Markus 14 - Allah Wene Hurumbik Keron

At Yesus wabuog ulug inahla bebahon wene 14:1-2

¹ Eke fobik it Yahudi aben o hari Paskah fam roti su atuk elehon etno o hao hag nahuk ulug inahla bebag. Inahla buruk apareg weregma, it ap Allah unde suon epmano inim, it wene baleg unde epmano inimen At Yesus etno keroho herako senebuhukseg wabuhuk-o ulug inahla bebag.

² Inahla buruk wilil, “Esoho esebuog ulug it aphe anggolo waharusareg fam du ninusuk nowen, o hari Paskah fam dia senebuhuk fug-o,” ulug wene balfag.

Ambusu amben fanowon etno At Yesus obam delepfebahon wene 14:3-9

³ Ariroho wene baltuk apagma, At Yesus etno o Betania at Simon ahap honanggorohon ibam etno welapag. Epmano wilil orom naruk weregma, at hwe misihen ambusu amben fanowon onggo anggolo fam hundutukon etno sohorluk fam honanggoko walug kebag. Kuruk apareg, sohorluk etno saplit husoko ambusu etno Yesus ungguluagma delepfebag.

⁴ Delepfuruk apagma, it ap nin epmano inasineyen uruk wilil, “Ambusu fanowon etno naloko nulug delepfehek-o?

⁵ Ambusu etno fam uang anggen tiga ratus onggo baloko it ap inaharek elehon epmano og iselepmen fano-o,” ulug hwe etno abug baltuk apareg, winimug yig epag.

⁶ Winimug yig ituk apagma, At Yesus etnowen yig isaruk wilil, “Ariroho uruk imbisiek-o. Hit keroho ulug hwe du indi dahapsuruk ahep-o? An nobam fano amag ulug sehek-o,” ulug yig isebag.

⁷ Yig isaruk apareg, eke fobik yig isaruk wilil, “It ap inaharek elehon epmano nintul nantul hinim welamuhup etno fam, yi angge di angge og isuog ulug hinindi eberoko og isaruk amuhup oke, An fobik hit ninim welamuhuk fug-o.

⁸ At hwe du ariroho suhuk ulug ahla burukon etno-at sehek-o. Eke An fobik wararuhukmu nebe o wikelma nombahakubon etno awan heheg oke, namben eleg welamag ulug at hwe duen arat sehek-o.

⁹ Ariroho sehekon ari, fobik wene fano wene etno walug o ahik ya da epma yig isil nuruk wilil, it inindi ebebukag ulug at hwe arien ariroho sebag-o ulug yig isil nuruk amuhup-o, ulug An demat yig hisaruk ahi-o,” ulug yig isebag.

At Yesus wabukag ulug yonggo lebahon wene 14:10-11

¹⁰ Yig isaruk apagma, At Yesus omini inebe dua belas at misig inuk Yudas Iskariot etnowen it Allah unde suon epmano inambeg senebukag ulug yonggo lebag.

¹¹ It etno wabuog ulug ebareg fam, at etno yonggo laruk apareg yig isaruk apagma, it suon epmano inindi inahien haruk apareg, yig ituk wilil, “Demat halug, uang anggen onggo og humuhuk-o,” ulug yig ituk apagma, Aren ebe keroho senebuhup ulug indi ebetuk apag.

Wam domba waroko Paskah esebuog ulug lahap isebahon wene 14:12-21

¹² Indi ebetil laruk apagma, roti su atuk elehon etno esohopfulug ininggik misihim esoko naruk wilil, wam domba etno waroko Paskah esebuog ulug suruk iseheg, it At omini epmanowen yig ituk wilil, “Yesus wai, nit wam domba waroko Paskah esebukon etno nit yi angge di angge esebukag ulug kema lahap nisamihin-o?” ulug yig epag.

¹³ Yig ituk apagma, Aren omini biren lahap isaruk wilil, “Hit o sili sumu epmano kuruk atlihipmu, ap misig sohorluk fam ik honanggoko omalo fam walug larukmu hinim salkal uruk atlihipseg, mutlug lalihip-o.

