Salmos 127 - New Testament Psalms and Proverbs in Mixtec Magdalena Peñasco

Salmo 127 Nuu maa Su'si ma vee ndaka ja kúta'vi o ma

¹ Nú masu maa Su'si Iya Tátnuni ma sa'a ja konukuiñi va'a ve'e ma chi masu nde jiniñu'u ja ka satniñu ka satniñu ñayii ka sa'a ve'e ma. Te nú masu maa Su'si ma ko koto va'a in ñuu ma, másu nde jiniñu'u visi ni ka ndakonduu maa ñayii ka jito vava'a ñuu ma.

² Nú ñatuu kúkanu ini ni Sa'si ma, másu nde jiniñu'u ja ne'e‑ni ndakoo ni, te kusu kuee ni, te ndo'o neni ni sana ni'i ni nawa kaa ni ma. Vaa ñayii kúkanu ini Su'si ma chi kútoo ya i, te nani kixi i ma, te maa ya ndí ini naxe ni'i i nawa jiniñu'u i ma.

³ Sa'ya tata o ma chi in ja vii ja va'a ka kuu i nuu o, vaa maa Su'si ma ni skuta'vi ña'a.

⁴ Te ndaka sa'ya o suchi ni ka kâku nuu jaa‑ka o ma chi sukan ñama sukan ka ndanuu flecha ka skana tee ka kanaa ji'in kuji de ma, sukan ka kuu i nuu o.

⁵ ¡Naka vava'a ka kuu ñayii ka iyo kua'a sa'ya i ja ka kuu sukan ma chi másu nawa jin kukan‑nuu i! Te kivi kenda ñayii ñatuu kunimani nuu i ma, masu sa'a ndeva'a ña'a i vaa masu iyo maa in-ni i.