Salmos 70 - New Testament Psalms and Proverbs in Mixtec Magdalena Peñasco

Salmo 70 Sukan kakan‑ta'vi o nuu Su'si ma ja na kii kunu ya ki chindee ña'a ya

¹ Su'si, jikan‑ta'vi xeen sa nuu ni ja chindee ña'a ni. Ne'e kunu ni, ki chindee ña'a ni, vi Su'si.

² Ndaka ñayii ka ndanduku ña'a ja jin xnaa ña'a i saña ma, na jin ndakokuiñi i te jín ndakukan‑nuu maa i. Te ndaka ñayii ka kuni ja jin sa'a ña'a i ja u'vi ma, su'va maa i jín ndatna'a ja kan‑nuu ja jin ndajakundee ña'a ñayii ma.

³ Ndaka ñayii ka jakundendee ña'a saña ma, te na jin ndakakayata maa i jín nu koo i, te jín ndatna'a maa i ja kan‑nuu, vaa masu nde ni ka kundee i ja ka ñu'u ini i ma.

⁴ Kovaa ndaka ñayii ka ndanduku ña'a i ndijin ma, vi Su'si, chi jin koo sii ini xen‑xeen i. Te ndaka ñayii ka kuni ja sa'a ni ja jin kaku i nuu ja u'vi ma, ndimaa jin ka'an i: “Su'si o a, iya ka'nu xeen kúu ya”, jin ka'an i.

⁵ Te saña ja kúnda'vi kúkee sa te ndó'o néni sa a, ne'e kunu ni, ki chindee ña'a ni, vi Su'si. Maa ni kúu iya chindee ña'a, te sa'a ni ja kaku sa nuu ja u'vi ma. Máko ko kukuee ni ja ki chindee ña'a ni, Su'si iya tátnuni nuu sa.