Galatia 5 - Allah Wene Hurumbik Keron

Hit seberoho neken welamon etno sohorep isalug hinili ohowon neken welamuk-o ulug yig isebahon wene 5:1-15

¹ Nit ninebe seberoho neken welamon etno sohorep isalug, arat ninili ohowon welahe-o. Eke At Kristusen ninili warisi-o. Eke ari halug, ap inili ohowon neken minduhuk welamuk-o. Ariroho wilil, nin fobik inim seberep hisahuk nowen ulug yaharoho welamuk-o.

² Eke an Paulusen yig hisaminon etno hinesanggo fanoroho holiek-o, “Hiren niniyunggul ambilik bal ninabukag ulug uhup halug, At Kristus obam werlek-at ebetuk ahep-o,”

³ ulug yig hisihion ari fobik inim dahagsoho nune mondog oag weregsoho yig hisamin-o, eke at ap misihen niyunggul ambilik bal nabukag ulug uhu halug, bilin it Yahudi aben duroho suruk amuk eke duroho suruk am fug ebahon etno obog ilitoho-at sukag-o.

⁴ Eke hit ninen it Yahudi aben wene duroho suruk amuk eke duroho suruk am fug ulug ebahon etno ilitoho suruk wilil, At Allahen alem dahon hinobam werehon epmano elehepfukag ulug suruk ahebon halug, At Kristus hinim healsaruk ahep-o. Ariroho suruk ahep ari, At Allahen hinabua hisawon etno elegsoho imbisaruk ahep-o.

⁵ Eke nit hag At Kristus obam ebetuk nisalug, At Allahen alem dahon ninobam werehon epmano elehepfuhu ulug ninindi ebetuk ahe-o. Eke At Roh Kudus etnowen yig nisarukmu, Aren alem dahon elehepfukon etno aso welahe-o.

⁶ Eke nit At Yesus Kristus ninim hunduhuk wereg nisalug, wene niniyunggul ambilik balukon etno alem eleg neken wereg-o; eke nit At Kristus obam ebetuk wilil, ninim hunduhuk welahe etno fam wene Aren ebahon etno ilitoho sukon ari alem suon neken-at wereg-o.

⁷ Eke hit bilin At Yesus obam ebetikibon oke, wene demat urukon etno hinesanggo holuk nowen ulug at sen hinindi kahalik waharisi-o?

⁸ Eke At Allah wol hinaptukon etnowen ariroho yig hisarisi fug-o.

⁹ Eke roti mabuog ulug su atukon etno dorat umburukon oke, etno fam roti ebe su atuk-o ulug urukon etno wereg-o.

¹⁰ Eke an welahi etno hag, hit ariroho At Ninowe hinim welahep etno fam, hinindi dahan fahan ebebuhup fug ulug nahla buruk ahi-o. Eke at ap wene enggal-at yig hisarukon ari ap sa ulug inuk an napelehon oke, At Allahen iluk wilil, onggo etno demat obam umbuhu-o.

¹¹ Ari halug, nomini-o. Anden hit hiniyunggul ambilik balukag ulug wene yig iselemen, dahon etno keroho nobam embelep-o? Eke anden ariroho yig iselemen, At Yesus e fam lenggaloko embebagma warapahon wene etno iren ninambit ulug elep fug-o.

¹² Eke it wene inenggal-at yig hisarukon ari inawene etno inonggarehen eberegsoho suruk atlep ari fano, eke ariroho suruk isalug, it etno muko wilip isa fano.

¹³ Eke ari halug, nomini-o. Hit hinebe anggimbu neken welamon etno sohorep isalug, ap inindi werehon neken welamag ulug wol hinaptisi-o. Ariroho wol hinaptisireg fam, hinindi weregsoho wilil, kweanmen yuhun-at surukon etno suruk am fug-o. Eke hit hinomini hinindi hunduhuk wilil, hit hit yalmag yalmag suruk amuk-o.

