Salmos 54 - New Testament Psalms and Proverbs in Mixtec Magdalena Peñasco

Salmo 54 Sukan kakan‑ta'vi o nuu Su'si ma ja na chindee ña'a ya te kaku o nuu ñayii ñatuu kúnimani nuu o ma

¹ Su'si Iya Tátnuni, ja maa ni, te sa'a ni ja na kaku sa nuu ja u'vi ma, te ja maa tnu'u ndee tnu'u ndatnu ni a, te chindee ña'a ni.

² Su'si maa sa, koniniso'o ni ja jikan‑ta'vi sa nuu ni a, ndaka ja ká'an sa ji'in yu'u sa ya.

³ Vaa ñayii ñatuu jini tna'a ji'in sa ma, ji'in ñayii ka kiti ini nuu sa ma chi ka kuni i ja jin ka'ni ña'a i saña, te ñatuu ka yu'u ña'a i maa ni, vi Su'si.

⁴ Kovaa vitna, te jin kuni i ja maa ni kúu iya chíndee ña'a te maa ni iyo ji'in ñayii ka chindee ña'a ma.

⁵ Vaa maa Su'si ma kúu iya ndakone'e ja u'vi ja jin ndatna'a maa ñayii ñatuu ka kunimani nuu sa ma. Su'si, ja maa tnu'u ndaa tnu'u ndija ká'an ni a, te xnaa ni i.

⁶ Te ja kúu ini maa sa kúu ja kata sa nuu ni, te ndachiñu'u ña'a sa, vi Su'si Iya Tátnuni, vaa maa ni chi va'a xeen ini ni.

⁷ Vaa maa ni kúu iya ni chindee ña'a nuu ndaka tnundo'o tnuneni ni tna'a sa ma, te ni jini sa ji'in nuu sa sukan ni xnaa ni ñayii ñatuu ka kunimani nuu sa ma.