Galatia 1 - Allah Wene Hurumbik Keron

1:1-5

¹ An Paulus wene yig isil lawag ulug ap misihen mondep nahabag fug-o, eke it apheyen minduhup naharusa fug-o, eke At Yesus Kristus inim, eke At Ninikni Allah, At Yesus Kristus aphe warehon wereg ambehen iluksoho minduhupfebahon etno inimen, wene yig isil lawag ulug minduhup naharusa-o.

² Eke an it ninomini duma ninim welaheon epmano ninimen hit Allah udaki o Galatia o ahik ya da welahebon epmano heahi war hinaptuk ahe-o.

³ Eke At Ninikni Allah inim, eke Ninowe Yesus Kristus inimen hinabua hisaruk wilil hinim welamag ulug yig hisehe-o.

⁴ Eke o dagma welahe ambeg dumen ninili wawag ulug At Ninikni Allahen ahla buruk apareg fam, At Kristus nit dag suruk aheon ninonggo bal ninabiog ulug warapag-o.

⁵ Eke ari halug, At Allah inuk nintul nantul suontepfuruk amag ulug demat yig hisaruk ahi-o.

Wene fano wene etno misig-at wereg-o ulug yig isebahon wene 1:6-10

⁶ Wi, an hit keroho wereg ulug nahla buruk ahi-o. Eke hit At Kristusen hinabua hisarukmu wol hisarision etno dulumsoho sohorep isalug, wene akelehon-at mutlug laruk ahep-o.

⁷ Eke wene ari ebe eleg oke, eke it ninen hinindi kahalik waharuk wilil, Kristus wene fano wene du at-o, ulug yig hisarukon oke, ebe ninon-at uruk-o.

⁸ Eke it ap mondep isebahon misig inim, eke at boholma malaikat misig inimen wene fano wene niren yig hisarukukon epmano ilitoho yig hisaruk eleg halug, at ebe o dagma lawag ulug wene homali neken misig yig ituk ahe-o, ulug yig hisihion ari misihim inim dahagsoho yig hisamin-o.

⁹ Eke ap misihen wene fano wene eberoko warikibon etno ilitoho yig hisaruk eleg halug, at ebe o dagma lawag ulug, wene homali neken yig ituk ahi-o.

¹⁰ Eke At Allah mutlug lawag ulug yig hisaruk ahi ano, eke ap misig mutlug lawag ulug yig hisiog ulug suruk ahi ano? Eke it aphe inahien neawag ulug suruk ahi ano? Ari eleg-o. Eke an hag it aphe inahien neawag ulug sil nuruk atlemen, At Kristus anggimbu welatle fug-o.

At Paulusen yig isaruk wilil an At Yesus awene etno yig isil lawag ulug At Allahen minduhup naharisi-o ulug yig isebahon wene 1:11-24

¹¹ Nomini-o, wene fano wene anden yig isil laruk ahion etno bilin it aphe obohen ebag fug-o, ulug an demat yig hisaruk ahi-o.

¹² Eke wene ari ap misihen og nitisi fug-o, eke at ap misihen yanggul nitisi fug-o, At Yesus Kristus etno akelehen-at dindiloko yig nitisi-o.

¹³ Eke an bilin it Yahudi ap inawene etno waruk wilil, sil nuruk atikikon etno obog-at bukaloko yig hisarusa-o. Eke anden it Allah udaki epmano inabua iseheg eleg-at war inabiog ulug mug inaplug larikik-o.

¹⁴ Eke it nomini Yahudion nin it Yahudi ap inawene etno yuhun-at waruson oke, eke an hag nindi fam fikfag eberoko neken waruk wilil, it ninetamukien ariroho siuk ulug ebahon epmano ilitoho-at suruk atikik-o.

¹⁵ Eke ariroho suruk atikikon oke, At Allahen nabua nearuk wilil, an nebe awan endoho eleg neyeheg fuloko nombahabareg fam, fobik at anggimbu wilil eyabuk suruk amag ulug wol naptisi-o.

¹⁶ Wol naptuk atisireg, eke anden At Kristus awene fano wene etno it aphe Allah wene inapelehon epmano yig isil lawag ulug At Amloho awene etno obog-at bukaloko yig nituk atisi-o. At Allahen ariroho yig nituk heheg, eke an ap misihen yanggul nemag ulug aphe inambeg larikik fug-o.

¹⁷ Eke it bilin Allah wene yig isawag ulug mondep isebahon epmano o Yerusalem weregma inambeg larikik fug-o. Ariroho larikik fuhon oke, bikit o Arabia etno laruk atikikseg, fobik niog suhuluk o Damsyik etno waharikik-o.

¹⁸ Waharikikseg, an nebe o Yerusalem tahun henahanam welatikik fuhon oke, fobik at Petrus nilanggen halug ninim wene uog ulug larikikseg, sembahyang birenam ninim welatukuk-o.

¹⁹ Eke ariroho wilil, it mondep isebahon nin epmano nilanggen isarikik fug-o. We at ninowe omin Yakobus etno-at nilanggen harikik-o, ulug ariroho holal bal hisaruk ahi ari demat yig hisaruk ahi-o.

²⁰ Eke an nenggal ihi fug-o, ari At Allah il fam demat yig hisaruk ahi-o.

²¹ Eke fobik o Siria, Kilikia epmano waharikik-o.

²² Ariroho waharikikon oke, eke o ari sambit it At Kristus udaki o Yudea werehon epmanowen nolohore inilanggen nearusa fureg, nebe inapeleg welatusa-o.

²³ Eke it ninen uruk atuson epmano-at iniluk welatusa-o, eke it ninen uruk wilil, “At ap bilin nit war ninabiog ulug mug ninaplug larision etnowen kidia wene bilin elehapsiog ulug sirision etno it apheyen eberoko wawag ulug yig isil nuruk-o,” ulug ariroho nabug urusa famen,

²⁴ iren an farim At Allah inuk suontepfurusa-o.