Salmos 26 - New Testament Psalms and Proverbs in Mixtec Magdalena Peñasco

Salmo 26 Ñayii sa'a ja va'a ja ndaa ma chi iyo va'a i nuu Su'si ma

¹ Iya Tátnuni, ndaka'an ndakachi maa ni naxe iyo sa nuu ni a, vaa saña chi ni‑yu'u ni‑ini sa ndikin ña'a sa, te ñatuu nde jani uu jani uni ini sa, vaa nuu maa ni kúkanu ini sa.

² Iya Tátnuni, konde'ya vava'a ni ini anua sa ya, te kototnuni ña'a ni naxe iyo ini anua sa ya, te ndaka'an ndakachi maa ni nú ja va'a kúu ndaka ja jani ini sa a.

³ Vaa saña chi ndimaa ñu'u ini sa ja maa ni chi iya nda'vi ini kúu ni, te chukan kúu ja nde kua'an nde vee sa chi ndimaa sa'a sa sukan kúni ni ma.

⁴ Vaa ñatuu nde kétna'a ini sa ji'in ñayii masu inundija i ja ka ka'an i ma, te ni masu nde ndikin sa i, vaa masu ka sa'a i sukan ka ka'an i ma.

⁵ Chukan kúu ja ûni ñatuu játna ini sa ja koo sa nuu ka ndatna'a i ma, vaa ndimaa ja u'vi ka sa'a i, te ni masu nama uun ni yo nukoo kaa sa ji'in i ja jin kaa sa xita, vaa masu ka sa'a i sukan játna ini ni ma.

⁶ Ndakate sa nda'a sa ya, ja kúni ka'an ja masu na ja u'vi ni yo sa'a sa, te sukan, te kuu ki'in kii sa nuu altar ni ma, vi Su'si Iya Tátnuni,

⁷ sukan‑va'a ndakuan‑ta'vi sa nuu maa ni, te ndaka'an ndakachi sa sukan vii sukan luu sa'a ni, vi Su'si.

⁸ Iya Tátnuni, játna ini xeen sa ja koo sa veñu'u nuu iyo ni a, vaa yukan kúu nuu iyo jayiñu'u ni ma.

⁹ Kivi kûu sa ma, máko jin xsia'a ni anua sa ya nuu ka ñu'u anua ñayii ni ka yo sa'a nanimaa ja u'vi ma, ni a nuu ka ñu'u anua ñayii ni ka ja'ni i in‑ka ñayii ma,

¹⁰ ni a nuu ka ñu'u anua ñayii ja ndimaa ja u'vi ni ka yo sa'a i ma, te ni ka yo kundee i ni ka yo xnda'vi i in‑ka ñayii ma, te ni ka yo ni'i i ja ka kuni i ma.

¹¹ Kovaa saña chi ni‑yu'u ni‑ini sa kondikin ña'a sa, te kunda'vi ini ña'a ni, te chindee ña'a ni ja na kaku sa nuu ja u'vi ma.

¹² Vaa saña chi jâ ka iyo ja'a sa a ichi maa ni a nuu kuu konukuiñi va'a sa a, te chukan kúu ja nuu ka ndatna'a ñayii ka kandija ña'a maa ni ma, yukan koo sa, te ndachiñu'u ña'a sa, vi Iya Tátnuni.