Proverbios 14 - New Testament Psalms and Proverbs in Mixtec Magdalena Peñasco

¹ Ña'a ndichi ma chi sa'a ña ja vivii jin ketna'a ini ndaka ñayii ve'e ña ma, kovaa ña'a so'o xeen kaa ma te kúnee kú‑uun ña ma chi maa ña sa'a ja ñatuu ka ketna'a ini ñayii ve'e ña ma.

² Ñayii ndí ini ja sa'a i ja va'a ma chi yu'u i Su'si ma vaa jini i ja ndakan ya kuenda, kovaa ñayii ndimaa ja u'vi sa'a i ma chi saxiko i Su'si ma.

³ Ñayii so'o xeen kaa ma chi ndimaa tnu'u ja savixi i maa i ká'an i, kovaa ñayii ndichi ma chi ndaka tnu'u ká'an i ma chi ja va'a kúu, te kaku i nuu ja u'vi ma.

⁴ Ñayii ñatuu na xndiki neva'a i ma chi ñatuu nawa ndaxtutu i itu i ma, te konune nda'a yaka i ma, vaa ka jini o ja tnu'u ndee tnu'u ndatnu xndiki ma ja satniñu ti ma sana koo kua'a ja kaa o ma.

⁵ Ñayii kúkanu ini o ja ndakani ndaa i nawa ni jini i ma chi nú ñayii sa'a ja va'a ja ndaa kúu i chi masu nawa xnda'vi ña'a i, kovaa ñayii ñatuu ká'an ndaa ká'an ndija ma chi ndimaa xnda'vi ña'a i.

⁶ Ñayii ká'an ndeva'a ja kuu in‑ka ñayii ma chi visi na ndanduku i tnu'u ndichi ma, kovaa masu ndani'i i, kovaa ñayii jáku'ni ini te ndása'a i kuenda ma chi masu yii ja ndani'i i tnu'u ndichi ma.

⁷ Máko jin tna'a ro ñayii so'o xeen kaa ma, vaa ndaka tnu'u ká'an i ma chi masu nawa chíndee ña'a i ja jaku'ni ini ro.

⁸ Ñayii ndichi ma chi maa tnu'u ndichi ma sa'a ja ni'i ini i naxe ko sa'a ko kuu i ma, kovaa ñayii so'o xeen kaa ma chi jani ini i ja va'a‑ni sa'a i, kovaa xnda'vi i maa i.

⁹ Ñayii so'o xeen ka ndaa ma chi ka sa'a i ja u'vi ma, te ûni ka kusisi maa i ja ka sa'a i tna'a ja masu játna ini Su'si ma, kovaa ñayii ka sa'a ja va'a ja ndaa ma chi maa i ka kuni ja jin sa'a i ja vii ja va'a ma.

¹⁰ Maa maa o jini naxe ndo'o ini anua o ma ora kúxii xeen ini o ma, te suni sukan kúu ora iyo sii ini xeen o ma, vaa masu na in kuu jaku'ni ini sukan kúu ini anua in‑ka ñayii ma.

¹¹ Ve'e ke'e ñayii sa'a ja u'vi ma chi kendoo nda'vi kendoo kee, kovaa ve'e ke'e ñayii ka sa'a ja va'a ja ndaa ma chi vivii jin ko kuu i.

¹² Ka iyo jaku ñayii ja ka jani ini i ja sukan ka sa'a ka kuu i ma te kuan koo i ichi va'a, kovaa masu nde ka ndasa'a i kuenda ja ichi nuu jin skenaa i maa i kuan koo i ma,

¹³ vaa nawa kúu ja onde ja kusii xeen o ma chi masu kua'a‑ni sani te tna‑u'vi ini anua o a, vaa ora iyo sii ini xeen o ma sani te kénda in tnundo'o te sa'a i ja kúxii xeen ini o.

¹⁴ Ñayii so'o xeen kaa ma chi ndaka ja u'vi sa'a kuu maa i ma chi ndani'i ndi'i ndani'i tu'u maa i, kovaa ñayii sa'a ja va'a ja vii ma chi ndimaa ja va'a ndani'i i te koo sii ini i.

¹⁵ Ñayii kánee janitnuni i ma chi kándija i ndaka nawa ka jiña'a i nuu i ma, kovaa ñayii jâ ni teku ini ma chi jakin i cuidado nú ja va'a kúu ja ka ka'an ñayii ma xi ña'a.

¹⁶ Ñayii ndichi ma chi xndoo i ja u'vi ma te ñatuu nde sa'a‑ka i, vaa yu'u i Su'si ma ja ndakan ya kuenda nuu i ma, kovaa ñayii so'o xeen kaa i ma chi masu ndí ini kuiti i nawa sa'a i ma, te ndito ndito‑ni na'a ja vixi xeen kaa i kúu ma.

¹⁷ Ñayii yachi‑ni ndákiti ini i ma chi ni masu kunitnuni maa i te sa'a i ja u'vi ma, te ñayii sukan kúu i ma chi masu na in kúnimani nuu i ma,

¹⁸ vaa ñayii ñatuu ni'i ini‑ka naxe ko sa'a ko kuu i ja va'a ma te ñatuu ndí ini i ma, chi ja ndetu ña'a kúu ja u'vi ma, kovaa ñayii ndichi ma te ndí ini i naxe koo va'a i nuu Su'si ma chi ja ndetu ña'a kúu ja jakun‑tnuni ini i naxe ko sa'a ko kuu i ja va'a ma.

