Santiago 4 - Xochapa Mixteco

Nditaxi ndo mií ndo ndaꞌa Ndioxi

¹ Ñani yo, ¿mií chí káku kuachi xiꞌin ndo ya xáa ndo káni taꞌan ndo, túvi ndo? Ndiꞌi ya väꞌa, ya kútoo ni ndo ikan ndo, ta chí nima mií va ndo kána ya väꞌa, ya ñaa kua síkani taꞌan ndóꞌo̱.

² Kútoo ni ndo koo kuaꞌa ñaꞌa ndo, ta köo kúchiñu ndo niꞌi ndo ya. Nda ìyo kaꞌni ndo naꞌa xaꞌa ya köo kúchiñu ndo niꞌi ndo ya kúni ndo, saa xáa ndo sâa ndo síkuaꞌa ndo kuachi ta xáa ndo kánitaꞌan ndo. Köo kúchiñu ndo niꞌi ndo ya kúni ndo, chi köo ndúku ndo ya nuu Ndioxi.

³ Tá ndúku ndo ya nuu Ndioxi, ta köo níꞌi ndo ya ndúku ndo nuu ra, chi ya ndúku ndo ta ndisaa xaꞌa ya kútoo mií va ndo kua ndúku ndo nuu ra.

⁴ ¡Ndóꞌo̱, ta süvi ndóꞌo̱ kúꞌvi ini xíni Ndioxi ku ndo! ¿Án köo xíni ndo ndiꞌi naꞌa, na kútoo ni ikan taꞌan ñaꞌa íkan na ñuu ivi yóꞌó, na ñaa ta na káni taꞌan xiꞌin Ndioxi ku na? Saa chi ndiꞌi naꞌa, na kútoo ni ikan ya väꞌa íkan na ñuu ivi yóꞌó, ta ndúu na naꞌa, na sâa ini xíni Ndioxi.

⁵ Ta xaꞌa ya yóꞌó kua káꞌan tuꞌun Ndioxi, ya ta̱a na xinaꞌa, káchi ya saa: “Tachi I̱í Iva yo Ndioxi ya ta̱xi ra íyo nima ndiꞌi yo kándixa ñaꞌa, ta sâa va ya xiꞌin yo xaꞌa ya kúni yo ikan yo ya väꞌa”, káchi ya.

⁶ Ta ndee ni ka ndee ya vaꞌa táxi mií Iva yo Ndioxi íyo xiꞌin yo, yakan kua káꞌan tuꞌun ra, káchi ya saa: “Kúndasi nuu va Ndioxi xíni ra naꞌa, na ndee ni kútai ini nuu ra, ta táxi ni va ra ya vaꞌa kúu mií ra ndaꞌa naꞌa, na ni̱nu̱ kúni, na ndáꞌvi kúni nuu ra”, káchi ya.

⁷ Yakan nditaxi ndiꞌi ndo mií ndo ndaꞌa Iva yo Ndioxi, ndaku koo ini ndo, täxi ndo sindaꞌvi kiti nǎꞌa ndóꞌo̱, ni xäa súvi ndo ndá ka ya káꞌan ri, ta saa kutaꞌa ri, saa kuxiyo ri kuꞌun ri.

⁸ Ta vaꞌa kuyati ndo nuu Ndioxi saa kuyati ra nuu ndo. Ta ndóꞌo̱ íyo kuachi, kukuiin ndo xiꞌin ya väꞌa kéꞌe ndo, ndikata ndo ndaꞌa ndo. Saa tu ndóꞌo̱ uvi ini këꞌe ka ndo saa, ndasa vaꞌa ndo nima ndo ná nduvií ndo.

⁹ Ta sinuu ndo ini ndo ná nu̱u ini ndo, kusuchi ini ndo kuaku ndo. Saa ndasa chiꞌña ndo ini ndo kuaku ni ndo, tá tu vaꞌa ni xáku ndo, ta vaꞌa ná sindikava ndo ini ndo.

¹⁰ Kusiti ndo nuu Iva yo Ndioxi, sindikava ndo ini ndo nuu ra ta xaa kaꞌnu ini ra xaꞌa ndo.

Ná käꞌan yo xaꞌa taꞌan yo ya íyo kuachi na

¹¹ Ñani yo xiꞌin kuꞌva yo, käꞌan väꞌa ndo xaꞌa ñani taꞌan ndo. Chi ndiꞌi ndóꞌo̱ íkan saa, ta tá íin ndo xáa nani kuachi xiꞌin taꞌan ndo, saa íin ndo, tá káꞌan väꞌa ndo xaꞌa ley saa xáa nani ndo ya káꞌan ya. Chi tá káꞌan väꞌa ndo xaꞌa ya ta köo xáa súvi ndo ya káꞌan ya, saa ndúu ndo tá íyo na xáa nani ya káꞌan va ya.

¹² Chi iindaa mií va Ndioxi ku ra chi̱nduꞌu ley ra, yakan iindaa mií ra ku ra kúu mií ichí ya xaa nani ra kuachi xiꞌin naꞌa, chi íyo ichí ra ya sikaku ra na, ta íyo ichí ra ya sindiꞌi xaꞌa ra na. Yakan ndóꞌo̱ ta köo ichí ndo kaꞌan ndo xaꞌa na taꞌan ndo ya íyo kuachi na.

Ná kütai ni ini yo xaꞌa kivi taan

¹³ Kuni soꞌo ndiꞌi ndóꞌo̱ káꞌan: “Vitin án taan kuꞌun yo inka ñuu xaa chiñu yo nuu tava kuaꞌa ni yo xuꞌun, saa ikan yo negocio xiꞌin ya”, káchi ndo xiꞌin taꞌan ndo.

¹⁴ Ta ni köo xíni ndo unkua kuu kivi vaxi, chi ndóꞌo̱ ra tá íin viko núꞌu va, saa íin ndo, chi viko núꞌu ta iin rato loꞌo kána ya, iin rato loꞌo ta xa ndi̱ꞌi tuku xaꞌa va ya.

¹⁵ Xaꞌa ya köo xíni ndo unkua kundoꞌo ndo kivi vaxi yakan vaꞌa ná kaꞌan ndo, kachi ndo soꞌva: “Tá mií Iva yo Ndioxi ná kaꞌan kutaku ka yo, saa ikan yo chiñu yóꞌó án chiñu kaá”, kachi ndo.

¹⁶ Sundi ndóꞌo̱ ta káꞌan tái ni va ndo, tá káꞌan naꞌa, na iku ni ini va saa káꞌan ndo, chi mií vi ndo ku ndo xáꞌnda chiñu nuu kivi ya vaxi túvi ndo, ta xaꞌa ya íkan ndo saa, ta väꞌa káꞌan ndo.

¹⁷ Saa chi tá xíni ndo ya xíniñuꞌu ndo xaa súvi ndo chiñu vaꞌa, ta köo xáa súvi ndo ya, xaꞌa ya íkan ndo saa ta kuachi va kua nuu Ndioxi.