Salmos 85 - New Testament Psalms and Proverbs in Mixtec Magdalena Peñasco

Salmo 85 Sukan kakan‑ta'vi o nuu Su'si ma ja na kunda'vi ini ña'a ya

¹ Iya Tátnuni, va'a xeen ini ni, te vivii ni sa'a ni ja kuu ñuu ni a, vaa ni ndene'e ni sa'ya tata Jacob ma nuu ni ka yo ndo'o, ni ka yo neni i ma.

² Te ni sakanu ini ni ndaka ja u'vi ni ka yo sa'a, ni ka yo kuu i ma, te ni xnaa ni ndaka kuechi ka ndiso i ma.

³ Te ni ndukuee ini ni, te ni ndiko ini ni ja ni ndakiti ini ni nuu i ma nkuu.

⁴ Ndasava'a ña'a ni, sukan ni ka yo iyo sa onde xi'na‑ka ma, vi Su'si iya sa'a ja jin kaku sa, te ndunaa ni ndaka sukan ni ndakiti ini ni nuu sa ja ka kuu sa ñuu ni ma.

⁵ ¿Xi sukan‑ni ko ndakiti ini ni nuu ndaka sa ni‑kani ni‑jika? ¿Te ndakiti tna ini ni nuu ndaka‑ka sa'ya tata sa ki koo‑ka ma?

⁶ ¿Te ma sa'a ni ja jin koteku sa te jin ko sii ini sa ja ka kuu sa ñayii ñuu ni a?

⁷ Su'si Iya Tátnuni, kaxtnu'u ni sukan nda'vi ini ni a, te chindee ña'a ni ja jin kaku sa nuu ja u'vi ma.

⁸ Koniniso'o sa naxe ka'an Su'si Iya Tátnuni ma, te ja ká'an ya kúu ja jin koo va'a ñayii ka kuu i ñuu ya ma ja ka kuu i ñayii ñatuu‑ka na ja u'vi ka sa'a i ma, sukan‑va'a máko jin ndakokuiñi i ja jin ndasa'a neé jin ndasa'a uun‑ka i.

⁹ Ja ndaa ndija kúu ja nde o yu'u Su'si ma chi iyo yatni ya ja sa'a ya ja kaku o nuu ja u'vi ma, sukan‑va'a koo jayiñu'u ya ñuu nuu ka iyo o ya.

¹⁰ Tnu'u nda'vi ini ma ji'in tnu'u ndaa ma, ni ka ndatna'a i. Tnu'u va'a tnu'u ndaa ma ji'in tnu'u kuee ma, ni ka ketna'a ini i.

¹¹ Tnu'u ndaa tnu'u ndija ma ni kenda ni‑ka'nu ñuu ñayivi a, te Su'si iya sa'a ja va'a ja ndaa ma, onde andivi ma nde'ya ña'a ya.

¹² Te Iya Tátnuni ma sa'a ja jin nduva'a ñu'ú o a, te jin kuu nawa jin saka o ma.

¹³ Te tnu'u va'a tnu'u ndaa ya ma koxtnuu nuu ya ma kii i nuu ka iyo o ya, te jin kondikin o, te sukan, te jin kuni o ichi jin kaka o ma.