2 Tesalonika 2 - Allah Wene Hurumbik Keron

At ap dahon etno waruhu-o ulug yig isebahon wene 2:1-12

¹ Nomini-o, At Ninowe Yesus Kristus wamon etno inim, eke nit dambuksoho og ninaplug lahukon etno inim alem ari fam yig hisamin-o.

² Eke At Ninowe etno arat waharisi-o, ulug ariroho hinindi dahan fahan ebebuk nowen ulug yig hisihi-o. Eke At Ninowe arat waharisi-o, ulug ap misihen aren-at irisi ano, eke Allah wene neken yig hisarisi ano, eke at Paulusen ariroho holal imbirisi ulug yig hisarisi ano? Eke at ap misihen enggal-at wene yig hisaruk ahi ulug hinindi kahaluk nowen ulug yig hisihi-o.

³ Eke it aphe obohen Allah wene ninambit ulug uruk iseheg, at ap dahon etno o dagma umbukon etno awan waharuk eleg heheg, At Ninowe etno dulum waruhu fug-o.

⁴ Eke at ap dahon waruhuon etnowen it aphe Allah obam ebetukon epmano seberoho imbiseheg, eke du At Allah ulug urukon etno sohorep iseheg suruk wilil, an-at suon welahi-o ulug uruk aruhureg, eke At Allah ibamen minatuk wilil Allah nebe an-at welahi-o, ulug yig hisahu-o.

⁵ Eke ariroho suhu ulug bilin yig hisarikikon etno hinapeleg atlug ebetuk ahep fug ano? Eke at ap dahon fobik waruhuon etno awan waharuk eleg ari, nongge farim bok atuk ulug hit hiniluk-o.

⁶ Eke at ap dahon etno fobik demat selegma aruhu-o.

⁷ Eke aren angge alem dahon etno kidia herako neken wereg oke, eke at misihen bok amin yig ituk-o. Eke at bok amin yig itukon etno fobik eleg aruhumu, at ap dahon etno selegma aruhu-o.

⁸ Eke at ap dahon etno arat waharuk aruhumu, At Ninowe suon Yesus etno oag weregsoho waharuk aruhureg, At ele ahahe oag werehon etno fam ap dahon etno warepfuhu-o.

⁹ Eke at ap dahon etno waharuk wilil, at setanen oag werehon etno og itukmu, elalintoho enggal-at sukfugangge neken suhu-o.

¹⁰ Eke it aphe fobik o dagma lahubon epmano at ap dahon etnowen yiroho diroho enggal-at surukon epmano fam inindi kahalik waruhu-o. Eke ariroho kahalik waharuk aruhumu, it aphe etnowen wene inili wawon demat urukon etno sohorep isahup ari fam, inonggareg inobaburen o dagma lahup-o.

¹¹ Eke it epmanowen enggal wene etno demat inahla bukag ulug yamintal surukon oag werehon etno At Allahen inobam imbisaruk-o.

¹² Eke ari fam it aphe awene demat urukon epmano sohorep isalug, dag surukon etno inahiroho suruk ari fam, oag deloko o dagma imbisahu-o.

Hit hinili wiog ulug imig hinaptisi-o ulug yig isebahon wene 2:13-16

¹³ Eke nomini hinobam At Ninowe indi hunduhuk werehon etno hit farim At Allah wa ulug sembahyang uruk ahe-o. Eke At Allahen hinili wiog ulug bilin imig hinaptisireg fam, At Allah udaki amag ulug Roh Kudus oag werehon etno og hisarisimu, hiren wene demat urukon etno eberoko waruk ahep-o.

¹⁴ Eke niren wene fano wene yig hisarukukon etno fam At Allahen wol hinaptisi-o. Eke At Ninowe Yesus Kristus etno inim suon welamag ulug wol hinaptisi-o.

¹⁵ Ariroho wol hinaptisireg fam, hit hinindi oag weregsoho wilil, niren ninune fam inim, eke ninaholal etno fam inim wene du demat ulug yanggul hisarukukon etno-at seneg welamuk-o.

¹⁶ Eke At Ninowe Yesus Kristus etno inim, eke At Ninikni Allah indi hunduhuken ninabua nisaruk wilil, niniluk welamon etno inim, eke fano ninabuhu-o, ulug ninindi ebetuk aheon etno inim og nisarision etnowen, hinindi yonggon hinabeheg, eke hinune inim, hineyabuk inim fanoroho suruk amag ulug hinoag werehep hisahakeg sukag ulug yig hisihi-o.