Galatia 2 - Allah Wene Hurumbik Keron

At Paulusen it ap mondep isebahon etno ninim wene urukuk-o ulug yig isebahon wene 2:1-10

¹ Eke fobik empat belas tahun welatikikseg, at Barnabas ninim o Yerusalem laruk wilil, at Titus inim-at walug larukuk-o.

² Eke At Allahen lag ulug yig nitisimu larikik-o. Laruk atikikseg it mondep isebahon epmano ninim wene baltuk wilil, anden it aphe Allah wene inapelehon epmano wene fano wene duroho yig isil larikik ulug bukaloko yig isarikik-o. Eke an kidia wene yig isil laruk ahion etno inim, eke bilin yig isil larikik etno inim, enggal-at yig isil larisi ulug an neyabuk etno hairepfuk nowen ulug, it inowesi epmano obog-at dindiloko yig isarikik-o.

³ Eke at Titus ninim larukukon etno ebe Yunani ap-at oke, iyunggul ambilik balukag ulug yig itusa fug-o.

⁴ Eke it ninen inenggal-at iyunggul ambilik balukag ulug uruson epmanowen nit Allah wene waruk aheon at-o, ulug it Allah udaki epmano inim herako neken dambuk atusa-o. Eke it dambuk atuson epmano inilanggen yenal wuog ulug kik waharusareg, it ap du Kristus wene waruk wilil, it Yahudi aben ariroho siuk ulug wene ebahon etno ilitoho suruk eleg ari keroho ulug suruk-o, ulug ninebe it inanggimburep nisahuog ulug waharusa-o.

⁵ Eke ariroho waharuson oke, eke wene fano wene demat yig hisarukmu hiren eberoko warikibon etno hinim welamag ulug niren it ap inenggal uruson epmano hiren fano ehep ulug mondog yig isarukuk fug-o.

⁶ Eke it Allah udaki inowesi epmanowen at Paulus wene misig apeleg ulug yig nitusa fug-o. Eke it inowesi ari bilin ap kerohon welapag ulug an napeleg yuhun-at welahi-o. Eke At Allahen ap du olohore dahon, du olohore fanowon ulug yig isaruk eleg-o.

⁷ Eke it inowesi epmanowen inahla buruk wilil, At Allahen it Yahudi ap wene fano wene etno yig isil lawag ulug at Petrus minduhupfirisi etno hag, it Allah wene inapelehon epmano wene fano wene etno yig isil lawag ulug at Paulus etno minduhupfirisi-o, ulug inahla burusa-o.

⁸ Eke it Yahudi ap epmano yig isil lawag ulug at Petrus oag werehon etno og itisireg, mondepfirisi etno hag, it Allah wene inapelehon epmano yig isil lawag ulug an oag werehon etno og nitisireg mondep naharisi-o.

⁹ Eke it Yakobus, Petrus, Yohanes it du ninowesi ulug uruson epmanowen at Paulus Allahen eyabuk akeleg-at og itisi ulug inindi ebetuk atusareg, an inim, at Barnabas inim ininggik og nisarusa-o. Ariroho dambuk uruk atukukseg, at Paulus, Barnabas inim it aphe Allah wene inapelehon epmano yig isil lahup-o, eke it nin hag it Yahudi ap yig isil lahup-o, ulug wene ariroho urukuk-o.

¹⁰ Ariroho uruk atukukseg, eke iren hinog og ninaptuk wilil, “It ap niron inaharek elehon epmano menag isawag ulug hinindi eberiek-o,” ulug yig nisaruson etno an hag nintul nantul ilitoho suruk atikik-o.

At Paulusen o Antiokhia epmen at Petrus etno esanggo watikik-o ulug yig isebahon wene 2:11-14

¹¹ Eke fobik at Petrus etno o Antiokhia waharuk atisimu, aren dahan fahan sirision etno farim it aphe obog inil fam esanggo watikik-o.

¹² Eke it ap at Yakobusen lahap isa waharision epmano awan waharuk eleg iseheg, at Petrus etno it Allah udaki bilin awene inapeleg welatuson epmano orom inim naruson oke, eke fobik it ap epmano waharuk atusama, it ap ninen uruk wilil, “It ap bilin Allah wene inapeleg welatuson epmano iniyunggul ambilik balukag-o,” ulug ariroho uruson etno at Petrus akol haruk wilil, “It ap bilin wene inapeleg welatuson epmano ninim orom namin fug-o,” ulug imbisarisi-o.

