ROMANOS 8 - Xochapa Mixteco

Vaꞌa ni kée naꞌa na ndíkun ichí Jesucristo

¹ Vitin ná kundaa ini yo xaꞌa ya iin ndu̱u yo xiꞌin Jesucristo, ta köo ndíso ka yo kuachi ya tixuꞌvi yo nuu Ndioxi. Ni köo kúu ka yo naꞌa, na íkan ndisaa ya kúni mií ikin kuñu yo, ta ndixa ndíkun yo ichí nuu xáa súvi yo ya vaꞌa kúni Tachi I̱í Ndioxi.

² Chi xaꞌa ya xa ndu̱u yo iin xiꞌin Cristo Jesús, yakan kúu mií yo ndee Tachi I̱í Ndioxi, ya táxi kutaku yo xiꞌin ra, saa sa̱ña ra yoo ndaꞌa ley ya síndikaꞌan ni ini yo kiꞌvi yo kuachi nuu Ndioxi ta kuvi yo.

³ Ndioxi i̱kan ra ya vaꞌa xiꞌin yo, ñaꞌa ya köo ndi̱kuchiñu ley ya ta̱a ra Moisés ikan ya xiꞌin yo xaꞌa ya köo ndee kúu mií ikin kuñu yo nuu ya väꞌa. Xaꞌa ya ikán kua ti̱ꞌvi ra Seꞌe ra ki̱xi ra ñuu ivi yóꞌó, ta ndi̱xiyo ikin kuñu ra tá kuꞌva íin mií yo ivi yóꞌó. Ti̱ꞌvi Ndioxi ra ki̱xi ra ndi̱soko ra mií ra xaꞌa kuachi yo, ta saa ku̱chiñu ra si̱ndiꞌi xaꞌa ra ndee ya kúu mií kuachi yo nuu Ndioxi.

⁴ Ndiꞌi ya yóꞌó i̱kan Ndioxi xaꞌa yo ya kuchiñu nduu yo naꞌa, na vaꞌa nuu ra, tá kuꞌva káꞌan ley ra. Ta vitin ndu̱u yo naꞌa, na köo íkan ka ndisaa ya kúni mií ikin kuñu yo, chi ndixa ndíkun yo ichí nuu xáa súvi yo ya vaꞌa, ya kúni Tachi I̱í Ndioxi.

⁵ Naꞌa, na ndíkun ichí kúni mií na, ta ndíꞌi ni ini na xaꞌa ya kúni mií ikin kuñu na. Ta naꞌa na ndíkun ichí Tachi I̱í Ndioxi, ta xaꞌa ya kúni mií Tachi I̱í Ndioxi kua ndee ni ndíꞌi ini na xáa súvi na.

⁶ Ta saa naꞌa na íkan ndisaa ya kúni mií ikin kuñu na, ta tíꞌvi na mií na ku̱aꞌan na ichí nuu ndiꞌi xaꞌa na kuvi na nuu Ndioxi. Sundi naꞌa, na xáa súvi ya kúni mií Tachi I̱í Ndioxi ta kutaku na xiꞌin Ndioxi, saa koo vaꞌa ni ini na.

⁷ Naꞌa na ndíkani ini xaꞌa ya väꞌa ya kútoo ni mií ikin kuñu na ikan ya, na ikán, ta na káni taꞌan xiꞌin Ndioxi ku na. Chi köo xíin na xaa súvi na ley ra, ta ni köo kúu mií na ndee xaa súvi na ya.

⁸ Saa chi ndiꞌi na ndíkun ichí ya kúni mií na, ta nda loꞌo küchiñu na xaa súvi na ya koo vaꞌa ini Ndioxi xiꞌin na.

⁹ Ta ndóꞌo̱, köo ndíkun ndo ichí ya kúni mií ndo. Chi tá kuꞌva kúni mií Tachi I̱í Ndioxi saa íkan ndo, saa chi íyo Tachi I̱í ra xiꞌin ndo. Ta naꞌa na köo kúu mií Tachi Jesucristo, ta süvi seꞌe ra ku na.

¹⁰ Sundi tá íyo Cristo xiꞌin ndo, ta taxi Tachi I̱í Ndioxi kutaku ndo, chi ndúu ndo naꞌa, na köo ka kuachi kúu mií nuu ra. Saa íkan ra xiꞌin ndo, va ni ya xa ndi̱xiꞌi ku ikin kuñu ndo xaꞌa kuachi.

¹¹ Ndioxi ku ra si̱taku Jesús tá ndi̱xiꞌi ra. Ta suvi ni mií ra si̱taku Cristo Jesús ku ra taxi kutaku ndo. Saa taxi ra kutaku ikin kuñu ndo ya ndíꞌi xaꞌa. Tixin mií Tachi ra ya íyo xiꞌin ndo kua sitaku ra ndoꞌo̱.

¹² Saa ñani yo xiꞌin kuꞌva yo, tá íyo yo xa níka saa íyo yo nuu Ndioxi xaꞌa ya i̱kan Jesús xaꞌa yo. Yakan köo xíniñuꞌu ka yo ikan yo ya kúni mií ikin kuñu yo.

¹³ Saa chi tá íkan yo ya kúni kuñu yo, ta saa kua ku̱aꞌan yo ichí nuu ndíꞌi xaꞌa yo, kuvi yo. Ta saa ni, tá xiꞌin ndee Tachi Ndioxi síndiꞌi xaꞌa yo ya väꞌa, ya kúni ikin kuñu yo, ta saa kua ndixa kutaku yo nuu Ndioxi.

¹⁴ Saa chi ndiꞌi naꞌa, na táxi xáꞌnda chiñu Tachi I̱í Ndioxi nuu na, na ñaa ku na kúu seꞌe Ndioxi.

