ROMANOS 9 - Xochapa Mixteco

Ndioxi ndi̱kaxin ra na ñuu Israel ya kundikun na ra

¹ Ta vaꞌa ná kundaa ini ndo chi yeꞌe, ta yeꞌe kándixa Jesucristo ku i yakan ndaa ni káꞌan i, mií Tachi I̱í Ndioxi ku ya ndíkuiin xaꞌa i, chíndee ya yeꞌe káꞌan i saa xiꞌin ndo, chi ndinuꞌu ni ini i káꞌan i ya ndaa xiꞌin ndo, káchi i soꞌva:

² Yeꞌe, ta ndee ni kúsuchi ini i, ta ndiꞌi saa kivi táꞌvi ka vi nima i xíni i na ñuu i na Israel.

³ Saa chi ndinuꞌu ni ini i kúni i chindee taꞌan i xiꞌin na ya ná kandixa na Jesucristo, ta saa ndikundikun na Ndioxi. Tá ya kúvi ku ya kundiso i chiꞌña ya kuxika i ichí Jesucristo ndikuu, ta vaꞌa ikan i saa ya kuchiñu chindee i na ya ná ndikundikun na ra, chi kúꞌvi ni ini i xíni i na.

⁴ Yakan kúsuchi ni ini i xíni i na, chi seꞌe sikua ra Israel kuu na, ta Ndioxi ndi̱kaxin ra na yóꞌó ya kuu na seꞌe ra. Ta xa si̱naꞌa ra ya vaꞌa luvi ni yéꞌe̱ kúu mií ra nuu na. Ki̱ndoo ra ikan ni ra ya vaꞌa xiꞌin na, ta saa tu na seꞌe ñani sikua va ra. Ta ndaꞌa na ñuu i yóꞌó kua ta̱xi Ndioxi ley ra ya kundaa ini na ndá kuꞌva kutaku na nuu ra tin ndá kuꞌva kañuꞌu na ra ini veꞌe ñuꞌu, ta ndi̱kaꞌan Ndioxi xiꞌin na taxi ra ya ki̱ndoo ra xiꞌin na ndaꞌa na.

⁵ Ra Abraham xiꞌin ra Isaac tin ra Jacob, nda yóꞌó ku xii sikua ndiꞌi nde ñuu Israel, ta xii sikua tu Jesucristo va ku nda. Xaꞌa ya ki̱xi Jesucristo ñuu ivi yóꞌó ta ndi̱xiyo ikin kuñu ra tá kuꞌva íyo mií yo, yakan kúu ra Ndioxi ra Chee ni nuu ndiꞌi ñaꞌa. Vaꞌa ná kunuu vaꞌa ni ya toꞌo ra ndiꞌi saa kivi ya vaxi. Saa ná koo.

⁶ Ta yeꞌe, ta köo ndi̱kaꞌan i xiꞌin ndo ya köo ndi̱sixinu Ndioxi ya ndi̱kaꞌan ra xiꞌin na ñuu ra na Israel. Saa chi süvi ndiꞌi na seꞌe ñani sikua ra Israel ku na kúu ndinuꞌu seꞌe Ndioxi.

⁷ Ta ni süvi ndiꞌi tuku na kúu seꞌe ñani sikua ra Abraham, ku na kúu ndinuꞌu seꞌe ra, chi Ndioxi ndi̱kaꞌan ra xiꞌin ra Abraham, káchi ra saa: “Ndisaa seꞌe ñani sikua ra Isaac ku seꞌe ñani sikua un na ndixa ndinuꞌu”, káchi Ndioxi xiꞌin ra.

⁸ Tuꞌun yóꞌó kúni kachi ya, süvi ndiꞌi na kúu seꞌe ñani sikua ndinuꞌu mií ra Abraham ku na ku seꞌe Ndioxi. Ta ndiꞌi na ndi̱kuiso ya ndi̱kaꞌan Ndioxi taxi ra ndaꞌa ra Abraham, na ikán ku na ndixa kúu seꞌe Ndioxi.

⁹ Saa chi xinaꞌa ndi̱kaꞌan Ndioxi xiꞌin ra Abraham, káchi ra saa: “Ná xinu iin kuiya saa ndiko koo i, ta xa íyo iin seꞌe yá síꞌi un yá Sara, taa loꞌo koo ra”, káchi Ndioxi xiꞌin ra.

¹⁰ Ta süvi ndisaa ya yóꞌó ku ndiꞌi ya, saa chi saa ndo̱ꞌo tu yá Rebeca va xiꞌin seꞌe yá: vani uvi ku nda vali seꞌe yá ka̱ku, sundi iindaa va ku iva uvi saa nda, ra Isaac xii yo ku iva nda.

¹¹ Tá ñúꞌu ka seꞌe yá, ta kúu na kuátí, tá täꞌan ka kaku na, ta täꞌan ikan na ya vaꞌa ni ya väꞌa, ta ndi̱kaxin Ndioxi unku iin nda kuátí ikán kundikun ñaꞌa. Ta xaꞌa ya i̱kan Ndioxi saa, si̱naꞌa ra yoo süvi xaꞌa ya vaꞌa íkan naꞌa ku ya ndíkaxin Ndioxi na, xaꞌa ya chi̱tuni mií ra kua íkan ra saa.