¹³ At Petrusen ariroho imbisaruk atisimu, it ninomini Yahudi ap epmano aren sirisi etno ilitoho inenggal suruk atusama, eke fobik at Barnabas etno ariroho enggal-at sirisi-o.

¹⁴ Eke it obog inonggalem motoho laruk eleg wilil, wene fano wene etno dahapfurukmu isaruk atikikseg, at Petrus etno it obog inil fam yig ituk wilil, “Hat Petrus hebe Yahudi ap-at oke, it Yahudi aben suruk etno hag suruk am sohorep isalug, it Allah wene inapelehonen suruk etno hag suruk ahen du, hat keroho ulug it bilin Allah wene inapeleg welatuson epmano it Yahudi aben suruk etno hag sukag ulug uruk ahen-o,” ulug esanggo watikik-o.

It Yahudi ap inim eke it aphe bilin Allah wene inapeleg welatuson epmano inim wene fano wene etno eberoko waruk isalug inili waruk-o ulug yig isebahon wene 2:15-21

¹⁵ Eke nit hag ninebe Yahudi ap endag atuk sowareg fam, it Allah wene inapelehon dag suruk etno hag suruk atukuk fuhon oke, it Yahudi aben wene duroho suruk amuk eke duroho suruk am fug ulug ebahon etno ilitoho suruk etno fam, alem dahon it aphe obog inobam werehon epmano At Allahen elehepfuruk eleg-o.

¹⁶ Eke iren At Yesus Kristus obam ebetuk isalug etno fam alem dahon inobam werehon etno elehepfuruk-o. Eke nit ari ilitoho At Yesus Kristus obam ebetuk nisalug, alem dahon ninobam werehon epmano At Allahen elehepfukag ulug At Yesus Kristus obam ebetuk atukuk-o. Eke it Yahudi aben wene duroho suruk amuk eke duroho suruk am fug ulug ebahon etno ilitoho suruk ahe etno fam alem elehepfukag ulug surukuk fug-o. Eke ap misig it Yahudi aben wene duroho suruk amuk eke duroho suruk am fug ulug ebahon etno ilitoho suruk halug, ari fam At Allahen alem elehepfuruk eleg-o.

¹⁷ Eke ari halug, niren At Kristus obam ebetuk wilil alem elehepfukag ulug suruk ahe etno fam, nit dag suruk aheon at-o ulug niniluk atlug, At Kristus ebe ari dag surukon etno anggimbu at-o, ulug ariroho uk ari fano buruk ahep ano? Ari eleg-o.

¹⁸ Eke anden yi angge di angge mialoko imbisarikikon epmano nin dahagsoho faltuk ahi etno fam, an wene duroho suruk amuk eke duroho suruk am fug ulug ebahon etno ilitoho suruk ahi fug ulug bukal atuk-o.

¹⁹ Eke wene duroho suruk amuk eke duroho suruk am fug ulug ebahon etno anden ilitoho siog ulug sirikikon etno hai atisireg fam, alem dahon etno-at nobam wereg heheg nebe warehon neken welatikikon oke, eke kidia At Allahen wene duroho suruk amuk eke duroho suruk am fug ulug ebahon etno ilitoho siog ulug niluk-at welahi-o.

²⁰ Eke an nebe At Kristus ninim e fam lenggaloko ninombisahabagma, waratuk soag oke, an niluk welahi ari, an nebe eleg-o, At Kristus etno-at nindimu iluk wereg-o. Eke kidia niluk welahi ari, At Allah Amloho-at obam ebetuk wilil niluk welahi-o. Eke At Allah Amloho nobam indi hunduhuk welapag etno fam, an nake-at warapag-o. Eke At Allah ninabua nisaruk wilil ninili wawon etno ebe werlekon neken imbisaruk ahi fug-o.

²¹ Eke ap misig it Yahudi aben wene duroho suruk amuk eke duroho suruk am fug ulug ebahon etno ilitoho suruk halug, etno fam At Allahen alem dahon obam werehon epmano elehepfelepmen, At Kristus etno werlek-at waratlep ari haruk ahep?