Galatia 6 - Allah Wene Hurumbik Keron

Yi angge di angge angginon hinobam werehon epmano hit hit yalmag yalmag suruk amuk-o ulug yig isebahon wene 6:1-10

¹ Nomini-o, at ap misig indi oag eleg wilil, dahan fahan suruk halug, hit Roh Kudus hinindimu werehon etnowen ap etno fikfag moturuk amuk-o. Moturuk wilil hinune fanoroho yig ituk amuk-o. Ariroho wilil, hit hinonggareg inim-at hinindi kahaluk nowen ulug hinindi aso fanoroho welamuk-o.

² Eke yi angge di angge angginon hinobam werehon epmano hit hit yalmag yalmag suruk amuk-o. Ariroho suruk wilil, bilin At Kristusen yig hisebahon etno ilitoho suruk amuhup-o.

³ Eke ap kimbuangge misig etnowen an suon welahi ulug ahla buruk halug, onggarehen urunanggerepataruk-o.

⁴ Eke hit obog hinobabut suruk ahebon epmano inim-at fanoroho aso welamuk-o. Eke fanoroho suruk wilil halug, an fano welahi ulug hinahla buruk amuk-o.

⁵ Eke hiren an hag fano, at du dag ulug hinahla buruk am fug-o. Eke yi angge di angge angginon inobam werehon epmano inonggarehen elehepatalug lawag-o.

⁶ Eke ap misig at ap misihen Allah wene yanggul itukon halug, at aharek yi angge di angge epmano ap yanggul itukon etno og ituk amag-o.

⁷ Eke wene inenggal urukon etno mutlug la fug-o. Eke hiren suruk ahebon epmano hinenggal-at Allah yig ituk hisalug, Aren demat ulug ahla buhu fug-o. Eke at ap misig aren yag sarukon epmano-at bal sahu-o. Eke it inindien dag surukon epmano-at i neken yag sahup halug, o dagma welamon etno anggen neken bal sahup-o.

⁸ Eke At Roh Kudusen yig isarukmu fanoroho surukon etno i neken yag sahup halug, At Roh Kudusen og isarukmu o fanoma wilil iniluk welamon etno anggen neken bal sahup-o.

⁹ Eke ari halug, fanoroho sukon etno orog-at suruk am fug-o. Eke nintul nantul fanoroho suruk nisalug, fobik o ari sambit anggen fanowon etno-at bal sahuk-o.

¹⁰ Eke ari halug, ninebe niniluk wilil, it aphe werlekon hag fanowon etno inobam imbiseheg suruk am oke, it ninomini ninim Allah wene waruk aheon epmano mondog-at fanowon etno inobam imbisaruk amuk-o.

Holal baloko etno atog arat embebahon wene 6:11-18

¹¹ Eke an ninggiken holal du bal hisaruk wilil, ebe suon bal hisihi ari hinilanggen himiek-o.

¹² Eke it ap ninen nit-at suon welamuhuken ulug yi angge di angge eleg atukon etno farim, hiren suruk amag ulug hit hiniyunggul ambilik baliek ulug inenggal neken yig hisaruk-o. Eke ariroho yig hisaruk ari, At Kristus e fam lenggaloko embebagma, warapahon wene etno farim it Yahudi aben dahon etno ninobam umbuk nowen ulug wene ariroho yig hisaruk-o.

¹³ Eke it epmano iniyunggul ambilik bal sarukon oke, wene duroho suruk amuk eke duroho suruk am fug ulug ebahon etno ilitoho suruk eleg-o. Eke iren nit nininuk suontep nisahukag ulug inahla buruk wilil, hiren hiniyunggul ambilik bal simiek ulug yig hisaruk-o.

¹⁴ Eke an hag, At Ninowe Yesus Kristus e fam lenggaloko embebagma, nit ninake warapahon etno inuk-at suontepfuruk aruhuk-o. Eke at ebe ariroho an nake warapareg fam, yi angge di angge it ap kweanmonen surukon epmano elegsoho imbisaruk ahi-o. Eke it aphe kweanmonen an nebe inapeleg neken atisi-o.

¹⁵ Eke iniyunggul ambilik balukon alem etno At Yesus Kristus waharuk wilil elehepfebareg fam, kidia ninebe inim, ninindi inim ketoho ninombisahukon etno alem suon neken wereg-o.

¹⁶ Eke hit an wene holal fam yig hisihion du-at mutlug laruk hisalug, At Allah udaki obog hinim At Allahen dambuk hinaptuk wilil, ahmu hisawag ulug yig hisihi-o.

¹⁷ Eke an ap misihen enggal wene uruk halug, an nindi seneni anggolo ebebukag ulug fobik ariroho suk fug-o. Eke an At Yesus Kristus awene yig isarukmu, nowatusareg fam, At Yesus anggimbu ulug nobene nahambut wereg-o.

¹⁸ Eke At Ninowe Yesus Kristus etnowen hinabua hisaruk wilil, hit obog hinim welamag ulug yig hisihi-o, nomini wa.