Salmos 20 - New Testament Psalms and Proverbs in Mixtec Magdalena Peñasco

Salmo 20 Sukan kakan‑tavi o nuu Su'si ma ja na chindee ña'a ya ja kundee o nuu ñayii ka sa'a ja u'vi ma

¹ Iya Tátnuni ma, na koniniso'o ña'a ya ja kuña'a ni ya kivi ndó'o néni ni ma. Vaa suni maa ya kúu Su'si ni yo kukanu ini Jacob ma, te chukan kúu ja kasi ndee kasi ndoso ña'a ya nuu ja u'vi ma.

² Onde nuu ii iyo ya ma, te na koo tu'va ya ja chindee ña'a ya, te onde nuu iyo ya yuku nani Sion ma, te na chindee ña'a ya ja konukuiñi vava'a ni.

³ Te na kona'a ya ndaka ja ni ndakua'a ni nuu ya ma, te kuán‑ta'vi ya kiti ka'mi ndi'i kuiti ni nuu ya ma.

⁴ Te na taa ya sukan ñu'u ini ni ja ni'i ni ma. Te ndaka ja jani ini ni ja sa'a ni ma, te na chindee ña'a ya ja sukan kó kuu.

⁵ Te ndaka o jín koo sii ini, vaa ni kaku ni nuu ñayii ñatuu ka kunimani nuu ni ma, te jín ndone'e o in sa'ma ja ká'an ja maa ya ma, te ni kundee ni ma. Te na taa Iya Tátnuni ma ndaka ja kakan ni nuu ya ma.

⁶ Te vitna, te jini sa ja Iya Tátnuni ma chi sa'a ya ja kaku tee ni sunkani maa ya ja ko kuu de rey ma. Vaa maa ya chi onde andivi ma, nuu ii iyo ya ma, te koniniso'o ya ja kuña'a de ma. Te nda'a kua'a ya ma iyo tnu'u ndee tnu'u ndatnu ya ma, ja chindee ya de ja kundee de nuu ndaka ñayii ñatuu ka kunimani nuu de ma.

⁷ Vaa ndaka ñayii yukan ma chi ka kukanu ini i ja carreta i ma ji'in caballu i ma jin koo ji'in i ja jin kanaa i ma, kovaa yo'o chi jin ndakune'e o Iya Tátnuni ma, iya kúu Su'si o ma, te ja maa ya, te jin kundee o.

⁸ Ñayii yukan chi ka kuita i te ka kotuu i, kovaa yo'o chi jin ndonenuu o te jin konukuiñi va'a o.

⁹ Iya Tátnuni, ja kúu ni Rey sa ma, koniniso'o ni kivi ka ndakune'e ña'a sa ma ja na chindee ña'a ni ma, vaa maa ni sa'a ja jin kaku sa ma, vi Su'si.