¹⁴ Laruk wilil, hinim ibam etno kuruk atlihipseg, ap o epma unde werehon etno yig ituk wilil, ‘Ninowe yanggul nisarukon etnowen An nomini duma ninim wam domba etno nawon oke, o baharik keyen nul-o?’ ehek ulug yig imuk-o.

¹⁵ Ariroho yig ituk atlihipmu, at etnowen yig hisaruk wilil, ‘Hit nao ambeg umbo o baharik misig fam fanoroho haloko wereg-o,’ ulug yig hisaruk halug, nit nawon etno epma-at esetlihip-o,” ulug yig isebag.

¹⁶ Yig isaruk apagma, At omini lahap isebahon etno o sili sumu epmano kuruk apareg, At Yesusen yig isebahon etano ilitoho-at segma inilanggen hebag. Inilanggen haruk apareg, wam domba etno esoko walug imbik kebag.

¹⁷ Esoko imbik kuruk apareg, wereg heheg, o hup atuk apagma, At Yesus omini dua belas epmano inim wapag.

¹⁸ Waharuk apareg, it At omini epmano orom naruk iseheg, At Yesus etnowen yig isaruk wilil, “Hit An ninim dambuksoho wilil orom nenggeon du, hat misihen An sen nabukag ulug yonggo lahen hiyihi-o, ulug yig hisihi ari An demat yig hisihi-o,” ulug yig isebag.

¹⁹ Yig isaruk apagma, it inindi dag atuk apareg uruk wilil, “Anden ihimu ehen ano? Sen ehekma ehen-o?” ulug at misig yig ereheg, at misig yig ereheg uruk apagma,

²⁰ At etnowen yig isaruk wilil, “Hit An nomini dua belas du hat ap misig An ninim ambusu walu du fam weregma orom roti ninim yuhuloko naruk aheon du-at lahen hiyihi-o,” ulug yig isebag.

²¹ Yig isaruk apareg, fobik yig isaruk wilil, “An Allahen minduhup naharision holal amuk balfag etno ilitoho-at wararuhuk oke, eke An Allahen minduhup naharision etno nowabukag ulug yonggo laruk du, ap ari endag atlep fugmen fano-o,” ulug yig isebag.

At Yesus etnowen orom naruk wilil An nebe du at-o ulug yig isebahon wene 14:22-26

²² Yig isaruk apareg, orom nuog ulug At Yesus etnowen orom roti inggikmu waruk apareg, seneg wilil, Nikni Allah wa ulug sembahyang uruk apareg, omini epmano kut kut og isaruk wilil, “Orom du An nebe ilitoho at-o, hit hulimiek-o,” ulug yig isebag.

²³ Yig isaruk apareg, eke fobik ik honanggo etno inggikmu seneg wilil, Nikni Allah wa ulug At Allah heahi watuk apareg, og isaruk apagma, it epmano obog-at nebag.

²⁴ Naruk apagma, yig isaruk wilil, “It yi aphe di aphe At Allah inim fanoroho welamag ulug dambuk inaptuk ariog ulug An namep deloko wilip aruhuon etno ilitoho du at-o.

²⁵ Eke An ik e anggur anggen ambusu etno o duma wilil nahuk fug-o. Fobik At Allah weregma arat laharuk aruhukseg, etlemen e anggen ambusu keron-at nahuk-o,” ulug yig isebag.

²⁶ Yig isaruk apagma, it epmano di watuk apareg, Zaitun bunumu lahuog ulug wilip apag.

At Yesusen Petrus etno yig ituk wilil Haren Yesus ebe an napeleg-o ulug uhun-o ulug yig epahon wene 14:27-31

²⁷ Wilip atuk apareg, At Yesus etnowen yig isaruk wilil, “Alkitab wene baleg fam hurumbik duroho yig nisaruk-o, ‘Anden At wam domba inaso werehon etno waruhuk halug, it wam domba inebe epmano hite wilip amuhup-o,’ ulug yig nisebahon etno ilitoho, hit obog sohorep nahalug, wilip amuhubon oke,

²⁸ An fobik niluksoho minduhup naharuk aruhumu, o Galilea epmen hit hinilanggen neawag ulug lahuk-o,” ulug yig isebag.

