2 Korintus 9 - Allah Wene Hurumbik Keron

Hit it hinomini Allah udaki epmano yalmag inaptuk amag ulug og isaruk amuk-o ulug yig isebahon wene 9:1-15

¹ Eke it Allah udaki o Yudea werehon epmano yalmag inabukag ulug anden holal bal hisao ari hai-o.

² Hiren hag yalmag inabuog ulug suruk ahep ari an niluk-o. Eke alem ari fam anden hit suontep hisahiog ulug it Makedonia aphe epmano yig isaruk wilil, “It Akhaya aphe hag tahun lindi fam arat yalmag inabuog ulug surusa-o,” ulug ariroho yig isarikikseg fam, hiren suruk ahebon epmano inesanggo holtusareg, it obohen nit ariroho yalmag inabuhuk at-o, ulug urusa.

³ Eke anden alem ari fam suontep hisaharikikon etno alem eleg heheg ihi ha nowen ulug, it ninomini epma hinambeg lahap isa wahi-o. Eke anden irikik etno hag hit dulum yalmag inabuhuben ulug nahla buruk ahi-o.

⁴ Eke it Makedonia aphe epmano ninim hinambeg waharuk amuhukseg, hit yalmag inaptuk elegma niren ninilanggen hisahuk ari hai-o. Eke niren it demat yalmag inabuhup ulug suontep hisaharukukon oke, hiren ariroho suruk eleg welatlepma, nit ninenggali anggolo holo-o. Eke hit ariroho-at hinenggali anggolo helep-o, ulug ariroho nahla buruk wilil,

⁵ it ninomini du hag bilin hinambeg lahap isahuk fano ulug nahla birikik-o. Eke an fobik inombolim wariog ulug suruk neyeheg, hiren yi angge di angge og isahuken ulug abug irikibon epmano heako umburukmu, iren dig dug seko umburuk amuog ulug wamuhup-o. Ariroho arat umburuk isalug, hinobabut dahon ulug yig hisahuk fug, we hinindien-at imbirikip ulug yig hisahuk-o.

⁶ Ari halug, wene misig du hinindi eberiek-o, ap i dorat yatukon halug, anggen dorat balsahu-o. Eke ap i anggolo yatukon halug, anggen anggolo-at balsahu-o, ulug wene ari wereg heheg, hiren duroho umbuhuk ulug hinonggareg hinahla buruk ahebon etno ilitoho-at umbuhup-o.

⁷ Eke nulug imbirikik ulug hinindi dag aheg, eke it ninen ariroho imbin ulug yig nitusa famen keroho imbirikik ulug hinahla beheg suk fug-o. It inobabut fanowon halug At Allahen indi hunduhuk wereg-o.

⁸ Eke hit yi angge di angge hinindi buruk ahebon epmano At Allahen obam seberoho og hisiog ulug iluk wereg-o. Eke hit hag yi angge di angge ilitoho wilil, it nin sumbut isaruk amag ulug obam seberoho og hisahu at-o.

⁹ Eke Alkitab etno fam yig nisaruk wilil, “Aren it inaharek elehon epmano suroho-at og isarisi. Eke Aren ahmu isarukon epmano itog mondog-at welaruhu-o.”

¹⁰ Eke At Allahen at i yatukon etno i angge og ereheg, eke at ebe narukon etno aharom ebe og ereheg suruk-o. Eke hiren i yabukag ulug i angge anggolo og hiseheg, eke hinindien menag isaruk amon etno anggen og hiseheg,

¹¹ eke nintul nantul hinaharek sumbut isawag ulug hinaharek og hiseheg suhu-o. Eke ari halug, niren og isawon etno fam iren Allah wa ulug yig ituk amuhup-o.

¹² Eke hit hinindien At Allah udaki yi angge di angge elehon epmano og isaruk hisalug, iren nintul nantul Allah wa ulug uruk amuhup-o.

¹³ Eke hiren ariroho og isaruk amuhup etno fam iren hinaren balepfulug uruk wilil, it du At Kristus awene fanowon etno eberoko waruk ahe ulug inune uruk wilil ilitoho suruk du fam niren Allah wa ulug hinuk suontepfuruk ahe-o. Eke iren nit inim, it aphe obog inim sumburoko og nisaruk ari fam wa ulug urukmu isahup-o.

¹⁴ Eke At Allah ahien anggolo hinobam embebareg fam, it epmanowen hinebe inindi hunduhuk wilil hinake sembahyang uruk amuhup-o.

¹⁵ Eke At Allahen yi angge di angge anggolo og nisarukon oke, niren onggo hai atuk etno fam wa ulug yig ituk amuk-o.