Salmos 62 - New Testament Psalms and Proverbs in Mixtec Magdalena Peñasco

Salmo 62 Nuu maa in‑ni Su'si ma kúu nuu kuu kaku o

¹ Nuu Su'si ma kúu nuu kuu ndatatu ini anua sa ya, te maa ya sa'a ja kaku sa nuu ja u'vi ma.

² Vaa maa in‑ni ya kúu toto nuu kuu kaku sa ma. Maa ya kúu nuu kuu chu'u sa ma, te ma kotuu sa.

³ Ndijin ja ka kuni u'vi ni nuu sa ma, ja ka kuni ni ja jin xtuu ña'a ni te jin xnaa ña'a ni, te jin sa'a ña'a ni sukan kúu in yika ve'e ja núkuiñi xiñi i te sani te kotuu i te ndi'i i ndatnana ma.

⁴ Vaa ûni ka jani ini ni ja jin xtuu ña'a ni, te ka jatna ini xeen ni ja jin xnda'vi ni ñayii ma. Ñií yu'u ni a‑ni iyo ja ka ka'an vii ka ka'an va'a ni ja jin kuu ñayii ma, kovaa ini anua ni a chi ka kuni u'vi ni nuu ñayii ma.

⁵ Kovaa saña chi nuu Su'si ma‑ni kúu nuu kuu ndatatu ini anua sa ya, vaa nuu maa ya kúkanu ini sa.

⁶ Vaa maa ya kúu toto nuu kuu kaku sa ma. Te maa ya kúu nuu kuu chu'u sa ma, te ma kotuu kuiti sa.

⁷ Vaa nuu maa Su'si ma kúu nuu kuu kaku sa te koo jayiñu'u sa. Vaa maa Su'si ma kúu toto nuu kuu koxtnee va'a sa te kaku sa.

⁸ Ndaka ni ja ka kuu ni ñuu Su'si ma, nuu maa in‑ni ya jin kukanu ini ni ni‑kani ni‑jika, te ni‑yu'u ni‑ini ni jin kukanu ini ni ya, vaa maa ya kúu nuu kuu jin kaku o.

⁹ Ja ndaa kúu ja ndaka sa'ya tata ñayii ma, ñatuu ka kandija i Su'si ma, te masu nawa ka kuu i‑ni chi sukan ka kuu in ja jani ini o ma te ni ya'a ma, sukan‑ni ka kuu i, ka kuu i ñayii xiku, ka kuu i ñayii nda'vi. Nuna chikua'a ña'a Su'si ma in in i ma chi kuenda tnu'u in mi'i‑ni ka kuu nduu jichi i ma nuu ya ma.

¹⁰ Máko kukanu ini ni ja onde sa'a ndeva'a ni ñayii ma sana ni'i ni nawa kúni ni ma, ni a sakui'na ni sana kuxiku ni. Te nú ve kuxiku ni ma, máko kukanu ini ni xu'un ni ma.

¹¹ Vaa in jichi ni ka'an Su'si ma, te uu jichi ni jiniso'o sa cha'a, ja nuu maa Su'si ma iyo ndaka tnu'u ndee tnu'u ndatnu ma.

¹² Saa vi, Su'si, nuu maa ni iyo tnu'u nda'vi ini ma, te maa ni ndakan kuenda nuu ndi‑in ndi‑in ñayii ma nawa ni ka yo sa'a, ni ka yo kuu i ma, te ndakua'a ni i nawa iyo ja jin ndani'i ndi‑in ndi‑in i ma.