²⁹ Yig isaruk apagma, eke at Petrus etnowen yig ituk wilil, “Eleg-o, it obog wilip amuhup oke, an hag hombahalug lahuk fug-o,” ulug yig ituk apagma,

³⁰ eke At Yesus etnowen yig ituk wilil, “Ariroho ehenon oke, o sono ilikia sue ayam une birenam awan uruk eleg heheg, henahanam An ebe napeleg uhun-o, ulug yig hirihi ari An demat yig hirihi-o,” ulug yig ituk apagma,

³¹ at Petrus etnowen yig ituk wilil, “Eleg-o, anden ebe napeleg ari uhuk fug-o. Hat howatuk isalug, an ninim-at nowabukag-o,” ulug une ineroho-at yig ituk apagma, it obohen etnoroho-at yig epag.

At Yesus o Getsemani sembahyang ik lebahon wene 14:32-42

³² Yig ituk apareg, o Getsemani etno lebag. Laruk apareg, At Yesusen omini epmano yig isaruk wilil, “An sembahyang ik laminen, hit duma horieg welamiek-o,” ulug yig isebag.

³³ Yig isaruk apareg, it Petrus, Yakobus; Yohanes etano hag inim lebag. Laruk apareg, At etno indi dag atuk wilil, akol anggolo hebag.

³⁴ Akol haruk apareg, it etano yig isaruk wilil, “An nebe etno warapmin ari fam nindi mondog dag aha-o. Ariroho seg ahareg fam, hit dia wilil, nohoruk imbisalug hinilanggen welamiek-o,” ulug yig isebag.

³⁵ Yig isaruk apareg, At etno horog-at laruk wilil, olohore seberoho yin apag. Seberoho yin atuk apareg, sembahyang uruk wilil, “An nebe yoho war nabukon ari, elehepfuk behen halug, it inahla beheson etno elehepfin-o, Nikni.

³⁶ Eke Haren yi angge di angge obog-at suruk ahenon etno kidia An ik sihon sohorluk fam honanggoma niog ulug suruk ahion du Haren elehepfin-o, ulug yig hirihion oke, Anden yig hirihion etno fam suk ari hai-o. Hat hindien bulug-at suk ari hag fano-o,” ulug sembahyang ebag.

³⁷ Sembahyang uruk apareg, it etano inambeg wapag. Waharuk apag, it etano nohorukmu ilanggen isaruk apareg, at Petrus etno yig ituk wilil, “Simon wai, hat nohoruk ahen ari, jam misig hiluk welam hamberaken nohoruk ahen ano?” ulug yig ituk apareg,

³⁸ eke fobik yig isaruk wilil, “Hit dag sukag ulug hinindimu kahalik wam nowen hinilanggen yaharoho wilil, sembahyang-at uruk amuk-o. Eke hinindimuen du suk fano ulug buruk ahebon oke, hininggik fam sukon etno hinahlahi atuk-o,” ulug yig isaruk apareg,

³⁹ bilin sembahyang ik lebag etno hag fobik ik lebag.

⁴⁰ Lebareg waharuk apag, it etano noho inilmu atuken nohorukmu ilanggen isaruk apagma, it etano inakolen keroho yig imuk-o? ulug inahla buruk apareg, inune ilik eleg bok apag.

⁴¹ Bok atuk apagma, eke At etno fobik misihim lebareg, wapag. Waharuk apareg, yig isaruk wilil, “Hit kidia hinambol sat kelsaruk wilil, nohoruk amiek-o, ulug arat yig hisihi-o. Eke An nowabukon etno kidia horog fanggog ehek-o. An Allahen minduhup naharision etno it dag surukon epmanowen nebe sen nabukag ulug yonggo wahaon ebe du-o.

