Salmos 91 - New Testament Psalms and Proverbs in Mixtec Magdalena Peñasco

Salmo 91 Ñayii iyo ji'in Su'si ma chi kaku i nuu ndaka ja u'vi ma

¹ Ñayii iyo nuu nda'a iya iyo onde sukun ma, iyo va'a i, te koo i kuanda'vi iya kúu sa'a ndaka ma.

² Kuña'a sa nuu Iya Tátnuni ma: “Maa ni kúu nuu kuu chu'u sa. Maa ni kúu ve'e sa ja núkuiñi vava'a. Maa ni kúu Su'si sa ja kúkanu ini ña'a sa”, kuña'a sa ya.

³ Maa in‑ni ya sa'a ja kuu kaku o nuu yo'o tníi ña'a tachi ma ja ke'en su'va ña'a i ma, ji'in nuu ndaka kue'e ja ka'ni ña'a i ma,

⁴ vaa maa ya kasi ña'a ji'in ndijin ya ma, te chii ndijin ya ma koo va'a‑ka o, chi vaa sa'a ya ndaka ja ni skuiso ya ma, te tnu'u ndaa tnu'u ndija ká'an ya ma, kasi ña'a i ja ma kaki'i ña'a ni‑in ja u'vi ma.

⁵ Masu koyu'u ni ja îyo iyo jakuaa ma, ni a ja u'vi iyo nduu ma,

⁶ ni a kue'e kenda koo ora ne'e xeen ma, xi kue'e yachi ja kenda sava nduu ma, ja ka'ni i ñayii ma, másu nawa sa'a ña'a i.

⁷ Visi mil ñayii na kûu xiñi satni ni ma te uxi mil ñayii xiñi kua'a ni ma, kovaa maa ni chi másu nawa ndo'o ni.

⁸ Yika‑ni ja konde'ya ni, te kuni ni sukan jin ndani'i jin ndatna'a maa ñayii ñatuu ka kandija Su'si ma.

⁹ Ja ni kukanu ini ni Su'si iyo onde sukun ma, ja maa ya kúu nuu kuu chu'u ni ma, nuu koo va'a ni ma,

¹⁰ te ni a in ja u'vi kenda nuu iyo ni a, te ni a in kue'e masu kenda ve'e ni ma,

¹¹ vaa maa ya tetniñu ángel ya ma, ja jin ko koto ña'a i ndeva'a‑ni ichi kua'an ichi vee ni ma.

¹² Te jin kotnii i nda'a ni ma, sukan‑va'a ma jaku'un ja'a ni a in yuu te nduva ni.

¹³ Kuu kaka ni ne'un kiti xeen ma, ne'un kiti kini ma ji'in koo na'nu ma, kovaa masu nawa ndo'o ni.

¹⁴ Sa'a ka'an ya: “Ja kutoo ña'a ñayii kándija ja ká'an o ma, te maa o sa'a ja kaku i nuu ndaka ja u'vi ma. Te sonee sukun o i, vaa jâ ni jini i na in kúu o.

¹⁵ Te nuna ndakune'e ña'a i, te yo'o chi ndakone'e o ja ká'an i ma. Maa o koo ji'in i, te sa'a o ja ya'a i nuu tnundo'o tnuneni ma, te koo xeen jayiñu'u i.

¹⁶ Te sa'a o ja koo sii ini i te koteku i kua'a xeen kivi ñuu ñayivi a, te kuni i ja ndimaa sa'a o ja kaku i nuu ja u'vi ma”, kúu ya ká'an ya.