Santiago 1 - Xochapa Mixteco

Tíꞌvi ra Santiago tuꞌun yóꞌó kuaꞌan ya ndaꞌa na ndíkun Jesucristo ndóo ndiꞌi ni kúu xaꞌa ñuu ivi

¹ Yeꞌe Santiago, ra xáa chiñu nuu Ndioxi xiꞌin nuu Tata yo Jesucristo ku i táa tutu yóꞌó xaa ya ndaꞌa ndiꞌi uxi uvi saa iin iin tiꞌvi ndóꞌo̱ ñani yo, na Israel, na kúu ñuu Iva yo Ndioxi, na ndi̱xita niꞌnu ndóo ndiꞌi ni kúu xaꞌa ñuu ivi. Ta káꞌan ndioxi i xiꞌin ndo.

Ná kandixa ni yo Ndioxi tá vaxi tindoꞌo nuu yo

² Ñani mani mií i ku ndo, ta káꞌan ni i xiꞌin ndo ya ná kusini ni ndo tá kivi vaxi tindoꞌo ya ndee ni uꞌvi nuu ndo xíto ndoso ya ndóꞌo̱.

³ Saa chi ndóꞌo̱ ta xa kúndaa vaꞌa ini ndo tá kivi ndee ni vaxi tindoꞌo nuu ndo xíto ndoso ya ndóꞌo̱ xaꞌa ya ndáa ni ini ndo xíni ndo Tata yo Jesucristo, ta ya ñaa kua chíndee ndóꞌo̱ ndúndee ka ini ndo xiꞌin tuꞌun ra.

⁴ Chi tá köo ndíko koo ini ndo nuu tindoꞌo ya vaxi nuu ndo saa kua kuchiñu ndo xinu ndo nduu ndo tá kuꞌva kúni mií Ndioxi, nduxuxa tuꞌun ra ini ndo ta nda iin ñaꞌa kümani nuu ndo.

⁵ Tá ndá ndóꞌo̱ kúmani ya ndíchi nuu, ta vaꞌa nduku ndo ya nuu Ndioxi chi vaꞌa ni ra, ta küxinda ra ya nuu ndo taxi va ra ya ndaꞌa ndo.

⁶ Sundi tá ndúku ndo ya nuu ra ta vaꞌa kundaa ni ini ndo ra ya taxi ra ya ndaꞌa ndo, käka uvi ini ndo, chi naꞌa, na xíka uvi ini ta íyo na tá kuꞌva kánda ni nuu nduta ñûꞌu tá xíka ni tachi ta ndá yokan síkuiko nuu rá, saa íin na.

⁷ Ta naꞌa, na xíka uvi ini, ta vaꞌa ka ná ndüku na ya nuu ra, chi ya mani uun va kua ndúku na ya, köo ñaꞌa niꞌi vi na nuu Tata yo.

⁸ Chi ndiꞌi naꞌa, na xíka uvi ini, ta köo iin ini na, uvi ni va ini na. Chi xa síin ya káꞌan na vitin ta xa síin tu ya káꞌan na taan va.

Köo ndáa yaꞌvi ni ya kuika íyo ñuu ivi yóꞌó

⁹ Ta ndóꞌo̱ ñani yo, ndóꞌo̱ kúndaꞌvi ni, ta ná kusini ni ndo, chi ndáa yaꞌvi ni ndo nuu Iva yo Ndioxi.

¹⁰ Ta saa tu ndóꞌo̱ ñani yo, na kuika, kusini ni ndo. Ta kükaꞌan nuu ndo tá ná nduu ndaꞌvi ndo ikan Ndioxi. Chi na kuika ta tá kuꞌva ndóꞌo ita, kama ni va íchi ya, kuꞌva saa kundoꞌo na.

¹¹ Chi tá kétá ñu̱ꞌù saa ndísaa ni, ñaa xáa íchi mií i̱ku ya, saa xáa ya kóyo ita ya, ta ndíꞌi xaꞌa ya ndee ni luvi kúu mií ya. Ta saa kundoꞌo naꞌa, na kuika. Uvi ndaa va kivi ndee ni xáa chiñu na nuu ya kuika kúu mií na, saa ndiꞌi xaꞌa na kundoꞌo na tá ndóꞌo ita.

Ná ndïko koo ini yo tá vaxi tindoꞌo xíto ndoso ya yoo

¹² Vaꞌa ni kée naꞌa, na kúndee ini xiꞌin tindoꞌo vaxi nuu na, saa chi Ndioxi ta taxi ra kutaku na xiꞌin ra ndiꞌi saa kúu kivi. Tá íyo ya ndi̱kaꞌan ra xiꞌin naꞌa, na kúꞌvi ni ini ra xíni ra, saa koo ya ikan ra xiꞌin na, niꞌi na ichí kutaku na xiꞌin ra.

¹³ Tá ndá ndóꞌo̱ ñúꞌu nuu tindoꞌo ya vaxi nuu ndo xíto ndoso ya ndóꞌo̱, ta käꞌan ndo ya xíto ndoso Ndioxi ndóꞌo̱. Chi Ndioxi ta köo ya väꞌa xíto ndoso ra, ta nda iin naꞌa köo xíto ndoso ra xiꞌin ya väꞌa.

