2 Tesalonika 1 - Allah Wene Hurumbik Keron

1:1-2

¹ Nit Paulus, Silas, Timotius epmano ninimen, hit Ninikni Allah inim, Ninowe Yesus Kristus inim inudaki o Tesalonika welahebon epmano heahi war hinaptuk wilil,

² At Ninikni Allah inim, eke At Ninowe Yesus Kristus inimen hinabua hisaruk wilil, hinim welamag ulug yig hisehe-o.

At Kristus fobik waruhureg aphe oag del ninabuhu-o ulug yig isebahon wene 1:3-12

³ Nomini-o, hit farim nintul nantul Allah wa ulug yig ituk am ari fano-o. Eke hit bilin wene demat ulug ebetuk atikipseg, fobik mondog suon-at ebetuk ahebon etno inim, eke bilin hinomini hinindi hunduhuk welatikipseg fobik mondog hinindi hunduhuk welahebon etno inim, ariroho welahep etno fam nit Allah wa ulug yig ituk am ari fano-o. Eke hit ariroho welahep etno fam, niren At Allah udaki o ahik ya da yig isaruk wilil,

⁴ it Tesalonika ap fano wereg etno hit hinilanggen isaruk amiek-o, ulug hininuk suontepfuruk wilil, eke it ninen dahon etno hinobam umburuk iseheg, hinindi oag weregsoho welahebon etno inim, eke nintul nantul Allah wene fanoroho waruk wilil, hinindi seberoho welahebon etno inim, it obog-at yig isaruk ahe-o.

⁵ Eke it ninen dahon etno hinobam umburukmu fanoroho welahep etno fam fobik onggo At Allah weregma-at kuhup-o. Eke ari fam At Allahen aphe ninaren baltug demat oag del ninaptuk ulug ninahla buruk ahe-o.

⁶ Eke At Allahen fobik motoho aphe oag del inaptuk wilil, it dahon hinobam umburukon etno onggo dahon inobam embeheg, eke hit kidia dahon hinobam umburukmu welahebon etno inim, eke nit inim, obog kelsawag ulug o fanoma ninombisahaku-o.

⁷ Eke o fanoma ninombisahiog ulug wereg heheg, At Ninowe Yesus boholmen omalaikat oag werehon epmano inim ambik wamuhup-o.

⁸ Ambik wamuhupseg, it inahondok eral ambulpulon etno fam it Allah inapelehon epmano o dagma imbisahup-o. Ariroho imbisahup ari, it At Ninowe Yesus awene fano wene inesanggo holuk inamberakon epmano inim-at nintul nantul o hondok olok inaruk aruhu ambeg epma welamag ulug imbisahup-o.

⁹ Imbisaruk amuhupmu, it epmano epma wilil, it At Allah olohore halug eleg At suon oag werehon etno inim welamuhup fug-o.

¹⁰ Eke At etno o ari sambit waharuk aruhumu, it udaki At obam ebetukon epmanowen inuk mondog suontepfuruk amuhup-o. Eke hit hag wene yig hisaruk atukukon epmano eberoko waruk ahep etno fam, At Yesus inuk suontepfuruk amuhup-o.

¹¹ Eke ari halug, nintul nantul hinake sembahyang uruk ahe-o. Eke At Allahen wol hinaptisireg fam hiniluk welamon etno holawag ulug fanorep hisahakeg, eke hiren nit fanowon etno suk ninindi-o, ulug uruk hisalug, oag weregsoho og hiseheg, eke At awene demat ulug ebebukon atog imbirision etno atog og hiseheg, suruk amag ulug At Allah obam sembahyang kino uruk ahe-o.

¹² Eke ariroho fanoroho wereg hisalug, hit farim At Ninowe Yesus inuk suontepfeheg, eke At Yesus farim hit hininuk suontepfeheg suruk amuhup-o. Eke At Ninikni Allah inim, eke At Ninowe Yesus Kristus inimen ninabua nisarusa-o ulug suontepfuruk amuhup-o.