Galatia 4 - Allah Wene Hurumbik Keron

¹ Eke udag misig iknien angge at ebe waratuk halug holahuon etno ebe udag doron wilil, yi angge di angge holaon epmano at unde wereg oke, we anggimbu neken-at wereg-o.

² Eke at udag doron etno awan su atuk heheg, it ap ninen at aso wilil, at aharek yi angge di angge epmano it ap nin seneg wereg-o. Ariroho weregma, at iknien o ari sambit og imuk ulug irision etno arat atuk halug, og imuhup-o.

³ Eke ari ilitoho nit ninindi ebetuk aheon etno awan su atuk eleg heheg, walhan du at-o, ulug at anggimbu neken uruk atukuk-o.

⁴ Ariroho uruk atukukon oke, eke fobik At Allahen sukon etno fanggog uruk apagma, At Allahen Amloho etno belabik wapag-o. Belabik waharuk apagma, hwe misig amloho neken endag apag-o.

⁵ Ariroho endag atuk apagma, it Yahudi aben wene duroho suruk amuk eke duroho suruk am fug ulug ebahon etno ilitoho-at suruk wilil, nit wene komo yig nisebahon etno apma welatukukon oke At Allah udaki welamag ulug ninili oko ninombisahabag-o.

⁶ Eke hit ariroho Allah udaki atikipseg fam, At Allah Amlohoen angge Roh Kudus etno hinindimu belap hisa waharisi-o. Eke At Roh Kudus etno ninindimu wilil, “Ninikni,” ulug yig ituk-o.

⁷ Eke ari halug, hit anggimbu neken welamon etno sohorep isalug, At Allah udaki neken welahep-o. Eke At udaki neken welahep ari fam, At Allahen udaki og isawon etno obog-at og hisahu-o.

At Paulusen hit Galatia ap farim an nindi seneni ebetuk ahi-o ulug yig isebahon wene 4:8-20

⁸ Eke hit bilin At Allah hinapeleg wilil, du kwanangge oag werehon ulug inanggimbu welatikip-o.

⁹ Eke kidia At Allahen hit iluk wereg etno fam, hit At Allah hiniluk oke, hit keroho ulug it kwanangge inoag elehon etno farim fobik hinindi ebebuog ulug suruk ahep-o? Ariroho suruk ahep ari, hit nin fobik inim-at inanggimbu welamuog ulug suruk ahep ano?

¹⁰ Ariroho suruk wilil, hit hinindimuen o misihim alem misig ebebuhuk, eke sembahyang misihim alem misig ebebuhuk, eke bikalem misihim alem misig ebebuhuk, eke tahun misihim alem misig ebebuhuk ulug hinahla buruk ahep-o.

¹¹ Eke an hag nit hinindi yabuk werlek-at sirikik ulug an nakol haruk ahi-o.

¹² Ari halug, nomini-o, an nebe welahi etno hag, hit ariroho welamuk-o. Eke hiren an nobam dahon imbirikip fug-o.

¹³ Eke an bilin wene fano wene etno yig hisarikik etno alem nongge farim yig nisarisi ulug hit hiniluk-o. Ariroho yig hisarikik ari, an nebe uk wareg welatikikon etno farim yig hisarikik-o.

¹⁴ Eke an nebe uk wareg wilil, noag elegsoho-at yig hisarikikon oke, hiren ap uk warehon du bik hao ninambit ulug hinambit hun naptikip fug-o. Eke At Allah malaikaren yig hisarukmu wao hag, anden yig hisarikikon etno warikip-o. Eke At Kristus Yesusen yig hisarukmu wao hag, anden yig hisarikikon etno warikip-o.

¹⁵ Ariroho waruk atikipseg, hit hinahien anggolo harikip etno famen kidia inim yig hisamin-o. Eke hit hinilanggen hulil sao hiniluk welatlepmen, hinilanggen huliloko an-at og nitlep-o.

¹⁶ Eke an wene demat urukon etno yig hisarikik etno fam hit ninim healeg neken welatukuk buruk ahep ano?

