Salmos 76 - New Testament Psalms and Proverbs in Mixtec Magdalena Peñasco

Salmo 76 Su'si ma chi masu na in kundee nuu ya

¹ Ndaka ñayii ñuu Judá ma chi ka jini i Su'si o a. Te ñayii ñuu Israel ma chi ka ndachiñu'u i ya.

² Te veñu'u nuu ka ndachiñu'u i ya ma kátuu nuu yuku nani Sion ma ja iyo i ñuu Jerusalén ma.

³ Te yukan ni sa'a ya ja ni ka tna'nu tna'a ja ka jasi i maa i ma sukan‑va'a ñatuu nawa kaki'i ña'a ma, ji'in yuchi ka kuu espada ma, ji'in flecha ma, ji'in ndaka‑ka ja ka jatniñu i ja ka kanaa i ma. Sukan ni ja'nu ya ndaka.

⁴ Vivii kúu ni, vi Su'si, te iyo kua'a‑ka jayiñu'u ni sana yuku na'nu ma ja vivii ka ndaa i ma.

⁵ Ñayii inundee ini ma, ni ka skenaa i maa i. Suni ñayii ka neva'a tnu'u ndee tnu'u ndatnu ma, masu nawa ni kuu jin sa'a ndaka i. Ni ka kixi i, te ni masu jin ndoto‑ka i.

⁶ Su'si iya ni yo kukanu ini tee ni yo kuu Jacob ma, nú maa ni na sunkani tee yoso caballu ma ja masu nawa sa'a‑ka de ma, te caballu ñú'u carreta ma, masu nawa kuu sa'a ti ja chíndee ti de ma.

⁷ Kovaa nuna ndákiti ini ni ma, chi masu na in kundee ja konukuiñi i nuu ni a. Vaa Su'si iya ndákan kuenda kúu ni, te chukan kúu ja jin koyu'u ña'a sa.

⁸ Onde andivi ma iyo ni, te ká'an ni naxe jin ndo'o jin neni ñayii ma, nú ma jin kandija i ja tátnuni ni ma. Te onde ñu'ú ya ni ka nduu nañii i ja ka yu'u i ja ká'an ni ma

⁹ ora ndokuiñi ni ja ndakan ni kuenda nuu ñayii ñuu ñayivi a, vi Su'si, te sa'a ni ja jin kaku ñayii ka ndaa kuee ini ma.

¹⁰ Ja ndaa ndija kúu ja ora ndákiti ini ñayii ma nuu ni ma chi su'va ndáni'i ni jayiñu'u, vi Su'si. Te visi ka ndakiti xeen ini i nuu ni ma, kovaa másu jin kundee i, vaa maa ni kúu Iya Tátnuni.

¹¹ Jín skuiso o nawa jín ndakua'a o nuu Su'si iya tátnuni nuu o a, te ndaka o ja ka iyo yatni o nuu iyo Su'si iya ndakan ndaa kuenda nuu ndi‑in ndi‑in o ma, jín kinda'a o nawa jin ndakua'a o ya.

¹² Te maa ya xnaa ndaka sa'ya tee ka netniñu ma ja ñatuu ka sa'a de sukan kúni ya ma, te sukan, te jin koyu'u de ja ka kuu de rey ka tatnuni ñuu ñayivi a.