2 Korintus 13 - Allah Wene Hurumbik KeronHolal etno atog arat bal isaruk apareg heahi war inapahon wene 13:1-13 1 Ari halug, eke kidia an ninggik henahanam bik hisa wariog ulug suruk ahi-o. Eke it ap biren henahanen alem ari wereg ulug uruk isalug, demat ulug ninahla buruk ahe-o, ulug holal baleg etno fam yig nisaruk-o. 2 Eke bilin ninggik birenam ninim wilil yig hisarikikon etno kidia nebe yatma wilil oke, misihim inim dahagsoho yig hisamin-o. Ariroho yig hisamin ari, hit obog inim, eke hit bilin dag sirikibon epmano inim obog-at yig hisamin-o. Ari halug, an nebe fobik hinambeg waruhukseg, nune wiogsoho yig hisahuk fug-o. 3 Eke hiren at Paulus du Kristusen yig itukmu uruk ano ulug hit hiniluk amuhuken ulug hinog waruk ahep ari fobik hiniluk aruhu-o. Eke At Kristus etno hit hinahla epma wilil oag elegsoho suruk eleg-o, at mondog oag weregsoho-at suruk-o. 4 Eke At ebe oag elehon neken e fam lenggaloko embebagma warapahon oke, At Allahen oag werehon etno-at og epagma, ebe iluk wereg-o. Eke nit At Kristus ninim wilil, At il fam ninoag elehon-at oke, eke fobik hit hineyabuk suruk nisalug, At Allahen oag werehon etno og nisaruk aruhumu, At Kristus ninim niniluk-at welamuhuk-o. 5 Eke hit hag, nit demat Yesus obam ebetuk ahe ano ulug hinonggarehen hinahla buruk wilil, hinaren bal saruk amuk-o. Eke hit hinobabut dag suruk eleg hisalug, At Kristus Yesus hinindimu wereg etno hit hinapelehen suruk ahep ano? 6 Eke hiren at Paulus demat ninesanggo watisi ulug hinahla ebebukag ulug yig hisihi-o. 7 Eke hiren dag suk nowen ulug At Allah obam sembahyang uruk ahi-o. Eke hiren at Paulus hag demat irisi ulug hinahla bukag ulug uruk ahi fug-o. Eke hiren at Paulus demat irisi ulug uhup fug halug, ari fano at-o. We hit hag fanoroho suruk amag ulug yig hisaruk ahi-o. 8 Eke At Allahen demat surukon etno niren olohot baluk ari mondog ninoag eleg-o. Eke Aren demat surukon etno ilitoho seg amag ulug ninim yabuk sukon etno hag ninoag wereg-o. 9 Eke nit hag ninoag eleg, hit hag hinoag wereg halug, ari ninahien haruk ahe-o. Eke hit hag mondog hinindi oag wereg amag ulug hinake sembahyang uruk ahe-o. 10 Eke hit ariroho hinobabut fano mondog welamag ulug an nebe yatma wilil oke, holal du bal hisihi-o. Eke hit hinebe seberep hisahukon etno sohorep isalug, hinindi oag werehep hisahukag ulug At Allahen minduhup naharision oke, anden noag weregsoho winimug hisihi ha nowen ulug holal du bilin bal hisaruk ahi-o. 11 Ari halug, nomini, hit hinahien haruk wilil, hinindi oag wereg amag ulug suruk amuk-o. Ariroho suruk wilil, an nune yig hisihion etno hinesanggo holiuk-o, holtuk wilil, hit fikfag dambuksoho welamuk-o. Eke ari halug, At Allah indi hunduhuk wilil, dambuk ninaptukon etno hinim welamuhup-o. 12 Ari halug, hit hinomini hinim heahi war war uruk amuk-o. Eke it Allah udaki dumen ariroho-at heahi war hinaptuk-o. 13 Eke At Ninowe Yesus Kristus etnowen hinabua hiseheg, eke At Allahen hinebe ahmu hiseheg, eke At Roh Kudus etno hinim welaheg suruk amag ulug yig hisehe-o. |
LAI 2006
Indonesian Bible Society