⁴² Ariroho wahareg fam, hit lulen minamiek-o. Eke it An sen nabuog ulug waheson duma hinilanggen yet isimiek-o,” ulug yig isebag.

At Yesus senepahon wene 14:43-52

⁴³ Awan yig isarukmu, at Yudas bilin omini dua belas neken inim sil nuruk apahon etno wapag. Waharuk apareg, it Allah unde suon epmano inim, it wene baleg unde epmano inim it inowesi epmano inimen ap karog inim, yikangge inim unde werehon etno inim lahap isa waharuk apagma, at etno inim wapag. Inebe awan wamuog ulug suruk wilil, bilin at Yudas etnowen ininggik ariroho seneriuk-o ulug yig isebag.

⁴⁴ Yig isaruk wilil, “An heahi watuk neken nambilik mitig haruk nealug, hiren ap ebe du at-o, ulug hog laruk atlihipseg, hininggik keteroho seneriuk-o,” ulug yig isebag.

⁴⁵ Ariroho yig isalug, at Yudas etno werlek neken Yesus ambeg waharuk apareg, “Nowe-o,” ulug heahi watuk wilil, ambilik mitig hebag.

⁴⁶ Ambilik mitig haruk apagma, it epmanowen arat senepag.

⁴⁷ Senetuk apagma, at ap misig horog inalilukmu welapahon etnowen karog lisoko ap Allah unde suon anggimbu misig etno esanggo sarepsepfebag.

⁴⁸ Sarepsepfuruk apagma, At Yesus etnowen yig isaruk wilil, “An nebe ap dahon ahama sen nabuog ulug karog yikangge inim walug wahep ano?

⁴⁹ Eke hit ap nin Anden o Allah ibam epmanowen wene yig hisaruk wilil, ninim welatukukon etnowen sen naptikip fuhon oke, amuk ariroho suhup ulug ebahon wene baleg wereg ilitoho-at sen naptuk ahep-o,” ulug yig isaruk apagma,

⁵⁰ At omini obog-at sohorep isalug wilip apag.

^51-52 Wilip atuk apagma, at udag elege misig At Yesus inim laruk apahon etno hog senebuog ulug suruk apagma, asum selemon etno loloko umbulug ebe akeleg-at hite wilip apag.

Ap Allah unde suon etnowen Hat Kristus ano? ulug hinog webahon wene 14:53-65

⁵³ Eke at udag etno hite laruk heheg, At Yesus etno walug, at ap Allah unde suon etno ambeg imbik lebag. Walug laruk apagma, eke it wene baleg unde epmano inim, eke it wene unde inowesi epmano inim it obog at wereg ambeg wonggalik wapag.

⁵⁴ Eke At Yesus etno walug laruk apagma, at Petrus etno fobik ombolim yamo damo laruk apareg, at ap Allah unde suon etno isilimu kuruk apareg, at etno osi inim horieg wilil, inggik hondokma ke suruk apag.

⁵⁵ Epmano weregma, it ap Allah unde suon etno inim, eke it wene baltukon obog epmano inim dambuksoho wilil, “Nit At Yesus wabuog ulug watlowon oke, alem nongge fam warepful-o? Aren alem dahon misig suruk eleg hehe-o,” ulug uruk apareg, obam denggeluk hai atuk apagma,

⁵⁶ it ninen inenggal-at ariroho sirisi ulug obam denggelfahon oke, it ninen nin eheg, it ninen nin eheg uruk apareg oke, alem misig demat sebahon obam embebag fug.

⁵⁷ Obam embeheg eleg-at weregma, it nin minatuk apareg, inenggal-at obam denggeltuk apag.

⁵⁸ Obam denggeluog ulug uruk wilil, “At etnowen o Allah ibam ap ininggiken falfahon du mialepfuhukseg, ninggik henahan welatlug ubulukmu it ap ininggiken faltuk etno hag faluhuk fug-o. Anden faluhuk ari akeleg neken-at faluhuk irisi-o,” ulug uruk apareg,

⁵⁹ wene at misihen nin-at eheg, at misihen nin-at eheg, dahan fahan uruk apagma,

⁶⁰ at ap Allah unde inowe suon etno it inolohotmen minapareg, At Yesus etno unema hinog waruk wilil, “Yi wene di wene Hat hobam denggeltukon oke, Haren onggo yig isaruk ahen fug du, nulug welahen-o?”

