Proverbios 15 - New Testament Psalms and Proverbs in Mixtec Magdalena Peñasco

¹ Nú tnu'u vii tnu'u kuee kúu tnu'u ndákone'e o nuu ñayii ndákiti ini ma chi ndiko ini i, kovaa nú tnu'u xiko tnu'u ndi'vi ma na ndakone'e o chi su'va ndakiti‑ka ini i.

² Ñayii ndichi ma chi ndimaa tnu'u vii tnu'u va'a, tnu'u kuatniñu o ká'an i, kovaa ñayii so'o xeen kaa ma chi ndimaa tnu'u ndeva'a tnu'u kini ma, tnu'u masu nde kuatniñu o kúu tnu'u ká'an i ma.

³ Su'si Iya Tátnuni ma chi nde'ya nde'ya‑ni ya ni‑ka'nu ñuu ñayivi a, te jini ya nawa ka sa'a ñayii ka sa'a ja va'a ma ji'in nawa ka sa'a ñayii ka sa'a ja u'vi ma.

⁴ Ñayii ká'an vii ká'an va'a ma chi wa'a i tnu'u kanu ini in‑ka ñayii ma, te ndusii ini ñayii yukan, kovaa ñayii ká'an tnu'u ndeva'a ma nuu in‑ka ñayii ma chi sa'a i ja kúxii ini ñayii yukan.

⁵ Suchi so'o xeen kaa ma chi saxiko i tnu'u ndáka'an‑so'o yuva i ma nuu i ma, kovaa suchi jan‑ta'vi ma chi káxtnu'u i ja suchi jáku'ni ini kúu i te ko kuu i in ñayii ndichi.

⁶ Ñayii sa'a ja va'a ja ndaa ma chi ko ni'i ko tna'a i ja koneva'a i ve'e i ma, kovaa ñayii sa'a ja u'vi ma chi visi na ni'i i ja koneva'a i ma, kovaa ndimaa koo tnundo'o tnuneni nuu i ma.

⁷ Ñayii ndichi ma chi ndimaa tnu'u ndichi ka ka'an i te ka sa'a i ja kua'a‑ka ñayii ka jaku'ni ini, kovaa ñayii so'o xeen ka ndaa ma chi ndimaa ja u'vi ka ñu'u ini i ja jin sa'a i ma.

⁸ Ñayii ka sa'a ja u'vi ma chi saxiko Su'si ma ja ka ndakua'a i nuu ya ma, kovaa ñayii ka sa'a ja va'a ja ndaa ma chi játna ini Su'si ma ja ka jikan‑ta'vi i nuu ya ma.

⁹ Su'si Iya Tátnuni ma chi saxiko ya ja ka sa'a ka kuu ñayii ka sa'a ja u'vi ma, kovaa kútoo ya ñayii ka sa'a ja va'a ja ndaa ma.

¹⁰ Ñayii ñatuu jika ndaa ichi Su'si a chi ndaka'an ni'i ya nuu i, te ñayii saxiko ja ndáka'an‑so'o ya nuu i ma chi skenaa i maa i.

¹¹ Su'si ma chi jini ya na kivi kûu ñayii ma te ndenu ki'in i ma, te suni sukan jini tna ya ja jani ini o ma.

¹² Ñayii so'o xeen kaa ma chi ñatuu játna ini i ñayii ndáka'an‑so'o nuu i ma, te ká'an yichi‑ni i ñayii yukan, te ni ñatuu kúni i ja ndatna'a i ji'in ñayii ndichi ma.

¹³ Ñayii iyo sii ini anua i ma chi ndijin ndaa na'a nuu i ma ja iyo sii ini i ma, kovaa ñayii kúxii ini ma chi ñatuu na tnu'u sii ini iyo ini anua i ma te ndijin‑ni na'a i.

¹⁴ Ñayii jáku'ni ini ma chi su'va ndánduku‑ka i tnu'u ndichi Su'si ma, kovaa ñayii so'o xeen kaa ma chi kua'a‑ka ja u'vi ndúku i ja sa'a i.

¹⁵ Ñayii wa'a tnu'u ja kúxii ini i nawa ndo'o neni i ma chi ndaka kivi ma kúu i sukan, kovaa ñayii iyo sii ini ma chi ndaka kivi chi kuenda tnu'u ja viko iyo i jini i, vaa iyo sii ini i ma.

¹⁶ Sa'a te jini o ja va'a‑ka kúu ja visi jaku‑ni neva'a o ma, te iyo sii ini o vaa iyo o ji'in Su'si ma iya ndakan kuenda nawa sa'a nawa kúu o ma, sana ja ko ni'i ko tna'a o ma te ñatuu na tnu'u sii ini iyo ini anua o ma ja ndaka ja ndí ini xeen o ma.

