2 Korintus 10 - Allah Wene Hurumbik Keron

At Paulusen wene yig hisa waharikik etno an at-o ulug yig isebabon wene 10:1-18

¹ Eke an Paulusen wene misig yig hisamin-o. It ap ninen an nabug uruk wilil, at Paulus etno hinim wilil une wiogsoho-at yig hisarukon oke, ebe yatma wilil une winimugsoho-at yig hisaruk-o, ulug ariroho nabug urukon oke, At Kristus obabut fanoroho wilil yig isaruk apag etno hag, yig hisaruk ahi-o.

² Ari halug, an nebe fobik bik hisa waharuk aruhukmu, anden nune winimugsoho yig hisawag ulug suk fug-o. Eke it aphe ninen, “At Paulus etno it ap kweanmonen dahan fahan suruk etno hag suruk-o,” ulug urukon ari nune mondog winimugsoho yig isahuk ulug demat yig hisaruk ahi-o.

³ Eke ninebe o kweanma duma wilil oke, wim aptuk amon etno it aphe kweanmon inobabut dahonen suruk etno hag suruk ahe fug-o.

⁴ Eke it wim aptuk wilil inasehen inasega holaruk epmano hag, nit it kweanmonen angge holaruk ahe fuhon oke, At Allahen oag werehon og nisarukon etno hag holaruk ahe-o.

⁵ Eke nit oag werehon og nisarukon etno fam yi angge di angge oag werehon epmano lehet neken mialtuk wilil, inenggal wene urukon epmano sahaloko imbiseheg, eke At Allah ebe niniluksoho welamon seberoho umbuog ulug surukon epmano elegsoho imbiseheg, eke it aphe inahla burukon epmano hele waroko neken imbisalug At Kristus une etno holukag ulug apma imbiseheg suruk ahe-o.

⁶ Eke hit hag hinesanggo fanoroho holtuk amuhupmu, it inesanggo holeg eleg welamuhubon epmano At Allahen onggo ninon-at og hisahu-o, ulug yig isahuk-o.

⁷ Eke hit hag yi angge di angge inahap selemon epmano-at hinilanggen haruk ahep-o. Eke at ap misihen an Kristus amloho-at welahi-o, ulug ahla burukon hinanggelegma epma misig wereg haruk ahep ano? Eke ari halug, onggarehen indi fobik inim ebetaruk amag-o. Eke at ebe Kristus amloho wereg etno hag, nit At Kristus udaki-at welahe-o.

⁸ Eke hit hinebe niren seberep hisahukon etno sohorep isalug, hinindi oag werehep hisahukag ulug At Allahen minduhup nisarisireg fam dot anggolo neken suontepatarukukseg oke, an nenggali haruk ahi fug-o.

⁹ Eke an holal bal hisaruk ahion etno fam hinakoltep hisahiog ulug suruk ahi fug-o.

¹⁰ Eke it ap ninen uruk wilil, “At Paulusen holal og nisaruk wilil, une winimug neken fanggogsoho-at yig nisaruk oke, at ebe ninim wilil oag elehon neken une seberoho yig nisaruk-o,”

¹¹ ulug nabug ariroho urukon ari, ninebe yatma wilil wene ninaholal fam yig hisaruk aheon etno fobik ninebe hinambeg wamuhukseg ninim wilil ilitoho-at hinesanggo wabuhuk-o, ulug inindi ebebukag ulug yig hisaruk ahe-o.

¹² Eke it ninen suontepatarukon etno nit ilitoho suruk ahe ulug uk ari ninakol-o. Eke it ariroho suruk etno urunanggeroho-at suruk-o. Eke it etno ilit walangge ulug iren bilin surukon etno fam ilit saruk-o.

¹³ Ariroho surukon oke, nit hag ninowalangge wereg halug, yuhun-at suontepatahuk fug-o. Eke At Allahen yabuk ariroho siuk ulug nit ninowalangge neken og nisarisireg fam, hit hinindi yabuk suog ulug hinambeg waharukuk-o.

¹⁴ Eke At Kristus awene fanowon etno yig hisa waharuk wilil, nit ninowalangge og nisarision etno seberoho imbisalug waharukuk fug-o.

¹⁵ Eke ari halug, nit ninowalangge etno-at wereg heheg, it ap ninen yabuk suruson epmano farim du niren surukuk ulug suontepataruk ahe fug-o. Eke hit hinanggelegma epmen Allah wene etno su atuk halug, At Allahen ninowalangge og nisarisi etno hag hinanggelegma epmen yabuk suon misig suhuken ulug ninahla buruk ahe-o.

¹⁶ Eke ari halug, wene fano wene etno hit hinambol fil epma yig isa lahuk-o. Ariroho yig isa lahuk ari, ap misihen yabuk sirision etno farim anden sirikik ulug suontepatahuk fug-o.

¹⁷ Eke holal baleg etno fam yig nisaruk wilil, “Ap misihen suontepfiog ulug suruk halug, At Ninowe etno inuk-at suontepfuruk amag-o,” ulug yig nisaruk etno hag, ap misig At Ninoweyen suontepfuruk halug, demat suon wereg-o.

¹⁸ Eke onggarehen suontepatarukon halug, doron neken-at wereg-o.