¹² Tá täꞌan ka kaku seꞌe yá Rebeca saa ndi̱kaꞌan Ndioxi xiꞌin yá, káchi ra saa: “Seꞌe un ra loꞌo ku ra kaꞌnda chiñu nuu seꞌe un ra chee”, káchi Ndioxi xiꞌin yá.

¹³ Saa íyo inka tuꞌun Ndioxi ta iin káchi káꞌan ya xaꞌa ya ndi̱kaꞌan Ndioxi, káchi ra saa: “Kúꞌvi ni ka ini i xíni i ra Jacob, ta ku̱ndasi nuu i ra Esaú”, káchi Ndioxi xaꞌa uvi saa nda vali ikán.

¹⁴ ¿Unkua ndíkani ini yo xaꞌa ya íkan Ndioxi saa? ¿Án ra väꞌa ku ra ya íkan ra saa, túvi ndo? ¡Süvi saa íyo ya!

¹⁵ Chi xinaꞌa ndi̱kaꞌan Ndioxi xiꞌin ra Moisés, káchi ra saa: “Xaa kaꞌnu ini i xaꞌa naꞌa, na kúni mií i xaa kaꞌnu ini i xaꞌa, ta kundaꞌvi ini i kuni i naꞌa na, na kúni mií i kundaꞌvi ini i kuni i”, káchi Ndioxi xiꞌin ra.

¹⁶ Yakan kua ná kundaa ini yo, chi süvi xaꞌa ya chíkaa ini mií naꞌa ikan na kua kúꞌvi ini ra xíni ra na, ni süvi xaꞌa ya ndíkundee ni na íkan na ndá ka ñaꞌa kua. Xaꞌa ya kúni mií Ndioxi kua íkan ra saa xiꞌin na.

¹⁷ Ta xa kúndaa ini yo, chi saa káꞌan tuꞌun Ndioxi ya ndi̱kaꞌan ra xiꞌin ra rey Faraón ñuu Egipto, káchi ra saa: “Yeꞌe ta̱xi ichí ndaꞌa un kúu un rey, chi kuaꞌa ni ñaꞌa ikan i xiꞌin un nuu sinaꞌa i ndee i nuu un, ta saa kundaa ini ndiꞌi kúu na ñuu ivi, xaꞌa ndee ya vaꞌa ni íkan i ta kuita niꞌnu tuꞌun xaꞌa i ndiꞌi ni kúu ñuu ivi”, káchi Ndioxi xiꞌin ra.

¹⁸ Ta xiꞌin ya yóꞌó kua kúndaa ini yo, Ndioxi ta kúndaꞌvi ini ra xíni ra na kúni mií ra, ta saa ndása tuun ra ini na kúni mií ra ndasa tuun ra ini.

¹⁹ Án sava tu ndo ndíkani ini, ta ndákan tuꞌun ndo yeꞌe, káchi ndo saa: “Tá tu saa íyo ya, ta ¿ndachu chíkaa Ndioxi kuachi yo xaꞌa ya väꞌa íkan yo, tá tu mií va ra ku ra ndása tuun ini naꞌa? Ta unku na ¿kuchiñu kundee nuu ya chi̱tuni Ndioxi?”, káchi ndo xiꞌin i.

²⁰ Ta yeꞌe ndíkuiin i, káꞌan i xiꞌin ndo: ¿Unku ndóꞌo̱ kua? ¿Án ndíkani ini ndo naꞌnu ka ndóꞌo̱ nuu Ndioxi, ya taxi ra kundaa vaꞌa ini ndo xaꞌa ñaꞌa ya chi̱tuni mií ra ikan ra xiꞌin naꞌa? Köo kúu mií yo ichí kaꞌan yo xiꞌin Ndioxi, chi nda tá íyo kisi ñuꞌú saa íin ndiꞌi yo nuu ra. Iin kisi ta köo kúu mií ya ichí kaꞌan ya xiꞌin ra síkuaꞌa ya, kachi ya saa: “Väꞌa ndi íkan un, köo kútoo i ndá kuꞌva si̱kuaꞌa un yeꞌe”, kachi ya xiꞌin ra.

²¹ Xíni mií yo, iin ra síkuaꞌa kisi ñuꞌú ta síkuaꞌa ra ya tá kuꞌva kúni mií ra. Kúu mií ra ichí sikuaꞌa ra kisi ya vaꞌa ní náꞌa án ya núu ni íin.

²² Saa i̱kan Ndioxi xiꞌin naꞌa, na chi̱tuni ra ndiꞌi xaꞌa: ndixaꞌa ndee ndiꞌi ini ra xaꞌa ya väꞌa i̱kan na nuu ra, nda kivi ti̱ndaa tiempo ya nda̱a ni ya si̱saa na ra, ta si̱ndiꞌi xaꞌa ra na xiꞌin ndee kúu mií ra, saa ku̱ndaa ini ndiꞌi ni kúu na ñuu ivi xaꞌa ya i̱kan ra.