¹⁴ Eke wene duroho suruk amuk eke duroho suruk am fug ulug ebahon etno alem misig-at duma weregma yig hisamin-o, “Alem ari, hit hinebe hinonggarehen hinabua saruk ahep etno hag, hiren it aphe obog ariroho inabua isaruk amuk-o,” ulug wene engga wene ebahon etno fam yig hisaruk ahi-o.

¹⁵ Eke wam elien it it aptuk etno hag, hit nambit hambit uruk wilil, hit hit healtuk ahep ari, ninonggarehen watehe ha nowen ulug hinahla buruk wilil, yaharoho welamag ulug yig hisihi-o.

At Roh Kudusen surukon etno it inindi dahonen surukon etno inim huliroho wereg-o ulug yig isebahon wene 5:16-25

¹⁶ Eke hit At Roh Kudusen yig hisarukon etno-at suruk amag ulug yig hisihi-o. Ari halug, hit it aphe kweanmonen alem dahon suruk etno hag suruk am fug-o.

¹⁷ Eke it inindi dahonen surukon ari, At Roh Kudusen surukon etno inim huliroho wereg-o, eke At Roh Kudusen surukon etno it inindi dahonen surukon epmano inim huliroho wereg-o; it alem biren ariroho suruk wilil, healeg neken wereg etno fam, hiren du suk ulug hinahla buruk ahebon epmano ilitoho suruk ahep fug-o.

¹⁸ Eke At Roh Kudusen yig hisarukon etno demat suruk ahep halug, it Yahudi aben wene duroho suruk amuk eke duroho suruk am fug ulug ebahon etno anggimbu neken welahep fug-o.

^19-20 Eke it kweanmen alem dahon surukon epmano obog-at selegma bukaloko wereg-o, eke alem dahon ari, wanggik surukon etno inim, wanggik sukag ulug inindi kahaltukon etno inim, eke nit ninamonggat ari ulug inenggal-at urukon etno inim, eke usa surukon etno inim, eke aphe inim healeg werehon etno inim, eke yikangge aptukon etno inim, eke an ariroho suon welatle inahla burukon etno inim, eke inasine harukon etno inim, eke winimug aptukon etno inim, eke it ap o misihon healtukon etno inim, eke wene inenggal uruk wilil healsarukon etno inim,

²¹ eke aphe inambit hun inaptukon etno inim, eke ap watukon etno inim, eke it e anggur ambusu donggogsoho narukmu nenek surukon etno inim, eke inahum fituk heheg narukon etno inim, yi angge di angge arion obog-at suruk am fug ulug yig hisarikikon etno fobik inim-at dahagsoho yig hisamin-o. Eke it aphe obog ariroho surukon epmano fobik At Allah weregma kuhup fug-o.

²² Eke At Roh Kudusen surukon ari it aphe inim inindi hunduhuk werehon etno inim, eke inahien harukon etno inim, eke aphe inim dambuksoho werehon etno inim, eke inindi fanoroho welamon etno inim, eke aphe inune fanoroho yig isarukon etno inim, eke inobabut fanoroho surukon etno inim, eke yabuk fanoroho surukon etno inim,

²³ eke inindi seberoho welamon etno inim, eke inonggareg inindi aso welamon etno inim, it aphe yiroho diroho fanoroho suruk amon etno obog-at suruk isalug, fobik inebe dag seko imbisahu fug-o.

²⁴ Eke it At Yesus Kristus udaki epmanowen it aphe kweanmon yi angge di angge inindien dag surukon epmano obog-at elegsoho imbisarusa-o.

²⁵ Eke At Roh Kudusen ninilukep nisaharisi etno hag nit ninindimu At Roh Kudusen yig nisaruk halug, ilitoho-at suruk amuk-o.

²⁶ Eke an suon aruhuken ulug sil nurukon etno inim, eke nambit hambit urukon etno inim, eke ap du suon wereg du nindi-e, an ariroho suon welatle, ulug inahla burukon etno inim, obog-at sohorep isaruk amuk-o.