Salmos 120 - New Testament Psalms and Proverbs in Mixtec Magdalena Peñasco

Salmo 120 Sukan kakan‑ta'vi o nuu Su'si ma ja na kaku o nuu ñayii tnu'u ma

¹ Kivi ndó'o néni sa ma, te ni ndakune'e sa Su'si ma ja na chindee ña'a ya, te ni ndakone'e ya.

² Vaa sa'a ni jiña'a sa ya: “Su'si Iya Tátnuni, sa'a ni ja na kaku sa nuu ñayii tnu'u ma ja ndimaa tnu'u xnda'vi tna'a ká'an i ma”, kúu sa jiña'a sa ya.

³ Ndijin ñayii tnu'u, ¿nawa ni'i ni, nawa chíndee ña'a ja ndimaa tnu'u xnda'vi tna'a ká'an ni? Te vitna ja Su'si ma, masu játna ini ya.

⁴ Ja ndani'i ni kúu ja ka'ni ña'a ñayii yinda'a kuji i ma, xi ja kayu ni nuu ñu'u i'ni xen‑xeen ma.

⁵ ¡Nda'vi‑nka sa, vi Su'si, ja iyo sa ñuu Mesec ya, te iyo sa ne'un ñayii ka iyo ñuu Cedar ya!

⁶ Vaa ni kuu kua'a xeen kivi iyo sa ne'un ñayii ya'a, ja ñatuu ka jatna ini i ja jin koo mani i ma.

⁷ Kovaa saña chi kuee ini sa, te ora ká'an sa ja jin koo mani sa ji'in i ma, te ndimaa jin kanaa i ka kuni i.