1 Tesalonika 3 - Allah Wene Hurumbik Keron

¹ Ninindi haruk atukukseg, eke fobik kidia it Tesalonika ap etno keroho wereg ulug bik isa luk-o, ulug ninahla buruk atukukseg, ninomin Timotius hinambeg lahapfik waharukuk-o. Lahapfik waharuk atukukseg, nit ninakeleg o Atena welatukuk.

² O epma wilil, at Timotius Kristus awene fanowon yig isil lawon etno ninim Allah yabuk suruk aheon etno lahapfik waharukuk-o. At lahapfik waharukuk ari, it ninen dahon etno hinobam umburukmu, hit hinindi dag atlug, Allah wene etno hinapeleg am nowen ulug at Timotiusen hinindi werehep hisahakeg, Allah wene etno yig hisaruk amag ulug lahapfik waharukuk-o.

³ Eke it ninen dahon etno hinobam umbukag ulug, At Allahen arat hurumbik yig hisarisi-o.

⁴ Eke nit ninebe bilin ninim wilil, dahon etno ninobam umbuhup-o, ulug hurumbik yig hisarukukseg fam, kidia ilitoho dahon hinobam umburuk etno hiniluk-o.

⁵ Eke anden it o Tesalonika epma Allah wene warukon etno keroho waruk ulug nahla buruk wilil, at Timotius etno hinambeg lahapfik waharikik-o. Eke at iblisen hinindi kahalik waharukmu, niren hinindi yabuk surukukon etno eleg atisi ano ulug nahla buruk wilil, at Timotius lahapfik waharikik-o.

⁶ Lahapfik waharuk atikikmu, at Timotius etno hit wereg ambehen iog suhuluk ninambeg waharuk atisireg, it Tesalonika ap epma inindi hunduhuk wilil, Allah wene fano waruk-o, ulug yig nisarisi-o. Eke aren yig nisaruk wilil, “Hit it Tesalonika aben nintul nantul hinobam ebetuk-o. Eke hiren it bik isa lawon hinindi ebetuk ahep etno hag, iren hit bik hisa wamon ebetuk-o,” ulug ariroho yig nisaruk atisireg fam, nit ninahien harukuk-o.

⁷ Eke it ninen dahon epmano ninobam umburuk oke, hit Allah wene fano waruk ahebon epmano ninesanggo holtuk atukukseg, nindi oag wereg atisi-o nomini.

⁸ Eke Allah wene waruk wilil, At Ninowe hinim hinoag weregsoho welahep etno fam ninahien haruk ahe-o.

⁹ Ninahien haruk ahe ari fam, hit farim Allah wa ulug sembahyang uruk ahe-o. Eke hit farim ninahien haruk atukukseg, Allah wa ulug sembahyang ilikia hupmu uruk ahe-o.

¹⁰ Eke ari halug, nit inim-at it Tesalonika ap inambeg mondep nisahakun ano, eke it Tesalonika ap Allah wene iniluk amon etno anggolo og isimin-o, ulug sembahyang uruk ahe-o.

¹¹ Eke At Ninikni Allah inim, At Ninowe Yesus inim nit hit hinambeg wamon ninonggalem yahap nisahukag ulug sembahyang uruk ahe-o.

¹² Eke niren hinobam ninindi hunduhuk welahe etno hag, hinomini hinim hunduhuk welamon etno inim, eke it aphe obog hinim hunduhuk welamon etno inim, At Ninowe etnowen anggolo og hisawag ulug sembahyang uruk ahe-o. Ariroho og hisahu halug, hinindi oag werehep hisahaku-o. Eke ariroho og hisaruk aruhumu, hinobabut fano mondog welamuhup-o. Ariroho wereg hisalug, At Ninowe udaki epmano obog inim waharuk amuhupmu, At Ninikni Allah il fam hit hinindi fano mondog welamuhup-o.