1 Timotius 3 - Allah Wene Hurumbik Keron

It ap inobabut fanowon epmano aphe yanggul isaruk amag ulug heako imbisebahon wene 3:1-7

¹ Ap misihen an aphe inindi aso welaruhuk, ulug ahla buruk halug, yabuk fanowon-at huliog ulug suruk-o, ulug an demat yig hituk ahi-o.

² Eke it ap aphe inindi aso welamon ari, aphe inune at obam umburuk elehon halug, eke hwe misig-at ohowon halug, eke onggarehen indi aso wereg halug, eke indi seberoho werehon halug, eke fanoroho surukon halug, eke ap huso waharukim fanoroho inim nohorukon halug, eke aphe fanoroho yanggul inaptukon halug,

³ eke ambusu nenek surukon etno naruk elehon halug, eke asine elehon halug, eke indi humbulihon halug, eke indi fanowon halug, eke yikangge aptuk elehon halug, eke yi angge di angge kweanmon nindi ulug heahil sil nuruk elehon halug, it ap aphe inindi aso welamon etno arion-at fuloko imbisawag-o.

⁴ Eke at ap etno udaki fanoroho inaso welamag-o. Eke at ebe alontoho wilil, at udaki apma horiep isaruk amag-o.

⁵ Eke ap misig at udaki inaso welam hai halug, eke Allah udaki epmano keroho inaso welaruhu-o?

⁶ Eke ap keron halug, minduhupfuk fug-o. Onggarehen suontepatahu ari fam, at iblis inuk suontepatebagma, onggo og epahon etno hag, at ap etno ariroho suk nowen-o. Eke ap keron ari minduhupfuk hai-o.

⁷ Ap minduhupfukon etno aren surukon etno fam aphe selemonen at abug baleheg, enggali wareheg suruk elehon welamag-o. Eke bak helema waratuk etno hag, at iblis ahele etno fam anggolop keteroho walug la nowen-o. At ap minduhupfukon etnowen surukon it aphe selemonen dindiltuk wilil, ap ari obabut fanowon-o, ulug uruk isalug, ap etno-at minduhupfuk fano-o.

It ap inobabut fanowon epmano aphe yalmag inaptuk amag ulug heako imbisebahon wene 3:8-13

⁸ Eke it ap yalmag inaptukon ari, it inobabut fanowon halug, eke inune biren eheg eleg misig-at urukon halug, eke ambusu nenek surukon etno naruk elehon halug, eke yi angge di angge kweanmon epmano heahil sil nuruk elehon halug, ap arion-at minduhupfuk fano-o.

⁹ Eke wene heraho welapahon etno demat ulug ninindi ebetuk aheon etno ilitoho obabut fano mondog wilil, demat ulug ahla buruk amag-o.

¹⁰ Eke it ap yalmag inaptukon du bilin inaren balepfulug, bilin dag surukon fam inune inobam umburuk eleg isalug, ap arion-at welamag-o.

¹¹ Eke it inuhwesi ari inobabut fanowon halug, eke inune inenggal uruk elehon halug, eke inindi seberoho werehon halug, eke yi seheg di seheg ininggik ineroho sil nurukon halug, arion-at welamag-o.

¹² Eke it ap yalmag inaptukon ari inuhwesi misig misig ohowon halug, eke at omini, udaki inim fanoroho inaso werehon halug, ap arion-at minduhupfisao fano.

¹³ Eke it yabuk surukon etnowen yabuk mondog fano suruk isalug, fobik it ininuk-at suontepfuhup-o. Eke At Ninowe Yesus Kristus awene demat ulug uruk aheon etno it duen fanoroho yig nisahup, ulug inindi ebetuk amuhup-o.

Eke wene herahowon etno ebe selegmaroho yig isebahon wene 3:14-16

¹⁴ Eke an dulum hea waruhuk ulug nahla buruk ahion oke, dot welatlug-at waruhuk ano ulug an napelehen, yi wene di wene epmano bilin holal baloko hombaharuk ahi-o. Eke hat hebe At Allah udaki hinim sil nuruk wilil, keroho sil nuruk aruhuk-o ulug hiluk amag ulug wene holal du baloko lahap hirik wahi-o. Eke At Allah udaki ari At ibam neken weregma, wene fano wene etno o andorli oag weregsoho belabeg etno ilitoho wereg-o.

¹⁵ At Allah iluk werehon udaki etno ari wene demat urukon etno waruk wilil, o wut oag helep neken aplohok uruk elehon belabeg etno ilitoho wereg-o.

¹⁶ Eke wene herahowon ninindi ebetlug nit obog uruk aheon etno du at-o, At ebe ap kweanmon neken-at selegma apag-o. Eke At Roh Kudus etnowen ap du demat ulug yig epag-o. Eke it malaikat epmanowen inilanggen hebag-o. Eke At awene etno o ahik ya da yig isa wilip apag-o. Eke o ahik ya da it aphe epmanowen At demat-o ulug inahla buruk apag-o. Eke At ebe o selegma anduhunmu epma imbik lahabag-o, ulug ninindi ebetuk ahe-o.