¹⁴ Ta vaꞌa ná kundaa ini ndo chi xaꞌa ya kútoo yo ikan yo ya väꞌa, ya ñaa kua ndíxita yoo ya íkan yo ya väꞌa, saa kóyo yo nuu kuachi íkan yo ya väꞌa.

¹⁵ Tá ndi̱xinu yo xa̱a súvi yo ya väꞌa ndíkani ini yo ikan yo, ta saa kua kuakiꞌvi yo kuachi nuu Ndioxi, tá nda̱a ni ya väꞌa xa̱ꞌnu ni ya i̱kan yo, saa kua ndíꞌi xaꞌa yo, xíꞌi yo nuu Ndioxi.

¹⁶ Yakan ndóꞌo̱ ñani mani mií i, ta sïndaꞌvi ndo mií ndo.

¹⁷ Chi ndiꞌi ñaꞌa ya vaꞌa xiꞌin ya ndaa níꞌi yo, ta chí ni̱nù vaxi ndiꞌi ya, nuu mií Iva yo ra si̱kuaꞌa kiti kimi xiꞌin ndiꞌi ñaꞌa ya íyo nuu ndivi ni̱nù nuu íyo ra, nuu yéꞌe̱ ndiꞌi saa kivi, ta köo ndínama nuu íyo ra, ni köo kúnaá, ta nuu mií ra kua vaxi ndiꞌi ya.

¹⁸ Ta saa chi̱tuni ra nda̱sa xa̱á ra nima yo xiꞌin tuꞌun ra ya ndaa, ya ná kuchiñu yo nduu yo naꞌa, na vaꞌa, ta xiꞌna ka yoo ku yo núnu̱ú nda̱sa xa̱á ra nuu tá kúu ndiꞌi ñaꞌa ya si̱kuaꞌa ra íyo ñuu ivi yóꞌó.

Ná kuni soꞌo yo tuꞌun Ndioxi ta ná xaa xúvi yo ya

¹⁹ Ñani yo xiꞌin kuꞌva yo, yeꞌe ta kúni i ndituꞌun i xiꞌin ndo ya ná kundaa ini ndo ya xíniñuꞌu ni ndo sikuaꞌá ndo kuni soꞌo ndo ya káꞌan inka naꞌa xiꞌin ndo, xiꞌna kuni soꞌo ndo ya káꞌan na xiꞌin ndo, saa ndi̱kuiin ndo yuꞌu na. Ta säa kama ni ndo.

²⁰ Chi ndiꞌi naꞌa, na ndee ni sáa ta küvi ikan na ya vaꞌa kúni Ndioxi.

²¹ Xaꞌa ya ñaa kua vaꞌa ka sindoo ndiꞌi ndo ya väꞌa íkan ndo, xiꞌin ya kini ni íyo ka nima ndo. Ta xíniñuꞌu ndo kaꞌnu ndo mií ndo, xaa ni̱nu̱ ndo mií ndo ya ndikiꞌin ndo tuꞌun Ndioxi ya ta̱xi ra ndaꞌa iin iin ndo íyo ya nima ndo. Chi tuꞌun ra kua kúu mií ndee ya sikaku ya ndóꞌo̱.

²² Ta süvi ndisaa xíniñuꞌu ndo kuni soꞌo ndo tuꞌun Ndioxi. Ndóꞌo̱ ta xíniñuꞌu ndo xaa súvi ndo ya káꞌan ya. Chi tá ndisaa xíni soꞌo ndo ya, ta köo xáa súvi ndo ya káꞌan ya, ta síndaꞌvi ndo mií va ndo.

²³ Chi ndiꞌi naꞌa, na xíni soꞌo tuꞌun Ndioxi ta köo xáa súvi na ya káꞌan ya, tá íin naꞌa, na xíto ndaa nuu yu̱ú tátan va saa íin na.

²⁴ Chi tá xíto ndaa na nuu yu̱ú tátan, saa kéta na kuaꞌan na, ta kama ni va ndíndoso ini na ndá kuꞌva káa nuu na.

²⁵ Sundi naꞌa, na köo ndi̱ndoso ini xaꞌa tuꞌun Ndioxi ya xíni soꞌo na, ta xáa súvi na ya káꞌan ya, ta vaꞌa ni kée na, chi sáña ndíka na xaꞌa kuachi na.

²⁶ Tá ndá ndóꞌo̱ ndíkani ini ndee ni vaꞌa kándixa ndo Ndioxi, ta köo ndi̱xita ndo mií ndo nuu ya väꞌa káꞌan ndo, ta síndaꞌvi ndo mií va ndo, chi süvi ya ndaa kua káꞌan ndo ndíkun ndo Ndioxi.

²⁷ Sundi ya vaꞌa ni va ku ichí Iva yo Ndioxi, ta ndiꞌi ndóꞌo̱, na ndíkun ra ta ya ndee ni xíniñuꞌu ndo ikan ndo nuu ra kua yóꞌó: Ná chindee taꞌan ndo xiꞌin na ndaꞌví vali, saa ná chindee taꞌan tu ndo xiꞌin ná síꞌi ná ndi̱ndoo ndaa, ta ná chindee ñaꞌa ndo xaꞌa tindoꞌo ya ndóꞌo ná, saa ná kundaa ni ndo mií ndo, ya ná ïkan ndo ya väꞌa taꞌan ya íkan na ñuu ivi yóꞌó.