Salmos 53 - New Testament Psalms and Proverbs in Mixtec Magdalena Peñasco

Salmo 53 Ñayii ndee ini ma chi ñatuu ndánduku i Su'si ma

¹ Ñayii ñatuu kuiti ndása'a kuenda ma chi jani ini i ini anua i ma ja masu na Su'si ma iyo. Te ndaka ñayii yukan ma chi ka kuneé ka ku‑uun‑nka i, te ndimaa ja u'vi ma‑ni ka sa'a i, tna'a ja masu nde játna ini Su'si ma. Te ni a in i ñatuu sa'a ja va'a.

² Onde andivi ma nde'ya nde'ya‑ni Su'si ma nuu ka iyo sa'ya tata ñayii a, sukan‑va'a nú iyo in ñayii ja ndása'a i kuenda te ndánduku i Su'si ma.

³ Kovaa ndi‑in ndi‑in i ni ka ndakakayata, te ka kuneé ka ku‑uun‑nka i. Ñatuu na nde in sa'a ja va'a, vaa ni a in i ñatuu sa'a ja va'a.

⁴ Ndaka i ja ka sa'a i ja u'vi ma, ñatuu na nde ka ndasa'a maa i kuenda, vaa kuenda tnu'u ja ka jaa i in xtatila ma‑ni, sukan‑ni kúu ja ka sa'a ndeva'a i ñayii ñuu sa ma, te ñatuu nde ka ndakune'e i Su'si o Iya Tátnuni ma.

⁵ Kovaa jin ndayu'u xen‑xeen maa i, visi ñatuu nawa iyo ja jin koyu'u i. Te sa'a ya ja jin ndatna'a maa i ja kan‑nuu, vaa ñatuu kúni ya ja jin koo kaa i ji'in ñayii ka sa'a ja va'a ma. Vaa Su'si ma chi ndasa'a siin ya onde yiki ñayii ñatuu ni ka yo kunimani nuu ñayii ñuu ya ma.

⁶ ¡Nuna kava va'a ini maa Su'si ma, te onde ñuu nuu iyo ya ma, te sa'a ya ja na jin kaku ñayii ñuu Israel ma nuu ja u'vi ma! Te kivi sa'a Su'si ma ja ndaka ñayii ni ka jitenuu te ni ka yo jinukuechi i nuu in‑ka ñuu ma, te jin ndakokuiñi i ñuu maa i ma. Sani te jin ndusii ini xen‑xeen ndaka sa'ya tata Jacob ma, ja ka kuu i ñayii ñuu Israel ma.