Proverbios 8 - New Testament Psalms and Proverbs in Mixtec Magdalena Peñasco

Tnu'u ndichi Su'si ma chi in ja va'a xeen kúu i te iyo i ni‑kani ni‑jika

¹ Káyu'u káyu'u tnu'u ndichi Su'si ma ká'an i, sukan‑va'a jin jaku'ni ini ñayii ma.

² Onde sukun ma iyo i te ká'an i, te onde nuu ka ndatna'a ichi nuu ka jika kua'a ñayii ma kénda i te ká'an i, sukan‑va'a jin kuniso'o ñayii ma.

³ Onde nuu kívi o ñuu ma iyo i te ká'an i, sukan‑va'a jin kuni ndaka ñayii ma.

⁴ Sa'a ká'an tnu'u ndichi Su'si ma: “Nuu ndaka ndijin ja ñatuu jin ndasa'a‑ka ni kuenda a, ká'an sa:

⁵ Jin jaku'ni ini ndaka ndijin ja ka iyo neé ka iyo su'va‑ni ni a, ndijin ja inundee xeen ini ni ja jin jaku'ni ini ni tnu'u ndichi a te jin ni'i ini ni naxe jin ko sa'a jin ko kuu ni ma.

⁶ Jin koniniso'o ni, vaa ká'an sa tnu'u va'a tnu'u ndaa, vaa masu játna ini sa tnu'u masu kuatniñu ma.

⁷ Vaa ja ká'an sa a chi ja ndaa kúu, te masu xnda'vi ña'a sa, vaa masu játna ini sa tnu'u ndeva'a tnu'u kini ma.

⁸ Vaa ndaka tnu'u ká'an tnu'u káchi sa a chi tnu'u va'a tnu'u ndaa kúu, te masu ja ká'an sa ja sa'a u'vi ña'a sa kúu,

⁹ vaa saña chi kaji kaji ká'an sa, sukan‑va'a jaku'ni ini ñayii ndása'a kuenda ma, te ñayii ndichi ma chi jáku'ni ini i ja tnu'u vii tnu'u va'a kúu ja ká'an sa a.

¹⁰ Jin kuan‑ta'vi ni ndaka ja ká'an káchi sa nuu ni a, vaa ja va'a‑ka kúu sana plata ma, te ja va'a‑ka kúu ja jaku'ni ini o ma sana oro nanimaa ma.” Sa'a ká'an tnu'u ndichi Su'si ma.

¹¹ Te ja va'a xeen‑ka kúu tnu'u ndichi a sana yuu vivii ma, te ni‑in ja játna ini o iyo ñuu ñayivi a ñatuu kétna'a i ji'in tnu'u ndichi Su'si a, vaa ja va'a xeen kúu tnu'u ndichi a.

¹² Vaa tnu'u ndichi a chi iyo i ji'in ñayii ndása'a kuenda naxe ko sa'a i ja va'a ja ndaa ma, te tnu'u ndichi a chi sa'a i ja jaku'ni va'a ini ñayii ma te ndasa'a i kuenda nde a kúu ja va'a ma.

¹³ Vaa ñayii yu'u Su'si ma vaa jini i ja iya ndákan kuenda kúu ya ma chi saxiko i ja u'vi ma ji'in ja kani ini o ja maa o kúu‑ka ma te kuvixi o ma, te suni saxiko i ñayii ka jika ichi u'vi ma te ka ka'an i nanimaa tnu'u ndeva'a tnu'u kini ma. Sa'a ká'an tnu'u ndichi Su'si ma.

¹⁴ “Maa sa kúu ja káxtnu'u nuu ñayii ma naxe sa'a naxe kuu i, sukan‑va'a ku'un kaji ku'un va'a ini i. Maa sa káxtnu'u nuu ñayii ma tnu'u ndichi a, te koo tnu'u ndee tnu'u ndatnu i.

¹⁵ Maa sa sa'a ja ka ni'i ini rey ma naxe jin tatnuni de ñuu de ma, te maa sa sa'a ja ka ni'i ini tee ka tatnuni ñuu ma naxe jin ka'nde ndaa de tniñu ñayii ma.

