Salmos 60 - New Testament Psalms and Proverbs in Mixtec Magdalena Peñasco

Salmo 60 Sukan kukanu ini o nuu Su'si ma ja maa in‑ni ya chindee ña'a te kaku o nuu ñayii kúni ja sa‑u'vi ña'a i ma

¹ Su'si maa sa, ni ndakiti ini ni nuu sa, te ni skendoo ña'a ni, te ni xndo'o, ni xneni ña'a ni nkuu. Kovaa vitna, ne'e ni, te ndachindee ña'a ni.

² Ni sa'a ni ja ni tnaa nuu ñu'ú ya, te ni ndata. Ndakasi ni nuu ni ka ndata ma, sukan‑va'a máko jin kekaa‑ka.

³ Ni sa'a ni ja ñayii ñuu ni a, ni ka jini i kua'a xeen tnundo'o tnuneni kuenda tnu'u ja ni sa'a ni ja ni ka ji'i sa ndute nde'ya uva masu va'a ma, ja ni sa'a ja ka kuneé ka ku‑uun‑nka sa ya.

⁴ Kovaa ñayii ka yu'u ja ndakan ni kuenda nuu i ma chi ni‑in ja u'vi ka sa'a i. Te ni wa'a ni in sa'ma, te ka ndone'e sukun i, ja kuni ka'an ja iyo ni ji'in i.

⁵ Skuili ni nda'a kua'a ni a, te sa'a ni ja jin kaku sa, vaa kútoo ña'a ni, vi Su'si. Te niniso'o ni ja ka ka'an sa ya.

⁶ Onde nuu iyo ni a, vi Su'si, te sa'a ká'an ni: “Saña chi ndusii ini xeen sa, te ndaka'nde sa ñuu Siquem ma, te chikua'a va'a sa ndu'va Sucot ma.

⁷ Vaa kuenda maa sa kúu ñuu Galaad ma ji'in ñuu Manasés ma. Te Efraín ma kúu ja ñu'u xini sa a ja ndesi i, te Judá ma kúu bastón yinda'a sa ja tátnuni sa ya.

⁸ Te Moab ma kúu nuu ñu'u ndute ndanda'a sa, te siki Edom ma kúu nuu sónee sa ja yi'i ja'a sa ya, te ûni káyu'u sa ja ni ndusii ini sa ja ni kundee sa nuu ñayii ñuu Filistea ma”, kúu ni ká'an ni.

⁹ ¿Na in ki'in jin xsia'a ña'a i ñuu nuu ndesi va'a ma? ¿Te na in jin xsia'a ña'a onde ñuu Edom ma?

¹⁰ Te kuiti maa ni, vi Su'si, vaa masu na in‑ka. Visi ni xndoo ña'a ni ma, te ñatuu ni yo kenda ni ja chindee ña'a ni nuu ni ka yo kanaa sa ji'in in‑ka ñuu ma,

¹¹ kovaa vitna, te ndachindee ña'a ni ja na jin kaku sa nuu ñayii ñatuu ka kunimani nuu sa ma. Vaa ja ka chindee ña'a ñayii ma chi masu nde chíndee xeen ña'a i.

¹² Kovaa nú maa ni na chindee ña'a, vi Su'si, chi kua'a xen‑xeen ja kuu jin sa'a sa, vaa maa ni kueñu ndoso ñayii ñatuu ka kunimani nuu sa ma, te jin kundee sa.