2 Korintus 2 - Allah Wene Hurumbik Keron

¹ Eke ari halug, an nahla buruk wilil, “It inindi dahap sihi ha nowen an misihim inambeg lahuk fug,” ulug nahla birikik-o.

² Eke anden hit hinindi dahap selemen, it sandehen an nahien hawag ulug selep-o? Eke it anden inindi dahap seleon epmanowen-at an nahien hawag ulug suk inahla belep-o, ulug alem ari fam holal misig etno bal hisarikik-o. Eke hit an nahien hawag ulug suruk amuhubon epmano hinindi dahap siog ulug hinambeg wam namberaken bok welatikik-o.

³ Eke an nahien haruk nealug, hit obog hinahien haruk ahep etno demat ulug nahla buruk ahi-o.

⁴ Eke anden bilin holal etno bal hisaruk wilil, nindi mondog dag aheg, eke ioba anggolo yareheg suruk wilil, bal hisarikik-o. Eke hit hinindi dahap siog ulug bal hisarikik fug-o. Anden hit obog nindi hunduhuk welahion etno hiniluk amag ulug bal hisarikik-o.

At ap dag sirision etno obam apelegsoho hinapma imbiuk-o ulug yig isebahon wene 2:5-11

⁵ Eke at misihen inindi dahap sirision etno an nindi dahap sirisi fug-o. We hit-at hinindi dahap sirisi-o. Eke an nune mondog winimugsoho yig um namberaken, hit nin hinindi dahap sirisi ulug yig hisaruk ahi-o.

⁶ Eke hit obohen ap etno onggo umbukag ulug yig itikipmu imbirisireg fam, kidia arat ehep-o.

⁷ Eke ari halug, at dag sirision etno obam apelegsoho hinapma imbiuk-o. Ariroho wilil, at ap etno indi mondog dag am nowen ulug indi wereg amagsoho hinune fanoroho yig ituk amuk-o.

⁸ Ariroho suruk hisalug, at etnowen, demat inindi nobam hunduhuk wereg-o, ulug ahla buruk amag ulug hiren suruk amon yig hisihi-o.

⁹ Eke alem du fam holal etno bal hisarikik-o. Eke hit hag nintul nantul an nune ilitoho-at suruk ano? ulug hinaren baliog ulug holal etno bal hisarikik-o.

¹⁰ Eke hiren ap misig dag sirision etno sohorep isalug, obam apelegsoho hinapma umburuk hisalug, anden arat obam apelegsoho napma imbirikik-o. Eke obam apelegsoho napma imbirikik ihi ari, At Kristus il fam hit hinake-at napma imbirikik-o.

¹¹ Eke at iblis etnowen seberep nisahuk nowen ulug, at ap etnowen dag sirision etno sohorep isalug, obam apelegsoho napma imbirikik-o. Eke at iblisen ariroho sik ulug ahla burukon etno niniluk-at-o.

At Paulus etno o Troas wilil indimu seneni ebetuk apahon wene 2:12-13

¹² Eke an hag o Troas epma Kristus awene fanowon etno yig isiog ulug arat larikikseg wilil, At Ninowe etnowen it etno wene inesanggo holukag ulug inindi fam sok husirisimu, harikik-o.

¹³ Ariroho harikikon oke, at ninomin Titus etno o epma ebe eleg harikikseg, nindi seneni anggolo ebetikik-o. Ariroho ebetuk atikikseg, it aphe epmon obog heahi warep isalug, o Makedonia etno waharikik-o.

Allah wene motoho yig isaruk ahi-o ulug yig isebahon wene 2:14-17

¹⁴ Eke At Allah wa ulug yig imuk-o. Nit At Kristus ninim wereg nisalug, At Allahen At Kristus suontepfuruk etno hag, nit At mutlug laruk aheon epmano ariroho-at suontep nisaharuk-o. Eke amben fanowon misig halug, it apheyen amben baltuk etno hag, At Kristus awene fanowon etno it obohen iniluk amag ulug At Allahen lahap nisaharuk-o.

^15-16 Eke kemenyan etno hondok yalepfurukmu amben fanowon haruk etno hag, At Kristus awene fanowon etno yig isawag ulug lahap nisarukmu, At Allahen ilanggen nisaruk-o. Eke it aphe nin amben dahon misig etno halug, waratuk etno hag, it aphe nin o dagma lahubon epmanowen Allah wene inesanggo holtuk oke, inindimuen ninambit buruk wilil, inili holaruk eleg etno fam waratuk-o. Eke it aphe nin amben fanowon misig halug, inahien suruk etno hag, it aphe nin o fanoma lahubon epmanowen Allah wene inindimuen eberoko waruk ari fam inili holaruk-o. Eke ari halug, Allah wene yig isawon etno at sen iluk wereg-o?

¹⁷ Eke it nin epmanowen Allah wene yuhun-at inenggal neken yig isaruk etno hag suruk eleg wilil, nit ninebe At Allahen mondep nisahabahon etno At Kristus anggimbu atukukseg, At Allah il fam wilil, Aren yig nisaruk etno hag motoho yig isaruk ahe-o.