¹⁹ Ñayii ka sa'a ja u'vi ma chi kenda kivi ja jin koo i ve'e ñayii ka sa'a ja va'a ja ndaa ma, te jin ka'an nda'vi jin ka'an kee i nuu ñayii yukan ja na jin chindee ña'a i.

²⁰ Ñayii kúnda'vi kúkee ma chi onde ñayii ka ka'an ja ka ketna'a ini ji'in i ma ka saxiko ña'a, kovaa ñayii kúxiku ma chi kua'a xeen ñayii ka ka'an ja ka ketna'a xeen ini i ji'in i,

²¹ te vitna ja ká'an Su'si ma ja ñayii saxiko in‑ka ñayii ma chi jiso kuechi i nuu Su'si ma, kovaa ñayii kúnda'vi ini ñayii kúnda'vi kúkee ma chi ja vava'a ko kuu i nuu Su'si ma.

²² Ñayii ka nduku ja nanimaa ja u'vi ma jin sa'a i ma chi jin ski'in i maa i te ma jin ndani'i i ichi ndaa ma, kovaa ñayii ñu'u ini ja sa'a i ja va'a ja ndaa ma chi kunda'vi ini ña'a Su'si ma te jin ndani'i i ichi ndaa ma.

²³ Ndaka ja ndó'o néni o ja satniñu o ma chi ñatuu jan naa, vaa ko ni'i ko tna'a o, kovaa ñayii yika‑ni ja ká'an ká'an‑ni i nawa jani ini i ja sa'a i ma te ñatuu sa'a i ma chi ko kunda'vi ko kukee i.

²⁴ Jayiñu'u ñayii ndichi ma kúu ja jáku'ni ini i te sa'a i ma, kovaa ñayii so'o xeen kaa ma chi ja yoxtnuu kua'an yoxtnuu vee nuu i ma kúu ja masu ndí ini i ja sa'a i ja va'a ja ndaa ma.

²⁵ Ñayii ndáka'an ndaa nawa ni jini i ma chi sa'a i ja ka kaku ñayii ma nuu tnundo'o ma, vaa ndáka'an ndaa ndaa i ma, kovaa ñayii játna ini ja xnda'vi i ñayii ma chi masu ndáka'an ndaa kuiti i nawa ni jini i ma.

²⁶ Ja koyu'u o Su'si ma te ma ko sa'a‑ka o ja u'vi ma vaa iya ndakan kuenda kúu ya ma chi sa'a i ja kukanu ini xeen o ya ja ko koto ña'a ya te ko koto ya sa'ya tata o ma.

²⁷ Sukan kúu nuu tóo kua'a ndute ma, sukan kúu ja koyu'u o Su'si ma te ma ko sa'a‑ka o ja u'vi ma, vaa sa'a ya ja koteku o, sukan‑va'a ma jin tu'va o nuu kûu o te skenaa o maa o ma.

²⁸ Jayiñu'u tee kúu rey ma kúu nú kua'a xeen ñayii ma kúu ñuu nuu tátnuni de ma, kovaa nú lule‑ni ñuu ma te jaku‑ni ñayii ma kúu chi ñatuu nawa kúu sa'a de te nda'vi‑ni kúu de.

²⁹ Ñayii kuee ndákiti ini ma chi ja ni jaku'ni xeen ini i kúu, kovaa ñayii yachi‑ni ndákiti ini ma chi káxtnu'u i ja in ñayii so'o kúu i.

³⁰ Ñayii kuee ini ma chi koo sii ini yikikuñu i ma, te koteku vii koteku va'a i, kovaa ñayii kueñu ini ma chi onde yiki i ma xtnakue'e maa i, ja sukan kúu i ma.

³¹ Ñayii xnda'vi te sa'a ndeva'a i ñayii kúnda'vi ma chi sa'a i ja kúxii ini Su'si iya ni sa'a ña'a ndaka o ma, kovaa ñayii kúnda'vi ini ñayii nda'vi ma chi ndáchiñu'u i Su'si ma ja sukan sa'a i ma.

³² Ñayii sa'a ja u'vi ma chi kenda kivi ja onde andeya ma skana ya i ja sukan ni yo sa'a i ma, kovaa ñayii sa'a ja va'a ja ndaa ma chi visi na kûu i ma chi iyo ja va'a ndetu ña'a.

³³ Ñayii ndasa'a kuenda naxe sa'a naxe kúu i ma chi nanimaa tnu'u ndichi ñu'u ini anua i ma ja sukan sa'a i ma, kovaa ñayii inuso'o xeen ka ndaa ma chi masu ka jini maa i nawa kúu tnu'u ndichi ma.

³⁴ Ñuu nuu iyo tnu'u ndaa tnu'u ndija ma chi koo‑ka jayiñu'u i, kovaa ñuu nuu nanimaa ja u'vi ka sa'a ñayii ma chi ja kan‑nuu ndatna'a ñuu yukan.

³⁵ Ja vii ja va'a ko sa'a tee kúu rey ma ja kuu suchi jinukuechi nuu de ma ja ndása'a i kuenda naxe sa'a kúu i ma, kovaa ndakiti ini de nuu ñayii sa'a ja ni'i de ja kan‑nuu ma.