1 Korintus 14 - Allah Wene Hurumbik Keron

At Roh Kudusen ariroho sumbut nisarek-o ulug yig isebahon wene 14:1-25

¹ Eke ari halug, aphe hinim hinindi hunduhuk welamon etno huluog ulug suruk amiek-o. Eke At Roh Kudusen og hisarukon etno hinindi ebetuk wilil, holaruk amiek-o. Eke Allah wene hinindimuen walug yig isaruk amon etno inim mondog hinahientoho holaruk amiek-o.

² Eke at ap misig une akelehon-at yig isarukon ari, it aphe inesanggo holtuk eleg iseheg, At Allah-at yig ituk-o. Ariroho yig ituk wilil, At Roh Kudusen wene herahowon-at yig itukmu yig isarukon oke, it apheyen At une etno inesanggo holtuk eleg-o.

³ Eke at ap Allah wene indimuen walug yig isarukon arien aphe-at yig isaruk wilil, inindi oag wereg amag ulug inesanggo wareheg, eke une fanoroho yig iseheg, suruk-o.

⁴ Eke at ap une akelehon urukon ari at indi-at oag werehepataruk-o. Eke at ap Allah wene indimuen walug yig isarukon ari it Allah udaki obog wene ebe etno yanggul isaruk wilil, inindi oag werehep isaruk-o.

⁵ Eke anden hit obog hinune akelehon-at uruk atlep fano-o, ulug nahla buruk ahion oke, eke Allah wene hinindimuen walug yig isahup ari hag mondog fano nahla buruk ahi-o. Eke at ap misihen it Allah udaki epmano inindi ebebukag ulug une akelehon mirlaloko yig isaruk eleg halug, it inakeleg inune urukon ari doron apmon neken-at wereg-o. Eke Allah wene inindimuen walug yig isarukon ari hag alem suon neken-at wereg-o.

⁶ Eke ari halug, nomini-o. An nebe etno hinambeg watlereg, Allah wene herahowon selegmaroho yig hiseheg, eke alem misig hiniluk amag ulug yig hiseheg eleg, eke Allah wene nindimuen walug yig hiseheg, eke wene yanggul hiseheg suruk eleg wilil, we nune akelehon-at yig hiselemen, hinindi oag werehep hisahale fug-o.

⁷ Eke yi angge di angge ahut elehon une urukon epmano binggon inim, eke kecapi gitar hahon etno inim une lek hondo uruk eleg halug, ap misihen ariroho ehek ulug iluk am buruk ahep ano?

⁸ Eke binggon suon inuk nafiri etno une dahan fahan uruk halug, it ap wim aptukon epmano keroho wim abik lao buruk ahep-o?

⁹ Eke ari hag, hit hinune akelehon-at uruk wilil, une it aphe inesanggo holukon epmano uruk eleg hisalug, iren ariroho ehesa ulug keroho iniluk am buruk ahep-o? Eke hinune akelehon uruk ahep ari, o hiahne une ulug eleg atuk etno hag, fahe eleg atuk-o.

¹⁰ Eke o kweanma duma inunenggut yion dion anggolo wereg oke, it une inilukon epmanowen hag fano inesanggo holtuk-o.

¹¹ Eke it ap ninen inune an napelehon etno uruk isalug, ap du inune holuk fugsoho uruk du kemon-o? ulug nahla buhuk-o. Eke iren an farim, ap du kemon ulug inahla buhup-o.

¹² Eke ari halug, hit Roh Kudusen og hisarukon etno huluog ulug suruk wilil, it Allah udaki epmano inindi werehep isuog ulug suruk amiek-o.

¹³ Eke ap misig inune akelehon uruk halug, ariroho ihi ulug it aphe dindiloko yig isawon etno og nemag ulug sembahyang ukag-o.

¹⁴ Eke an hag inune werlekon fam sembahyang uruk wilil, anden-at sembahyang uruk ahion oke, nahla buruk ahi fug-o.

¹⁵ Eke ari halug, an keroho sik-o? Ari, anden sembahyang uruk wilil, nahla bukon etno-at uruk aruhuk-o. Eke anden di uruk wilil, nahla bukon etno-at uruk aruhuk-o.

¹⁶ Eke hit Roh Kudus hinim wilil, inune werlekon fam wa ulug sembahyang uruk hisalug, it aphe nin inune yion dion inapelehon epmanowen inindimuen inesanggo holtug eleg-at keroho famen uhup-o?

¹⁷ Eke hiren Allah wa ulug fanoroho-at uhubon oke, it nin epmano hag inindi ebebuhup fug-o.

¹⁸ Eke hit nin inune yion dion dorat uruk ahep-o. Eke an hag inune yion dion obog-at niluk atuk ahi ari fam, Allah wa ulug yig ituk ahi-o.

¹⁹ Eke ariroho yig ituk ahion oke, o sembahyang fam it aphe yanggul isiog ulug inune werlekon fam wene yaron yig isao sohorep isalug, we inune inilukon fam wene horohon-at yig isao fano buruk ahi-o.

²⁰ Eke hit hinahla buruk ahebon ari it udag doronen inahla buruk epmano hag hinahla buruk am fug-o, nomini. Eke dag suruk ahebon ari hag sohorep isalug it udag fuangge wereg epmano hag welamuk-o. Eke hinahla buruk ahebon ari hag it ap inanggohon inindi werehonen fanoroho wereg epmano hag welamuk-o.