⁶¹ ulug yig epahon oke, At Yesus etno une ilik eleg-at bok apag. Bok atuk apagma, at ap Allah unde inowe suon etnowen yig ituk wilil, “Niren At Allah alon faltuk aheon Amloho Kristus uruk etno Hat At ano?” ulug hinog webag.

⁶² Hinog waruk apagma, At Yesus etnowen yig ituk wilil, “An nebe du at-o. Eke An Allahen minduhup naharision etno fobik At oag mondog werehon etno inggik bikit fil horieg welaruhukseg, hena famen ambik waharukmu hinilanggen yet neahup-o,” ulug yig isebag.

⁶³ Yig isaruk apagma, at ap Allah unde inowe suon etno asum libil saruk apareg, yig isaruk wilil, “Nit keroho ulug fobik inim hinog wuk uruk ahe-o?

⁶⁴ Aren Allah abug balehekon du hinesanggo holehepseg, hinindi eberehebon halug iek-da,” ulug yig isaruk apagma, it obog epmanowen uruk wilil, “At une dahon ehekseg fam ari warepfukag at-o,” ulug wene balfag.

⁶⁵ Wene arat baltuk apareg, it nin etnowen inowasup olohotma sup heheg, eke it ninen ilanggen heraho iseheg ebe ininggik samurlinggilig wareheg suruk apag. Ariroho suruk apareg, yig ituk wilil, “Hat ap duen nowatuk in-o,” ulug yig ituk apagma, it sehen unde werehon epmanowen senetuk apareg, ininggik ahul fam olohobanggenma lambisog wapag.

At Petrus etnowen Yesus ari an napeleg-o ulug uruk apareg ioba yapahon wene 14:66-72

⁶⁶ Lambisog watuk iseheg, at Petrus etno o sili apma fil epmano weregma, at hole misig ap Allah unde inowe suon anduanangge etno wapag.

⁶⁷ Waharuk apareg, at Petrus etno sohiken inggik hondokma ke surukmu haruk apareg, ebe ilanggen bikharuk wilil yig epag, “Hat hebe Yesus Nazaret ap etno hinim welahebon-at hiyihi-o,” ulug yig epag.

⁶⁸ Yig ituk apagma, at etnowen yig ituk wilil, “Hat ehen ari an napeleg-o,” ulug yig ituk apareg, selema wilip apag.

⁶⁹ Wilip atukmu, sue ayam etno une uruk apagma, at hole etno fobik ilanggen haruk apareg, uruk wilil, “Eleg-o, ap etno at inim werehon-at hihi-o,” ulug it aphe werlekon epmano yig isebag.

⁷⁰ Yig isaruk apagma, eke at etnowen etnoroho-at uruk wilil, “An napeleg-o,” ulug yig isebag. Yig isaruk apareg epmano weregma, it ap werlekon nin epmanowen at Petrus yig ituk wilil, “Hat hebe o Galileaon At omin hinim welahebon-at heyehereg fam, haren eleg uk fug-o,” ulug yig ituk apagma,

⁷¹ at etnowen yig isaruk wilil, “Hit ap ehep ari, an napeleg-at-o, ulug anden demat yig hisaruk ahion ari At Nikni Allah etno iluk-o. An nenggal urukmu neyehek halug, Aren nowabukag-o,” ulug at Allah inuk fam yig isaruk heheg,

⁷² sue ayam une birenam uruk apagma, at Petrus etno Yesusen bilin yig epahon etno indi ebetuk wilil, “Sue ayam une birenam iog ulug suruk heheg, hinggik henahanam An ebe napeleg-o ulug uhun-o,” ulug yig epahon etno indi ebetuk apareg, epmanowen wilip apag. Wilip atuk apareg, ioba yatuk apag.