Ibrani 8 - Allah Wene Hurumbik Keron

Ninowe Allah unde suon ari At Yesus at-o ulug yig isebahon wene 8:1-13

¹ Eke wene uruk aheon etno alem du at-o: Nit Ninowe Allah unde suon misig etno At Allah suon alon werehon etno horieg wereg ambeg inggik bikit fil horieg wereg-o.

² Eke At etno Allah unde suon wilil, o akeleg neken alon wereg ambeg etno eyabuk suruk-o. Ariroho suruk ari, it aben bilin o sum fam falfag ambeg epmanowen suruk eleg-o. O suon alon werehon At Allahen falfag ambeg epmanowen-at suruk-o.

³ Eke it ap Allah unde suon epmano hag, iren yi angge di angge Allah ake embeheg, eke wam waroko At Allah ake ulug hondok yaleheg suruk amag ulug minduhup isaruk-o. Ariroho suruk etno ilitoho nit Ninowe Allah unde suon etnowen angge Allah ake embebahon misig wereg-o.

⁴ Eke it Yahudi aben wene duroho suruk amuk eke duroho suruk am fug ulug ebahon etno wereg heheg, it ap Allah unde etnowen At Allah ake umburuk-o. Ari halug, At nit Ninowe etno o kweanma duma welatlepmen, At ebe Allah unde neken welatlep fug-o.

⁵ Eke it ap kweanmon Allah unde epmanowen suruk ari, boholmen suruk heheg, ahut neken-at suruk-o. Ariroho suruk ari, bilin at Musaen sebag etno hag suruk-o. Eke at Musaen sebag etno, o Allah ibam etno faliog ulug suruk heheg, At Allahen yig ituk wilil, “Hat o duroho faliuk ulug bilin o dom fam epmanowen yig hitikikon etno ilitoho-at faliuk-o,” ulug yig epag.

⁶ Ariroho yig epahon oke, it ap kweanmon Allah unde epmanowen suruk ari, doron at-o. Eke At Yesus etno Allah unde suon wilil eyabuk akelehon-at suruk amag ulug minduhupfebag-o. Eke hurumbik amukon yig nisebahon ari doron at-o. Eke hurumbik keron etno hag, At Yesusen it aphe At Allah inim dambuksoho imbisebag etno fam, At Allahen yi angge di angge fanowon-at og hisahuk ulug abug yig nisarukon ari suon-at wereg-o.

⁷ Eke wene hurumbik amukon etno fano-at welatlepmen, hurumbik keron etno yig niselep fug-o.

⁸ Yig niselep fuhon oke, At Allahen it At udaki epmano dag suruk isaruk apareg, uruk wilil, “O fobik An it Israel aphe etno inim, eke it inungguluag Yehudaon etno inim wene hurumbik keron etno ninim uruk amuhukseg, keron neken-at dambuluhuk-o.

⁹ Eke o amuk it inetamuki o Mesir etno weregma ininggik senoko wilip isa waharuk seyareg, ninim wene baltuk ahowareg dambultuk soag etno hag, dambuluhuk fug-o. Eke bilin ninim dambultuk wilil, wene baltuk sowahon etno iren ebebuk sohorep isebag etno fam, Anden inebe sohorep isaruk seyag-o,” ulug At Allahen yig isebag-o.

¹⁰ Yig isaruk wilil, “Fobik it Israel aphe ninim wene ariroho baltuk amuhukseg, ninim dambuluhuk-o. Eke Anden wene duroho suruk amuk eke duroho suruk am fug ulug yig isahukon etno inindimu holal neken baloko umbuhuk-o. Eke it epmano An nudaki wereg iseheg, Inikni Allah An-at welaruhuk-o.

¹¹ Eke it obohen An nobam inindi ebebuhup etno fam at omin misihen, omin misig Hikni Allah obam eberin ulug yig iruhu fug-o. It obog udag doron inim, ap suon inim inindi An nobam-at ebetuk amuhup-o.

¹² Ariroho ebetuk isalug, Anden inabua isaruk wilil, iren dag suruson epmano inobam inapelegsoho imbisahuk-o,” ulug yig isebag-o

¹³ Wene keron etno ariroho yig hisahuk ulug yig isebareg fam, At Allahen wene hurumbik amukon etno bilinon ulug sohorep isebag-o.