1 Yohanes 1 - Allah Wene Hurumbik Keron

Wene ninilukep nisaharukon etno du at-o ulug yig isebahon wene 1:1-4

¹ Wene ninilukep nisaharukon etno yanggul hisiog ulug holal du balhisihi-o. Wene ari, o amuken welapahon etno eke kidia ninesanggo holtuk wilil, ninilanggen haruk ahe-o, eke At wene urukon ari ninilanggen harukuk-o, eke At ebe fag harukuk-o.

² Wene etno selegma atisimu harukuk-o. Harukuk halug, kidia uruk ahe-o. Eke hit yig hisarukukon ari, wene niniluk welamon wene etno At Allah Ninikni inim itog mondog welapagma, fobik selegmaroho yig nisebag-o.

³ Eke ninesanggo holtukukon etno hit-at yig hisaruk ahe-o. Eke hit ninim ninomini atlug, Allah ninim eke Amloho Yesus Kristus ninim dambuksoho welahe-o.

⁴ Eke nit obog ninindi ninahien hawag ulug, holal du baltuk ahe-o.

At Allah o seleg etno ilitoho wereg-o ulug yig isebahon wene 1:5-10

⁵ At Yesus Allah Amloho etnowen yig nisarukmu holtukukon etno yig hisaruk ahe-o. At Allah indimu o hik neken elegma, o seleg neken wereg-o.

⁶ Nit halug, Allah ninim dambuksoho welahe-o, ulug uruk aheon oke, o hikmu neken laruk nisalug, ninune fam ninenggal neken uruk wilil, ninindien dagsoho suruk ahe-o.

⁷ At Allah weregsoho o selegma laruk nisalug, ninomini obog ninim dambuksoho welahe-o. Ariroho weregma, eke ninindi dahon At Yesus Allah Amloho amep fam ho ninaptuk-o.

⁸ Eke nit ninindi dahon eleg-o uruk nisalug, ninenggal neken uruk wilil, demat uruk ahe fug-o.

⁹ Eke ai Ninikni, nit ninindi dahon at-o ulug Allah yig ituk nisalug, Aren fano hinabuhuk ulug abug yig nisebag etno ilitoho suhu-o. Aren motoho-at suruk halug, dag surukukon epmano ninapelegsoho apma ninombisahaku-o.

¹⁰ Eke nit ninindi fanowon-at uruk nisalug, At Allah enggal urukon neken uruk wilil, At awene senetuk ahe fug-o.