1 Tesalonika 4 - Allah Wene Hurumbik Keron

At Allah ahien nisawagsoho nit fanoroho welamuk-o ulug yig isebahon wene 4:1-12

¹ Nomini-o, At Allah ahien hisawagsoho hit keroho welamuhup ulug arat yanggul hisarukuk-o. Arat yanggul hisarukukon oke, eke kidia At Ninowe Yesus inuk fam keroho suk ulug hinesanggo watuk wilil, yig hisaruk ahe-o.

² Eke At Ninowe Yesus inuk fam ariroho siuk ulug ninune oag weregsoho yig hisarukukon etno hit hiniluk-o.

³ Eke At Allahen hit hinobabut fanoroho seheg, eke hwe ap uhweon wanggik surukon etno sohorep iseheg suruk amag ulug yig hisaruk-o.

⁴ Eke hit ap hag hinuhwesi oho wilil, nuhwe ninim keroho fano welamuk ulug hiniluksoho welamuk-o.

⁵ Eke it ap Allah wene inapelehon epmanowen inindien yuhun-at suruk etno hag, hit ariroho suruk am fug-o.

⁶ Eke ari halug hinominien angge herahapateheg, eke hinalomnangge weheg, suruk am fug-o. Eke it ap dag surukon ari At Allahen onggo dahon etno inobam umbuhu-o, ulug bilin hinesanggo watuk wilil yig hisarukukon etno-at dahagsoho yig hisaruk ahe-o.

⁷ Eke At Allahen yi dag di dag suruk amag ulug wol hinaptisi fug-o. Aren hinobabut fanoroho suruk amag ulug wol hinaptisi-o.

⁸ Eke ap misihen wene ebe yig hiseheon etno seberoho umburuk halug, ap inune seberoho umburuk eleg-o. At ap ari At Roh Kudus og nisarukon etno une-at seberoho umburuk-o.

⁹ Eke anden hinomini hinim fanoroho hinindi hunduhuk welamuk ulug yig hisao ari hai-o. At Allahen hit hinomini hinim fanoroho hinindi hunduhuk welamuk ulug yanggul hisarisi-o.

¹⁰ Eke Aren yanggul hisarision etno hiniluk wilil, it hinomini o Makedonia werehon epmano obog hinindi hunduhuk welahep ari fano neken welahep oke, fobik inim obam seberoho sukag ulug yig hisaruk ahe-o nomini.

¹¹ Eke hinaplohok elegsoho bok welaheg, eke wene hiren angge etno-at eheg, eke hininggiken hineyabuk holeheg suruk amag ulug yig hisarukukon etno kidia dahagsoho yig hisaruk ahe-o.

¹² Eke hiren ariroho suruk hiseheg, it Allah wene inapelehon epmanowen inil hisaruk amuhupseg, it ap du fano-at suruk-o ulug inahla buhup-o. Eke hit yi angge di angge eleg halug, iren og hisa nowen ulug hininggiken hineyabuk holaruk amiek-o.

Fobik At Ninowe etno waruhu-o ulug yig isebahon wene 4:13-18

¹³ Nomini-o, it hinomini waratuson epmano keroho wereg ulug hiniluk amagsoho yig hisul-o. Eke it aphe ninen, it warehon minamuhup fug-o, ulug inahla buruk wilil inindi dag atuk etno hag, hit ariroho dag am nowen ulug yig hisul-o.

¹⁴ Eke niren, At Yesus waratuk apareg, fobik iluksoho minapag, ulug ninindi ebetuk ahe etno hag, it At Yesus obam ebetuk wilil, waratuson etno fobik At Allahen Yesus inim og inaplug waruhu-o, ulug ninindi ebetuk ahe-o.

¹⁵ Eke At Ninowe etnowen yanggul nisebahon etno yig hisul-o, eke ari halug, At Ninowe waruhu etno sambit nit ninilukon bilin og ninabeheg, eke it waratuson fobik og inabeheg suhu fug-o.

¹⁶ Eke aren duroho suhu-o, at malaikat inowe etnowen une suon uruk aruhumu, eke Allah ambinggon etno une uruk heheg, At Ninowe etno ambik waruhu-o. Ambik waharuk aruhureg, it At Kristus obam ebetuk wilil waratuson etno bilin iniluksoho minduhup isahu-o.

¹⁷ Minduhup isaruk aruhureg, eke o ari sambit nit ninilukon etno inim eke it minduhup isahuon etno inim, obog-at balurep nisaharuk aruhureg, og ninaplug hena fam lahakureg, boholmen At Ninowe etno ninim heahi war war uruk amuhukseg, nintul nantul At Ninowe etno ninim welamuhuk-o.

¹⁸ Ninowe etno ninim welamuhuk ulug hinahla buruk wilil, hit hit hinesanggo wataruk amuk-o.