¹⁷ Eke it aphe inenggal yig hisarukon epmano yamintal-at hinindi kahaluog ulug suruk-o. Eke ariroho suruk ari, an hit ninim healeg welamag ulug suruk-o. Healeg wilil, hiren it inawene etno-at mutlug lawag ulug yig hisaruk-o.

¹⁸ Eke yi angge di angge fanowon etno suog ulug nintul nantul suruk am ari fano-o. Eke an nebe hit ninim eleg neyeheg, fanowon epmano suk ari fano at-o.

¹⁹ Ari halug, nudaki nindi hunduhukon wai. Eke hwe misig udag ahumlareg welatlug, udag ebe endetuk etno hag, At Kristus hit hinindimu welamag ulug, anden endag hinabiog ulug suruk ahi-o.

²⁰ Eke an kidia hit ninim wilil, nune at misig nintoho-at yig ereheg, eke at misig nintoho-at yig ereheg suruk ariog ulug ninim welamuhuken ulug nindi ebetuk ahi-o. Ariroho ebetuk wilil, eke an hag hit farim nindi seneni ebetuk ahi-o.

It Hagar Sara duroho welapag-o ulug yig isebahon wene 4:21-31

²¹ Eke hit Yahudi aben wene duroho suruk amuk eke duroho suruk am fug ulug ebahon etno mutlug lahuk ulug hinahla buruk ahebon oke, hit wene ari hinesanggo holtuk ahep fug ano?

²² Eke at wene etnowen duroho yig nisaruk-o, at Abraham etno udaki ap angge biren welapag ari, at misig uhweyen endohowon welapag, eke at misig anggimbuen endohowon welapag.

²³ Eke at anggimbuen endohowon etno, it hweap inahuni elehonen yuhun-at endetuk etno hag, endag apag. Eke at uhweyen endohowon etno bilin At Allahen hat hamloho misig enderuhun ulug abug yig epahon etno-at endag apag-o. Ari fam kidia ilitoho neken yig hisamin-o.

²⁴ Eke it hweap biren inahudaki neken welapag-o. Eke at hwe misig inuk Hagaren endepahon etno at udaki dom Sinai famon anggimbu neken endag inaptuk-o.

²⁵ Eke at hwe Hagar etno wene dom Sinai o Arab etnowen wereg apahon etno isina neken wereg-o. Eke wene ari kidia it aphe o Yerusalem kweanmon etno inudaki inim wene etno anggimbu neken wereg-o.

²⁶ Eke o Yerusalem boholmon etno fanowon suon neken wilil, nit ninisina neken wereg-o.

²⁷ Eke at Alkitab etnowen yig nisaruk wilil, “Eke hat hwe hahudag endag saruk ahen fuhon du, hahien haruk amin-o. Eke hat hwe udag oloken hinel watuk ahen fuhon du hahien unda yatuk amin-o. Eke at hwe ahun inim werehon etno udaki dorat wereg oke, eke hat hahun elehon etno hudaki anggolo amuhup-o,” ulug at Alkitab etnowen yig nisaruk-o.

²⁸ Eke ari halug, bilin at Ishak etno endag aruhu ulug hurumbik yig epahon etno fam endag apag etno hag, hit ariroho-at Allah udaki atikip-o.

²⁹ Eke o ari sambit at udag it apheyen endetuk hag yuhun-at endag apahon etnowen at udag Roh Kudusen bilin hurumbik ebareg fam endag apahon etno enggali wariog ulug mutlug lebag-o. Lebag ari hag, eke kidia ilitoho-at suruk-o.

³⁰ Ariroho suruk oke, eke at Alkitab etnowen nongge yig nisaruk-o? Aren yig nisaruk ari, duroho yig nisaruk-o, “At anggimbu hwe etno amloho inim wilip isimuk-o. Eke at uhwe inim inamloho etnowen at iknien angge holahu etno hag, at hwe anggimbu amloho etnowen mondog holahu fug-o,” ulug yig nisaruk-o, nomini.

³¹ Eke ari halug, nit hag at hwe anggimbu etno udaki neken welahe fug-o; at uhwe inim inudaki-at welahe-o.