¹⁷ Va'a‑ka kúu ja kaa o in ko'o yuva xi in ko'o ndeyu vi'nde nú vivii ka kutoo tna'a o, sana ja jin kaa o in xndiki ka'nu te ndimaa tnu'u kiti ini ka iyo o ma.

¹⁸ Ñayii yachi xeen ndákiti ini ma chi ja sa'a i kúu ja skanaa tna'a i, kovaa ñayii kuee ini ma chi sa'a i ja ka iyo mani ñayii ma.

¹⁹ Ñayii kuxi ma chi jani ini i ja nanimaa iñu kaa ichi ki'in i ma te va'a‑ka ma ki'in i‑ni, kovaa ñayii sa'a ja va'a ja ndaa ma chi nune nda'a nuu i ichi kua'an i ma jini i.

²⁰ Suchi ndichi ma chi sa'a i ja ka iyo sii ini yuva i ma, kovaa suchi so'o xeen kaa ma chi saxiko i yuva i si'i i ma.

²¹ Suchi so'o xeen kaa ma chi vii xeen na'a jini i ja ñatuu jaku'ni ini i ja sa'a i ja va'a ma, kovaa suchi jáku'ni ini ma chi ndása'a i kuenda te ndákaka ndaa i nuu Su'si ma.

²² Nú ñatuu na in ndichi ja ndaka'an‑so'o i naxe ko kuu ma chi masu kee ja ka ñu'u ini i ja jin sa'a i ma, kovaa nuu ka iyo kua'a ñayii ndichi‑ka te ka ndatnu'u tna'a i naxe ko kuu ma chi vivii kendoo.

²³ Vivii kúu ora kénda ñayii ká'an naxe sa'a o ora ñatuu ní'i ini o naxe ko kuu ma, kovaa vii xeen‑ka kúu ja maa ora jiniñu'u o ma te kénda kunu tnu'u jiniñu'u o ma.

²⁴ Ichi ki'in o ja koteku o ni‑kani ni‑jika ma kuenda tnu'u ja ndichi xeen, vaa ndó'o o jaku; kovaa chindee ña'a i ja ma kêe o andeya ma te skenaa o maa o ma.

²⁵ Su'si Iya Tátnuni ma chi xnaa ya ve'e ñayii jani ini ja maa i kúu‑ka ma, kovaa sa'a ya ja ña'a ni ji'i yii ma chi koo va'a ndaka ja neva'a ña ve'e ña ma.

²⁶ Su'si Iya Tátnuni ma chi saxiko ya ja jani ini ñayii sa'a ja u'vi ma ja sa'a i ma, kovaa játna ini ya ja vii ja va'a ká'an ñayii iyo vii nuu ya ma.

²⁷ Ñayii ndiyo ini ma chi sa'a nda'vi sa'a kee i ñayii ve'e i ma, kovaa ñayii ñatuu játna ini ja sa'a i sukan ma chi jin koo va'a‑ka i ve'e i ma.

²⁸ Ñayii sa'a ja va'a ja ndaa ma chi ndása'a i kuenda naxe ndakone'e i nuu in‑ka ñayii ma, kovaa ñayii sa'a ja u'vi ma chi kée koo kée ni'ni‑ni ja ká'an i ma.

²⁹ Su'si ma chi iyo jika ya nuu iyo ñayii sa'a ja u'vi ma, kovaa niniso'o ya te jatanuu ya ja jikan‑ta'vi ñayii sa'a ja va'a ja ndaa ma.

³⁰ Ñayii nde'ya vii nde'ya va'a ña'a ma chi sa'a i ja kúsii ini ini anua o ma, te ora ka ndakani i tnu'u vii tnu'u va'a ma chi ndátaa i tnu'u ndee tnu'u ndatnu.

³¹ Ñayii niniso'o te sa'a i sukan ka ndaka'an‑so'o ñayii ma nuu i ma chi ko kuu i in ñayii ndichi.

³² Ñayii ñatuu jan‑ta'vi ja ka ndaka'an‑so'o i nuu i ma chi ñatuu kútoo i maa i ja sukan sa'a i ma, kovaa ñayii jan‑ta'vi ma chi su'va kútu'va‑ka i naxe ko sa'a ko kuu i ma.

³³ Nú jan‑ta'vi o ja ka ndaka'an‑so'o i nuu o ma chi jayiñu'u Su'si ma kúu, vaa jandetu o nuu ya ma, vaa nuna kava kuee ini o te kani ini o ja maa Su'si ma sana kuu nawa sa'a o ma chi koo jayiñu'u o.