²¹ Eke at Alkitab etnowen yig nisaruk wilil, “Allahen At udaki yig isarukon etno du at-o, ‘It ap yatmon inune holtuk elehon epmano inune fam An nudaki yig isahuk-o. Ariroho yig isaruk wilil, it inune unggut inapelehon fam yig isahukon oke, it An nudaki epmano inesanggo holuhup fug-o,’ ulug ariroho yig isebahon etno wereg heheg, it Allah wene warukon epmano inune werlekon fam yig isahubon oke, etno fam wene demat ehesa ulug inahla ebebuhup fug-o, eke it Allah wene inapelehon epmano hag inune werlekon fam yig isarukmu, iren wi ulug fog suruk amuhup-o.”

²² Eke Allah wene inindimuen walug une inilukon etno fam yig isaruk halug, it Allah wene warukon epmanowen, demat yig nisehesa, ulug inahla buhubon oke, eke it Allah wene inapelehon epmano hag, wene keroho yig nisehesa, ulug wene ebe inapeleg-at welamuhup-o.

²³ Eke ari halug, hit Allah udaki obog wonggalepfulug hinune akelehon uruk hisalug, ap nin hinune inapelehon epmano inim, Allah wene inapelehon epmano inim kik wamuhupseg, hit obog nenek suruk ahep ulug yig hisahup fug buruk ahep ano?

²⁴ Eke hit obog Allah wene akeleg-at uruk hisalug, ap werlekon Allah wene apelehon misig kik waruhureg, hiren uhubon epmano esanggo holtug, an nebe dag suruk ahion-at-o, ulug ahla buhu-o. Ahla buruk aruhureg, esanggo holuhuon etno fam oag del saruk wilil,

²⁵ aren indimu herako ebetukon epmano selegma atuk aruhureg, ut kunukseg wilil, o duma At Allah ebe demat hinim welahep hisihi-o, ulug At Allah obam sembahyang uhu-o.

Sembahyang uruk wilil motoho suruk amuk-o ulug yig isebahon wene 14:26-40

²⁶ Eke ari halug, hiren uruk amon duroho yig hisamin-o, nomini. Hit sembahyang uog ulug wonggalepfulug, at misihen di misig eheg, eke at misihen wene yanggul iseheg, eke at misihen hurumbik wene yig iseheg, eke at misihen inune akelehon fam yig iseheg, eke at misihen ariroho ehek ulug inune akelehon etno mirlaloko yig iseheg suruk wilil, At Allah udaki epmano inindi oag wereg amag ulug yig isaruk amuk-o.

²⁷ Eke inune akelehon etno fam yig isaruk wilil, hit at misihen eheg, at misihen eheg uruk hisalug, at misihen ariroho ehesa ulug mirlaloko yig isawag-o.

²⁸ Eke ap misihen ariroho ehesa ulug mirlaloko yig isarukon etno ebe eleg halug, sembahyang uruk wilil, hinune akelehon uruk am fug-o; we At Allah hinim-at uruk amuk-o.

²⁹ Eke it Allah wene inindimuen walug yig isarukon epmano, it biren henahanen uruk iseheg, it ninen keroho uruk ulug inesanggo holtuk amag-o.

³⁰ Eke ap misig it Allah udaki inanggelegma horieg weregma, At Allahen wene misig yig ituk halug, at ap wene urukon etno bok amag-o.

³¹ Eke hit obog-at Allah wene hinindimuen walug at misihen eheg, at misihen eheg, yig isaruk amuhup ari fam, it obog iniluk amuhupseg, inindi oag wereg aruhu-o.

³² Eke at misig Allah wene indimuen walug yig isarukon etno onggarehen duroho ik ulug ahla burukon etno-at welamag-o.

³³ Eke At Allahen dahan fahan yuhun-at sembahyang uruk amag ulug wol nisebag fug-o; we fanoroho-at uruk amag ulug wol nisebag-o.

³⁴ Eke it Allah udaki o ahik ya da wereg epmano hag, wene uruk wilil, it hweap hinanggelegma werehon epmano inune eleg-at bok welamag-o. Iren wene uruk am nowen-o. Eke it ariroho seberoho welamag ulug ari it Yahudi aben duroho suruk amuk eke duroho suruk am fug ulug ebahon etno fam yig nisaruk-o.

³⁵ Eke hit hweap ari wene etno keroho ehesa ulug uma wilil-at hinahuni hinog og inabiuk-o. Eke it aphe sembahyang uog ulug o Allah wene uruk ambeg wilil, it hweaben wene yig isao ari hai-o.

³⁶ Eke Allah wene etno hit hinindimuen-at heahalug yig isaruk ahep ano? Eke hit hinakeleg-at yig hisa waharisi ano? Eke hat misihen an Allah wene yig isarukon-at weregma, At Roh Kudusen og nitisi-o,

³⁷ ulug hahla buruk ahenon halug, anden wene holal bal hisihion ari fam At Allahen-at ariroho yig nisarisi ulug hinahla biuk-o.

³⁸ Eke anden wene holal bal hisihion du at misihen wene yig nisarisi du apelehen-at irisi-o, ulug ahla buruk halug, at ap etno apelehon neken yuhun-at welamag-o.

³⁹ Eke ari halug, nomini-o. At Allah wene etno hinindimuen walug yig isahuken ulug hinindimu ebetuk amuk-o. Eke inune akelehon fam urukon ari, hiren ninambit ulug winimug uk fug-o.

⁴⁰ Eke yi angge di angge sembahyang uruk wilil suruk amon epmano fanoroho akeleg huli bal bal suruk amuk-o.