Roma 10 - Allah Wene Hurumbik Keron

¹ Ari halug, nomini-o. It Israel ap an nungguluahon epmano inili wawag ulug nahmu iseheg, eke inake Allah obam sembahyang eheg suruk ahi-o.

² Eke it inebe At Allah ebe heaharukon oke, inapeleg-at wilil suruk ulug it farim wene du yig hisaruk ahi-o.

³ Eke At Allahen alem dahon ninobam werehon epmano elehep nisahalug At ninim dambuk ninabukon etno inapeleg wilil, inonggarehen-at inim dambuluhuken ulug suruk-o. Eke ariroho suruk ari, At Allahen ninim dambuk ninabukon etno apma seberoho welam inambit-o.

⁴ Eke At Kristusen bilin wene duroho suruk amuk eke duroho suruk am fug ulug ebahon etno ilitoho sebag etno fam, it yi aphe di aphe At obam ebetuk isalug, At Allahen alem dahon inobam werehon epmano elegsoho imbisalug At inim dambultuk-o.

At Allahen it yi aphe di aphe obog-at inili wiog ulug suruk-o ulug yig isebahon wene 10:5-21

⁵ Eke wene duroho suruk amuk eke duroho suruk am fug ulug ebahon etno fam At Allah inim dambulukon etno at Musaen wene holal umburuk wilil, “Ap misihen wene duroho suruk amuk eke duroho suruk am fug ulug ebahon ilitoho suruk halug, alem etno fam iluk mondog welaruhu-o,” ulug ebahon oke, at obam ebetuk etno fam At Allah inim dambulukon etno wene holal umburuk wilil,

⁶ “Hit hinindi famen at sa hag boholma lahaku-o? ulug uruk am fug-o,” ulug ariroho ebag ari, it apheyen At Kristus ebe boholmen walug ambik wam nowen ulug ebag-o.

⁷ Eke alem misig du wene holal umburuk wilil, “Hit hinindi famen at sa hag kwean apma ambuhu ulug uruk am fug-o,” ulug ariroho ebag ari, it apheyen At Kristus ebe it warehon wereg ambeg epmanowen walug lahik wam nowen ulug ebag-o.

⁸ Eke ari halug, alem At Allah inim dambulukon etno fam uruk wilil, “Allah wene etno hit hinambeg horogsoho wilil, hinindimu inim, hinambilik fam inim wereg-o,” ulug uruk ari niren At Allah obam ebetuk amuk ulug yig hisaruk aheon etno farim-at uruk-o.

⁹ Eke hiren hinambilik famen uruk wilil, “Nit Ninowe ari At Yesus at-o eheg, eke hinindi famen At Kristus etno Allahen it aphe warehon wereg ambeg epmanowen iluksoho minduhupfebag-o,” ulug hinindi ebereheg suruk hisalug, hinili wahu-o.

¹⁰ Eke ninindimuen demat ulug ebetuk aheon ari, At Allahen alem dahon etno elehep nisahukag ulug ebetuk ahe-o. Eke ninune fam demat ulug uruk aheon ari ninili wawag ulug-at uruk ahe-o.

¹¹ Eke Alkitab wene holal baleg etno famen yig nisaruk wilil, “It yi aphe di aphe At obam ebetuk isalug, inenggali hahup fug-o,”

¹² ulug nit obog-at yig nisaruk ari, dahan fahan ninombisahalug yig nisaruk eleg-o. It Yahudi ap inim, it Allah wene bilin inapeleg welatuson epmano inim ilitoho-at yig nisaruk wilil, At Allah ebe it obog-at Ninikni wereg-o. Eke nit obohen At obam kino yig ituk nisalug, ahien anggolo-at ninobam umbuhu-o,

¹³ ulug alem ari fam Alkitab wene holal baleg etnowen yig nisaruk wilil, “It aphe obog At Ninowe etno obam yig ituk isalug, inili wahu-o,” ulug yig nisaruk-o.

¹⁴ Eke ari fam, At obam ebetuk eleg wilil, keroho yig ituk amuhup-o? Eke At awene etno inesanggo holtuk eleg wilil, keroho obam ebetuk amuhup-o? Eke At awene etno yig isaruk eleg halug, keroho inesanggo holtuk amuhup-o?

¹⁵ Eke it wene yig isil nuruk amag ulug mondep isaruk eleg halug, wene etno keroho yig isil nuruk amuhup-o? Eke ari halug, Alkitab etnowen yig nisaruk wilil, “It wene fano wene yig isil wamon etno inahientoho wereg-o,” ulug yig nisaruk-o.

¹⁶ Eke wene fano wene etno yig isil laruk oke, it ninen wene fanowon etno eberoko warusa fug ari fam, at Yesayaen uruk wilil, “Nowe-o, wene yig isarukukon etno at sen hag eberoko warisi-o?” ulug ebag-o.

¹⁷ Eke ari fam, wene inesanggo holtukon etno fam, demat ulug eberoko waruk amuhup-o. Eke Kristus awene fanowon yig isaruk etno fam inesanggo holtuk amuhup-o.

¹⁸ Eke ari fam, anden “It aphe epmano inesanggo holtusa fug ano?” ulug hinog waruk nealug, “Eleg-o, inesanggo holtusa at-o,” ulug yig nimuhup-o. Eke alem ari fam Alkitab etnowen yig nisaruk wilil, “It inune epmano o ahik ya da su atisi-o. Eke iren urukon epmano o kweanma obog su atisi-o,” ulug yig nisarukon ari,

¹⁹ nesanggo holtikikseg misihim inim dahagsoho hinog waruk wilil, “It Israel aphe hag inapeleg welatusa ano?” ulug hinog waruk nealug, at Musaen bilin wene ebahon etno fam yig isaruk wilil, “It aphe nin bilin Allah udaki neken welatusa fuhon epmano oke, kidia Allah udaki atusa ari, nit ninakeleg-at welamim sirisi-o, ulug uruk amag ulug ariroho suhuk-o.

²⁰ Ariroho suruk aruhukmu, it aphe nin urunanggeroho welatuson inobabut fam hit hinasine hahup-o,” ulug ebahon etno wereg heheg, eke at Yesaya etnowen fobik indi ahlahiroho neken yig isaruk wilil, “It bilin heag nabuog ulug surusa fuhon epmano oke, fobik arat heag naptusa-o. Eke heag nabil larusa fuhon oke, it inil fam selegma atikik-o,”

²¹ ulug Allah wene ariroho yig isaruk apareg, eke fobik it Israel aphe inawene etno yig isaruk wilil, “It aphe epmano inesanggo holtuk eleg wilil, wene onggo yig nitukon etno oke iniknien neken nintul nantul-at hambog inabiog ulug suruk atikik-o,” ulug yig isebag.