²³ I̱kan Ndioxi saa chi ku̱ni ra si̱naꞌa ra yoo ya ndee ni ndee kúu mií ra, ta kúndaꞌvi ni ini ra xíni ra yoo ndi̱kaxin ra niꞌi yo ya vaꞌa, ya luvi ni taxi ra ndaꞌa yo.

²⁴ Ta saa ka̱na tu Ndioxi yoo ndu̱u yo na ñuu ra, ta süvi ndisaa yo judío ku yo, ka̱na tu ra naꞌa na köo ku judío va.

²⁵ Tá kuꞌva káꞌan tuꞌun Ndioxi ya ta̱a ra profeta ra ndi̱kaꞌan tuꞌun yuꞌu Ndioxi, ra Oseas xinaꞌa, káchi ya saa: Vaxi kivi ta kana i naꞌa, na köo kúu ñuu i, saa kaꞌan i xiꞌin na, kachi i saa: “Ndóꞌo̱, ta ndo ñuu i ndu̱u ndo. Ta naꞌa na köo ndíkuꞌvi ini i kuni i, ta vitin kuꞌvi ni ini i kuni i na”.

²⁶ Saa ñuu nuu ndi̱kaꞌan i xiꞌin naꞌa: “Süvi na ñuu i ku ndóꞌo̱”, káchi i, ta vaxi kivi kaꞌan naꞌa xiꞌin ndo, ndóꞌo̱ ku seꞌe Ndioxi ra táku, kachi na, káchi ya ta̱a ra Oseas.

²⁷ Ta saa íyo tu ya ta̱a ra profeta Isaías, ra ndi̱kaꞌan ndoso tuꞌun Ndioxi, ndi̱kaꞌan ra xaꞌa na Israel, káchi ra saa: “Yáꞌa ni vi kuaꞌa ku na ñuu Israel, nda tá kuaꞌa yoti yuꞌu nduta ñûꞌu saa kuaꞌa ku na, Sundi süvi ndiꞌi na ikán kaku, loꞌo va na kaku.

²⁸ Saa chi kama ni tindaa kivi ya sindoꞌo ni Ndioxi na ñuu ivi xaꞌa kuachi na, ta xiꞌin ya ndaa ikan ra saa xiꞌin na”.

²⁹ Ta xa yachi ndi̱kaꞌan ra Isaías xaꞌa ya yóꞌó, káchi ra soꞌva: Tá tu köo ndi̱sikaku Tata yo Ndioxi ra Chee ni sava na taꞌan yo, ta nda ni mií yo ta köo yo táku ka vitin. Xa ndi̱xiꞌi ndiꞌi yo, ta xa ndo̱ꞌo yo tá ndo̱ꞌo na ñuu Sodoma, xiꞌin na ñuu Gomorra, ndikuu, káchi ya ta̱a ra Isaías.

Köo kándixa na Israel Jesucristo

³⁰ Ta vaꞌa ná koto yo ndá kuꞌva íyo ya káꞌan yo xaꞌa, chi naꞌa, na köo kúu judío ta ni köo ndíchikaa na ndee ya nduku na Ndioxi, ta xa nda̱sa vaꞌa ra na, ndu̱u na naꞌa na köo ka kuachi kúu mií nuu ra, xaꞌa ya ka̱ndixa na Jesucristo.

³¹ Sundi mií na Israel, vani chi̱kaa ni ini na xaa súvi na ley Ndioxi xaꞌa ya kúni na ndikuiso vaꞌa ra na, nduu na naꞌa na köo ka kuachi ku mií nuu ra, ta köo ndi̱kuchiñu na.

³² ¿Ta ndá xaꞌa kua ndo̱ꞌo na saa, túvi ndo? Saa ndo̱ꞌo na xaꞌa ya köo ndi̱xiin na kandixa na Jesucristo. Ndisaa xaꞌa ya xáa súvi na ley Ndioxi ku ya nduu na, na vaꞌa, na köo ka kuachi kuu mií nuu Ndioxi, káꞌán na. Ta köo ndi̱xiin na kandixa na Jesucristo. Chi tá íin “yu̱ú ya kákiꞌi xaꞌa na”, saa káa Jesucristo nuu na Israel.

³³ Tuꞌun Ndioxi ya ta̱a na xinaꞌa, káchi ya saa: Koto ndo chi tiꞌvi i iin taa xaa ra ñuu Jerusalén. Tá íyo yu̱ú ya kákiꞌi xaꞌa naꞌa, saa koo ra. Ta na kóyo nuu yu̱ú ikán, ta ndee ni tixuꞌvi na. Sundi naꞌa na kándixa ra ta ndïko koo ini na xaꞌa ya kándixa na ra, káchi Ndioxi xaꞌa ra.