixcaix; gou caemh vih mwngz dih aiq hwj angq ij rai, caeuq ndaej daengz haujlai dih gujliq.

Baujloz bang Ahnizsihmaeuz gouzcingz

⁸ Youq dineix, gannaeuz gou dwg Gihduz dih boux dwzbaijyienz miz gienz ndaej mingqlingq hawj mwngz guh doenghgij wnggai guh hih saeh lah,

⁹ hoeng, vih aiq hwj gou, Baujloz, seizneix hij boux vunz laux he caeuq boux vih Yehsuh Gihduz hwj ngaiz gyaeng he ma cingj mwngz guh saeh.

¹⁰ Couh dwg vih Ahnizsihmaeuz bouxhoiq mwngz hwj gouz mwngz, aenvih youq gou ngaiz gyaeng hih mwhneix, gou daiq de hawj de sinq bouxcawj raeuz Yehsuh; gou caeuq de caemh luj bohlwg ityiengh.

¹¹ De doenghbaez doiq mwngz mij maz ik, hoeng, seizneix doiq mwngz doiq gou cungj miz ik.

¹² Gou seizneix dauq hawj de maj laeng mwngz mwnq. De bae aen sim gou caemh gaen de bae lo; de dwg gou gig haenj gig aiq he.

¹³ Baenjlaiz gou siengj hawj de youq henz ndang gou, hawj de youq gou seizneix vih cenzgangj Cangqdiq dih ndei siuhsiz hwj ngaiz gyaeng hih mwhneix ndaej dingj mwngz swqhaeuh gou hih,

¹⁴ hoeng, gou mbouj siengj mijyaengz rox gij cawjeiq mwngz couh yienghneix guh; gou muengh mwngz soj bang gou hih cungj dwg nyienh'eiq he, mbouj dwg hozgaed he.

¹⁵ Ahnizsihmaeuz gaxgonq dajlaeng mwngz mwnq deuz bae mbouj gaen mwngz, saekseiz aiq dwg Cangqdiq dih cawjeiq, hawj de camqciz mbouj gaen mwngz lah, vih ij hawj mwngz baezneix ciep de bae, ndaej seiqseiz gaen mwngz he,

¹⁶ hawj de mbouj danhcij dwg bouxhoiq he, vanzlij dwg boux beij bouxhoiq vanzlij giengz he dih boux beixnuengx dij he. De doiq gou ma gangj dwg boux dijbauj he; doiq mwngz ma gangj engqgya dwg yienghneix, doiq doxdoengz dwg gvi haeuj Cangqdiq he ma gangj engqgya dwg yienghneix lo.

¹⁷ Sojhij, hauhnaeuz mwngz yawj gou dangq boux doengzdoih he nex, couh cingj mwngz ciep de dangq ciep gou yienghmwnq.

¹⁸ Hauhnaeuz de guh gijmaz hawj mwngz siedbonj goq cixnaeuz yiemq mwngz gijmaz goq nex, couh cingj mwngz laih haeuj laeng gou daeuj bax.

¹⁹ Gou, Baujloz, doiq gawq neix, dwg cinhswq gaem bit sij hawj mwngz he; mbouj lau naeuz gou laih law, gou gaengjdingq boiz mwngz hih, daiqlienz mwngz yiemq gou hih couh dwg diuz mingh mwngz gou cungj suenq lo. Gizsaed, mboujyungh gou naeuz mwngz; mwngz cungj gag rox.

²⁰ Feihliqmaenz beixnuengx hax, gou muengh mwngz aeunaj bouxcawj raeuz hwj bang gou, ciepsou Ahnizsihmaeuz, yienghmwnq hawj gou ndaej sim'angq.

²¹ Gou sinq mwngz gaengjdingq ciuq gou gangj hih yienghneix bae guh, simqciq cauhgoq gou soj raengq mwngz hih; sojhij, gou cij sij saenq hawj mwngz.

²² Vanzlij miz yiengh haem; gou ij cingj mwngz bang gou, bang gou cwnjbiq funghranz he hawj gou, aenvih gou muengh Cangqdiq dapwngq faenhsou gouz de, hawj gou ndaej bae faenhsou mwnq.

Hoh fuk

²³ Couh sij daengz dineix lo. Vih Yehsuh Gihduz hwj caeuq gou ngaiz gyaeng hih Hijbahfuz cam mwngz ndei.

²⁴ Caeuq gou itheij doxcaeuq guh hong hih Majgoj, Yaqlijdazguj, Dijmaj, Luqgyah caemh cam mwngz ndei.

²⁵ Muengh bouxcawj raeuz Yehsuh Gihduz doiq faenhsou haijliengh!