2 Petrus 1 - Allah Wene Hurumbik Keron

1:1-2

¹ Nomini-o, At Ninikni Allah Ninowe Yesus inimen fuloko hinombisaharisimu, hit nit ilitoho Allah wene fanowon etno warukmu, an Simon Petrus, Yesus omin wilil, Allah wene yig isil nuruk amag ulug mondep naharision etnowen holal du bal hisihi-o.

² Eke At Ninikni Allah, Ninowe Yesus inimen fanowon etno suroho og hisawag ulug, anden heahi war hinaptuk ahi-o.

At Allahen wol ninaptisireg fuloko ninombisaharisi-o ulug yig isebahon wene 1:3-15

³ At Allahen at ninim ilitoho welamuhuken ulug wol ninaptision etno niniluk wereg halug, At suon oag werehon etnowen yi angge di angge fanowon epmano og nisarisi-o.

⁴ Eke At Allahen, yi angge di angge fanowon og hisahuk, ulug bilin yig nisarision etno holaruk amuhukseg, ninobabut dahon kweanmon etno sohorep isalug, hinindi keron-at holahuk-o.

⁵ Ari halug, nomini-o, Allah wene waruk aheon oke, eke fanoroho surukon etno obam seberoho holahuk-o, fanoroho surukon etno holahukseg, niniluk amon etno inim holahuk-o,

⁶ niniluk amon etno holahukseg, fobik ninobabut fanowon etno holahuk-o, ninobabut fanowon etno holahukseg, ninindi bugsoho welamon etno holahuk-o, ninindi bugsoho welamon etno holahukseg, fobik ninindi fanowon etno holahuk-o,

⁷ ninindi fanowon etno holahukseg, fobik ninomini ninindi hunduhuk welamon etno holahuk-o, ninomini ninindi hunduhuk welamon etno holahukseg, fobik yi aphe di aphe ninindi hunduhuk welamon etno holahuk-o.

⁸ Etno obog-at holaruk amuhukseg, Ninowe Yesus Kristus niniluk wilil, ninim mondog-at sil nuruk amuhuk-o.

⁹ Eke holahuk ulug ihion etno holaruk eleg nisalug, At Ninowe Yesus Kristus ninapeleg wilil, niren dag suruk atukukon epmano sohorep isalug at apma ninombisahukon etno weheg eleg-at welamuhuk-o.

¹⁰ Ari halug nomini-o, nintul nantul At Allahen-at wol ninaptisireg fuloko ninombisaharisi-o, ulug hinahla ebetuk amuhup-o. Ebetuk amuhupseg, hit bule ambulug wataruk etno hag wateheg eleg wilil, At Allah weregma kuruk amuhupseg, At Yesus Kristus udaki atlug mondog hinim welamuhup-o.

¹¹ Yi wene di wene yig hisihion epmano obog hiniluk weregma, an ninim nintul nantul dahagsoho yig hisaruk amuhuk-o.

¹² Eke an nebe niluk wilil, yi wene di wene etno obog hinindi ebebukag ulug yig hisa fano bihi-o.

^13-14 Yig hisa fano bihion oke, At Nowe Yesus Kristusen bilin yig nepag etno hag, horog kidia nebe wararuhuk-o.

¹⁵ Nebe fobik wararuhuk ari famen yi wene di wene yig hisarikikon epmano hinindimu ebebukag ulug kidia-at yig hisa fano ulug nahla buruk ahi-o.

At Yesusen sukfuganggeroho surukmu harukuk-o ulug yig isebahon wene 1:16-21

¹⁶ Ari halug nomini-o, At Ninowe Yesus Kristus oag werehon waruhu ulug, yig hisaruk ahi etno yi wene di wene inenggal urukon epmano mutlug lawag ulug yig hisaruk ahi fug-o. Nit ninilanggen At Yesus sukfuganggeroho surukmu harukuk-o.

¹⁷ Eke At Allahen une oag weregsoho Yesus yig ituk wilil, “An Namloho nindi hunduhukon du nahien hiyihi-o,” ulug yig itukmu ninesanggo holtukuk-o.

¹⁸ Eke misig, nit ninim wilil dom etno fam weregma, At Yesus suontepfuruk atisimu, ninesanggo holtukuk-o.

¹⁹ Ariroho holtuk atukukseg, it nabien bilin hurumbik ebahon epmano ninindimu waruk ahe-o. Ninindimu waruk nisalug, hit ariroho-at waruk amuk-o. It nabi aben hurumbik ebahon epmano o seleg suon neken weregma, o hikmu seleg atuk etno ilitoho hinindimu selehap hinaptuk-o.

²⁰ Selehap ninaptukon oke, ninonggarehen hurumbik ebahon etno fanoroho holtuk ahe fug-o.

²¹ It bilin hurumbik ebag etno iren ebag fug-o, At Roh Kudusen Allah une yig isarukmu, hurumbik etno ebag-o.