¹⁶ Te ja maa sa kúu ja ka ni'i ini ndaka ñayii ka netniñu ma naxe jin tatnuni i ma te ka ja'nde i tniñu ñayii ñuu ñayivi a.

¹⁷ Ñayivi ni‑yu'u ni‑ini i ndánduku ña'a i ma, ji'in suchi jaa ka ndanduku ña'a ma chi jin ndani'i yachi‑ni ña'a i.

¹⁸ Ñayii jan‑ta'vi tnu'u ndichi káxtnu'u sa a chi ni'i i ja vii ja va'a ni‑kani ni‑jika, te ko ni'i ko tna'a i nawa ko neva'a i, te ko sa'a i ja va'a ja ndaa ma, te koo jayiñu'u i.

¹⁹ Ñayii jan‑ta'vi tnu'u ndichi káxtnu'u sa a chi ja va'a‑ka kúu sana ja koneva'a i kua'a oro ma xi plata ma,

²⁰ te skaka sa i ichi va'a ichi ndaa ma, te ndasa'a i kuenda na nde a kúu ja va'a ja ndaa ma.

²¹ Te chukan kúu ja ñayii ka kandija tnu'u ndichi ká'an sa a chi chindee sa i ja jin ko ni'i jin ko tna'a i ja jin koo ve'e i ma.

²² ’Saña ja kúu sa tnu'u ndichi a, onde xinañu'u kuiti ma ni sa'a ña'a Iya Tátnuni ma, sana ni sa'a ya ndaka‑ka ja ka iyo a,

²³ vaa jâ iyo sa xi'na‑ka, sana ni ka kuva'a ndaka‑ka ja ka iyo a.

²⁴ Te xi'na‑ka sa jâ iyo, sana ni ka kuva'a nuu kunu kunu ka ñu'u ndute ma, te xi'na‑ka sa iyo, sana ni ka kuva'a nuu ka too ndute ma.

²⁵ Xi'na‑ka sa jâ iyo, sana ni ka kuva'a yuku sukun ma ji'in yuku kuechi ma,

²⁶ vaa jâ iyo sa, sana ni kuva'a ñuyaka ko kuu ni‑ka'nu ñuu ñayivi a ji'in ndaka nundaa ma.

²⁷ Iyo sa ji'in Su'si ma nuu yikuu ya sa'a ya andivi a te ni skendoo ya ndute ma onde nuu ñu'ú ya.

²⁸ Iyo sa ji'in Su'si ma nuu yikuu ya sunkani vava'a ya andivi a te ni chituu vava'a ya nuu ñu'u ndute ma.

²⁹ Nuu ni sunkani vava'a ya ñu'ú ya, te ni tatnuni ya nuu ndute ma nde‑ni kuu kenda de ma.

³⁰ Iyo sa ji'in Su'si ma nuu yikuu ya súnkani va'a ya ndaka ja sa'a ya ndi‑kivi ndi‑kivi ma, te chukan kúu ja kúu sii ini xen‑xeen sa ja iyo sa ji'in ya.

³¹ Saña ja kúu sa tnu'u ndichi a, sii ini xeen iyo sa nuu ni sa'a Su'si ma ndaka cha'a, te sii ini xeen iyo sa ja ni sa'a ya ñayii ñuu ñayivi a.

³² ’Chukan kúu ja vitna, vi sa'ya maa ri, jin koniniso'o ja ká'an káchi ri a. Ja vava'a ka kuu ñayii ka kandija te ka sa'a i sukan ká'an káchi ri a.

³³ Jin katanuu ja ká'an káchi ri nuu ro a, te máko jin saxiko ro, sukan‑va'a jin ko kuu ro ñayii ndichi.

³⁴ Ja va'a kúu ñayii niniso'o ndaka ja ká'an ri a, ja ûni ndee ndikin i ja na ni'i i tnu'u ndichi a.

³⁵ Vaa ñayii kuan‑ta'vi tnu'u ndichi ká'an ri a chi sa'a i ja koteku i te ni'i i ja skuta'vi ña'a Iya Tátnuni ma.

³⁶ Kovaa ñayii saxiko tnu'u ndichi a chi sa'a u'vi maa i ini anua i ma, te ja ni'i i kúu ja kûu i te skenaa i maa i ma.” Sa'a ká'an tnu'u ndichi Su'si ma.