Proverbios 2 - New Testament Psalms and Proverbs in Mixtec Magdalena Peñasco

Ñayii jan‑ta'vi tnu'u ndichi Su'si ma chi ko kuu i in ñayii ndichi

¹ Sa'ya maa ri, nuna kuan‑ta'vi ro tnu'u ka'an ri a te ûni sa'a ro sukan tátnuni ri nuu ro a,

² te nuna koniniso'o ñukuun ro tnu'u ndichi ká'an ri a te ni‑yu'u ni‑ini ro katanuu ro ja ko kuu ro ñayii ndichi,

³ nú ni‑yu'u ni‑ini ro kakan‑ta'vi ro nuu Su'si ma ja na taa ya tnu'u ndichi maa ya ma te na sa'a ya ja na jaku'ni ini ro, sukan‑va'a ko kuu ro in ñayii sa'a ndaa sa'a ndija,

⁴ te nú ûni na ndanduku ñukuun ro tnu'u ndichi ká'an ri a sukan ndánduku o in xu'un yinee yu'u ma te ndeya'vi xen‑xeen i ma,

⁵ sani te jaku'ni ini ro nawa kúni Su'si ma ja ko sa'a ro ma, te jaku'ni ini ro ja jiniñu'u ja koyu'u ro Su'si ma, vaa iya ndákan kuenda kúu ya ma.

⁶ Vaa Su'si ro Iya Tátnuni ma kúu iya táa tnu'u ndichi ma te sa'a ya ja jaku'ni ini ro ndaka. Vaa maa ya kúu iya jini ndaka tu'u naxe iyo ñuu ñayivi a.

⁷ Te chukan kúu ja ñayii ni‑yu'u ni‑ini i ndikin i ya ma te ñatuu ni‑in ja u'vi sa'a i ma chi ñukuun jito va'a ya i, te chíndee ya i nawa ka kuni i ja jin sa'a i ma.

⁸ Te ñayii sa'a ja va'a ja ndaa ma chi suni ñukuun jito ya i nde kuan koo ve koo i ka kuu i ma, te sa'a ya ja ndimaa ka iyo va'a i nuu ya ma.

⁹ Ndasa'a maa ro kuenda sukan va'a ini ya a, sani te jaku'ni ini ro sukan ko sa'a ro ja va'a ja ndaa ma ji'in ndi‑in ndi‑in ñayii ma, te ndimaa sukan ko sa'a ko kuu ro nde kua'an nde vee ro.

¹⁰ Vaa sukan, te koo tnu'u ndichi ma ini anua ro a, te koo sii ini ro, te kutachi ro ja jini ro ja va'a ja ndaa ma.

¹¹ Ja katanuu ro tnu'u ndichi ká'an Su'si ro a te ni'i ini ro ja ko sa'a ro ja va'a ma, te maa i ko koto va'a ña'a, te masu nawa ndo'o ro.

¹² Ja koo tnu'u ndichi ma ini anua ro a chi chindee ña'a i ja másu ko sa'a‑ka ro ja u'vi sukan ka sa'a ñayii inundee ini ma ja ndimaa ja u'vi ka ka'an i ma.

¹³ Vaa ka xndoo i ichi va'a ichi ndaa Su'si ma te kuan koo maa i ichi nuu nee, ichi nuu masu ka jaku'ni ini i ja ja u'vi kúu ja ka sa'a ka kuu i ma.

¹⁴ Vaa ñayii yukan ma chi ka jatna ini i ja ndimaa ja u'vi ka sa'a i ma. Te ûni ka sa'a i in viko ja ka kutachi i ja ni ka kundee i ni ka sa'a i ja u'vi ma.

¹⁵ Vaa masu ichi va'a ichi ndaa kúu ichi kuan koo i ma, su'va ichi nuu jin skenaa i maa i kúu ma.

¹⁶ Kovaa ro'o chi nuna katanuu ro tnu'u ndichi Su'si ro a chi masu kundee ña'a kúneé kú‑uun ja vivii ká'an ña ja kúni ña ja xnda'vi ña'a ña ma; te kaku ro nuu ja u'vi ma.

¹⁷ Vaa ña'a yukan chi ni ndunaa ña sukan ni skuiso ña nuu Su'si ma, te xnda'vi ña yii ña ma, tee ni tnanda'a ji'in ña ma, te kívi nduu ña ji'in in‑ka tee ma.

¹⁸ Chukan kúu ja tee tnii ichi ja ki'in de ve'e ña'a yukan ma chi kuenda tnu'u ja ni tnii ichi maa de kua'an de ichi nuu kûu de ma kúu.

¹⁹ Tee ka kivi nduu ji'in ña'a yukan chi ja ka nduku maa de kúu ja jin kûu de, te onde yukan‑ni ni ka kenda koo de te jin skenaa de maa de.

²⁰ Kovaa ro'o chi nuna ko katanuu ro tnu'u ndichi ká'an Su'si ro a chi ko kaka ro ichi ndaa ichi va'a ka jika ñayii ñatuu‑ka na ja u'vi ka sa'a i ma.

²¹ Vaa kona'a ro ja ñayii ni‑yu'u ni‑ini i ndikin i Su'si a te sa'a i ja va'a ja ndaa ma chi koo i ni‑kani ni‑jika nuu ñu'ú ká'an maa ya ma.

²² Kovaa ñayii ndimaa ja u'vi ka jatna ini i ja jin sa'a i ma chi kene'e nda'a ya i, te masu kua'a ya tnu'u ja jin koo i nuu ñu'ú jin koo ñayii ka sa'a ja va'a ma.