1 Tesalonika 5 - Allah Wene Hurumbik Keron

At Yesus waruhuon etno aso welamuk-o ulug yig isebahon wene 5:1-11

¹ Nomini-o, At o maram waruhu-o ulug yig hisarikikon etno inim, eke mo lahik waharukim waruhu ano, eke mo amburukmu waruhu ano ulug wene yig hisarikikon etno inim holal bal hisao ari hai-o. Hit hiniluk-o.

² At Ninowe wamon etno ap inalomnangge herahuog ulug o hubanggo laruk etno hag hetnogsoho waruhu ulug hit bilin arat hiniluk atisi-o.

³ Eke it aphe epmanowen, ninindi aplohok seheg eleg fano welahe-o, ulug awan uruk iseheg hwe udag ahumlarehon yoho endepmin ulug apeleg yuhun-at sil nurukmu, oloken hinel watuk etno hag, at etno hetnogsoho waharuk wilil, it aphe epmano elegsoho imbisil waruhu-o. Ariroho suruk halug, eke it hite wilip am ari hai aruhu-o.

⁴ Eke ariroho suhu oke, eke hit o hikmu neken welahep fug-o nomini. Eke at ap o aso werehon etno it inalomnangge herahuog ulug kurukim ilanggen yaharoho wereg etno hag, hit yuhun-at weregma, at etno sambit waruhu halug, hinahut lahu fug-o.

⁵ Eke hit obog o seleg udaki welahep-o, o ilingge udaki-at welahep-o. Nit o hubanggo udaki neken welahe fug-o.

⁶ Eke it ap nohorukon etno ilitoho nohoruk am fug-o. Nit noho kunkan seheg eleg wilil aso fanoroho welamuk-o.

⁷ Eke it ap nohorukon ari it o hubanggo-at nohoruk-o. Eke it ambusu etno narukmu nenek surukon ari, o hubanggo-at naruk atlug nenek suruk-o.

⁸ Eke nit o ilingge udaki neken welaheon epmano nit noho kunkan seheg eleg wilil aso fanoroho welamuk-o. Nit ninindimu demat ulug ebetuk wilil, aphe ninindi hunduhuk welahe etno hele sing neken yihik welahe-o. Eke inunggulasum oag werehon wantaruk etno hag nit fano ninabuhu-o ulug ninindi ebetuk aheon ninunggulasum neken-at wantuk-o.

⁹ Eke At Allahen asine nisiog ulug imig ninapag fug-o. At Ninowe Yesus Kristus inuk fam ninili wawon etno holawag ulug imig ninapag-o.

¹⁰ Eke nit ninilukon inim, it waratuson inim At ninim niniluk welamag ulug nit ninake warapag-o.

¹¹ Eke hit suruk ahebon etno ilitoho hinesanggo wataruk wilil, at misihen at misig indi oag werehepfeheg suruk amiek-o.

At Paulusen hit fanoroho welamuk-o ulug heahi war inapahon wene 5:12-28

¹² Nomini-o, eke it ap hineyabuk seheg, eke hit hinindi aso welaheg, eke hinesanggo wareheg suruk amag ulug At Allahen heako minduhup isarision epmano hiniknisi neken it inune hinesanggo holtuk amuk-o.

¹³ Eke hiren it inobam hinindi hunduhuk wilil, iren nit nineyabuk fanoroho suruk-o, ulug ininuk suontepfuruk amiek-o. Eke hit it hinomini hinim fanoroho dambuksoho welamuk-o nomini.

¹⁴ Eke it yabuk seheg eleg yuhun-at sil nurukon epmano inesanggo wareheg, eke it ap inindi angginon epmano inahlahairep iseheg, eke it inindi oag elehon epmano inindi oag werehep iseheg, eke it obog hinune fanowon-at yig iseheg suruk amag ulug yig hisihi-o.

¹⁵ Eke at ap misig dag suruk halug, onggo dahon-at obam embeheg suruk am fug-o. Eke it hinomini inim, it aphe obog inim, nintul nantul fano inabuog ulug suruk amuk-o.

¹⁶ Eke hit nintul nantul hinahien haruk amuk-o.

¹⁷ Eke hit ilikia hupmu sembahyang uruk amuk-o.

¹⁸ Eke dahon hinobam embeheg, fanowon hinobam embeheg suruk halug, nintul nantul Hinikni wa ulug uruk amuk-o. Eke At Yesus Kristus inuk fam nintul nantul wa ulug sembahyang uruk amag ulug At Allahen ariroho siuk ulug yig nisarisi-o.

¹⁹ Eke At Roh Kudus etno nangguksepfuk fug-o.

²⁰ Eke it aben Allah wene yig hisamin ulug demat uruk halug, ninambit uk fug-o.

²¹ Eke yi angge di angge surukon etno obog-at inaren balepfulug fanowon halug seneg welamuk-o.

²² Eke dag surukon halug, yatmaroho hik isaruk amuk-o.

²³ Eke At Allah fanoroho dambuk ninaptukon etnowen hinobabut fanorep hisahaku-o. Eke At Ninowe Yesus Kristus waruhu ari sambit fanoroho welamuhuben ulug At Allahen hinebe inim, hinindi inim, hinahurangge inim fanorep hisahaku-o.

²⁴ Eke At wol hisarision etno demat surukon halug, ilitoho-at suhu-o.

²⁵ Eke hiren ninake sembahyang uruk amuk-o nomini.

²⁶ Eke hinomini obog hiren wahinaniog ulug heahi war inaptuk amuk-o.

²⁷ Eke holal du it ninomini obog inil fam wane sukag ulug, At Ninowe inuk fam nune oag weregsoho yig hisaruk ahi-o.

²⁸ Eke At Ninowe Yesus Kristus etnowen hit obog hinabua hisaruk amag ulug yig hisihi-o.