Salmos 140 - New Testament Psalms and Proverbs in Mixtec Magdalena Peñasco

Salmo 140 Sukan kakan‑ta'vi o nuu Su'si ma ja na chindee ña'a ya ja na kaku o nuu ñayii sóndikin ña'a ma

¹ Su'si Iya Tátnuni, sa'a ni ja na kaku sa nuu nda'a ñayii sa'a ja u'vi ma, te ko koto va'a ña'a ni. Sa'a ni ja na kaku sa nuu nda'a ñayii ja ndimaa jin kanaa i ka kuni i ma,

² nuu ndaka ñayii ja ndi‑kivi ndi‑kivi ka ñu'u ini i ja jin sa'a ña'a i ja u'vi ma. Vaa ndi‑kivi ndi‑kivi ka nduku i ja jin kanaa i ma.

³ Vaa yaa i ma, sukan ka kuu yaa koo ma ka kuu, te tnu'u ka ka'an i ma ka kuu sukan kúu venenu koo ma.

⁴ Su'si, ko koto va'a ña'a ni ja na kaku sa nuu nda'a ñayii ndimaa ja u'vi ka sa'a i ma. Sa'a ni ja na kaku sa nuu nda'a ñayii ndimaa jin kanaa i ka kuni i ma. Vaa ka kuni i ja kóto naxe jin sa'a i te kotuu sa ma.

⁵ Ñayii yukan, ja ka jani ini i ja maa i ka kuu‑ka ma, ka jito yu'u ña'a i, te ka sa'a i in nuu ka kuni i ja na kêe sa te jin ke'en su'va ña'a i.

⁶ Kovaa saña chi ni jiña'a sa nuu Iya Tátnuni ma sa'a: “Maa ni kúu Su'si sa, te koniniso'o ni ja káyu'u sa ndákune'e ña'a sa a”, kúu sa jiña'a sa ya.

⁷ Su'si sa Iya Tátnuni, maa ni iyo tnu'u ndee tnu'u ndatnu ja sa'a ni ja kaku sa nuu ja u'vi ma, vaa maa ni ni jasi xini sa a, te ni kaku sa kivi ni ka kanaa sa ji'in ñayii ñatuu ka kunimani nuu sa ma.

⁸ Su'si Iya Tátnuni, máko kua'a ni tnu'u ja ko kuu sukan ka ñu'u ini ñayii ka sa'a ja u'vi ma, te máko kua'a ni tnu'u ja jin sa'a i sukan ka jani ini i ma, sukan‑va'a máko jin ko kuvixi i ja ni kuu ni ka sa'a i ndaka ja ka jani ini i ma.

⁹ Te ndaka ñayii ni ka ndakonduu ña'a ma te ka ka'an ndeva'a i ja kuu sa ma, te ndaka sukan ka ka'an maa i ma jín nukun‑tuu maa i.

¹⁰ Te jín kêe koo maa ñayii yukan onde kunu ma onde nuu nee ma, te ndájinu ñu'u i'ni ma siki i, te jín kayu i.

¹¹ Te ñayii ká'an tnu'u in‑ka ñayii ma, másu konukuiñi va'a i ñuu ñayivi ya, vaa ja u'vi ma chi ndanduku i ñayii sa'a ja u'vi ma, sukan‑va'a xnaa i ñayii yukan.

¹² Kovaa saña chi jini sa ja Su'si o Iya Tátnuni ma chi kunda'a maa ya ndaka sukan ndó'o néni ñayii kándija ya ma, te sa'a ya ja jin kendoo va'a i te ñatuu nawa ko ka'nu ndee ja ma jin ni'i i nawa ka jiniñu'u i ma.

¹³ Te ja ndaa ndija kúu ja ñayii ka sa'a ja va'a ja ndaa ma chi jin ndachiñu'u ña'a i maa ni, te jin koo i nuu iyo ni a, vaa ni ka sa'a i ja va'a ma, vi Su'si.