¹⁵ Saa chi tachi ya ndi̱kiꞌin yo ta süvi ya sindoꞌo naꞌa kua, köo xáꞌnda chiñu ya nuu yo xiꞌin ya uꞌvi, yakan köo xíniñuꞌu yo ku iꞌvi yo sitixuꞌvi Ndioxi yoo. Chi Tachi Ndioxi, ya táku ini yo vitin, ndása ya yoo seꞌe Ndioxi. Ta táxi ya kaꞌan yo xiꞌin ra, kachi yo saa: “Iva mani mií i”, kachi yo xiꞌin ra.

¹⁶ Suvi mií Tachi I̱í Ndioxi ndítuꞌun teꞌe ya xiꞌin tachi yo, ya kúu yo seꞌe Ndioxi.

¹⁷ Ta xaꞌa ya kúu yo seꞌe Ndioxi, yakan niꞌi yo ñaꞌa ya taxi ra ndaꞌa yo, tá kuꞌva íkan iin taa, ndítaꞌvi ra ñaꞌa ra xiꞌin seꞌe ra. Saa chi̱tuni Iva yo Ndioxi ikan ra xiꞌin ndiꞌi yo kúu seꞌe ra. Ta ndiꞌi ya vaꞌa ta̱xi ra ndaꞌa seꞌe ra Jesucristo, iin káchi saa niꞌi yo ya xiꞌin ra nuu ndivi nu̱nù. Tá tu xáꞌa ndee ini yo ndoꞌo yo xaꞌa ra, ta saa niꞌi tu yoo va ya vaꞌa xiꞌin ra nuu ndivi.

Vaꞌa ni kee naꞌa na ndíkun Ndioxi kivi vaxi

¹⁸ Ya ndaa ni káꞌan i xiꞌin ndo, ndiꞌi ya ndóꞌo yo ñuu ivi yóꞌó tíxuꞌvi ni yo vitin, ta ni süvi ya ndee ku ya nuu ya taxi Ndioxi ndaꞌa yo. Ndee ni ka koo ya niꞌi yo nuu ra kivi vaxi.

¹⁹ Ta vitin ndiꞌi ñaꞌa si̱kuaꞌa Ndioxi ndátun ni ya, ta kúni ya ná tindaa kíi kivi ya sinaꞌa Ndioxi ya kúu yo seꞌe ra.

²⁰ Ndiꞌi ya si̱kuaꞌa Ndioxi ta küchiñu ya tindaa ya koo ya nda tá kuꞌva chi̱tuni Ndioxi núnuu. Chi ndiꞌi ni kúu ñaꞌa si̱kuaꞌa ra ta ndi̱kuiso ndiꞌi ya chiꞌña, xaꞌa ya saa chi̱tuni mií ra. Ta vitin ndátun va ya,

²¹ saña Ndioxi ya nuu chiꞌña ndíso ya. Ta saa nda mií yo kúu seꞌe Ndioxi kindoo ndíka yo nuu ya väꞌa, chi Ndioxi ikan ra ya vaꞌa chee ni xiꞌin yo, ta vaxi kivi kindoo ndíka ndiꞌi ya si̱kuaꞌa Ndioxi nuu ya si̱tivi ñaꞌa.

²² Ta xa xíni ndiꞌi yo, ndiꞌi ya si̱kuaꞌa Ndioxi ta ndáꞌi ni ya nda kivi vitin. Táná ni ya, chi ndóꞌo ni ini ya, tá kuꞌva ndóꞌo ñaꞌa yá kaku seꞌe, saa ndóꞌo ya.

²³ Ta süvi ndisaa ñaꞌa si̱kuaꞌa Ndioxi tíxuꞌvi, nda mií yo kándixa Jesucristo tíxuꞌvi ni. Saa chi tá táku ka yo ñuu ivi yóꞌó, ta xa ta̱xi Ndioxi Tachi I̱í ra ndaꞌa yo. Xiꞌin ya yóꞌó káꞌan ra xiꞌin yo niꞌi ka yo ñaꞌa ya ndi̱kaꞌan ra taxi ra ndaꞌa yo. Ta vitin ndátun yo tin xáku yaa mií yo, saa ndátun ni yo ya ndikuiso mani ra yoo nduu yo seꞌe ra ta saa ndasa xa̱á ra ikin kuñu yo.

²⁴ Tá si̱kaku Ndioxi yoo, saa xa̱á yo ndátun yo xaa súvi ra ndiꞌi ya vaꞌa ndi̱kaꞌan ra xiꞌin yo. Ta saa ni kúni Ndioxi ná kundatun yo, ndakua sixinu ndiꞌi ra ya ndi̱kaꞌan ra. Chi tá xa si̱xinu ra ya ndi̱kaꞌan ra xiꞌin yo, ta köo xíniñuꞌu ka yo kundatun yo xaa súvi tuku ra ya, ndikuu.

²⁵ Ta yoo, ta ndátun yo ndikiꞌin yo ya ndi̱kaꞌan Ndioxi taxi ra ndaꞌa yo, vani täꞌan kuni xiꞌin nuu yo ya, ta saa ni xáꞌa ndee ni ini yo ndátun yo.

²⁶ Iin kuꞌva saa chíndee taꞌan Tachi I̱í Ndioxi xiꞌin yo, chi vita ni ini yo, ta ni köo xíni yo ndá kuꞌva kaꞌan yo xiꞌin Ndioxi. Ta mií Tachi I̱í ra xáku ndaꞌvi ya xaꞌa yo, nda tána ya xaꞌa yo, nda iin naꞌa ta köo na káꞌan tá kuꞌva vaꞌa ni káꞌan Tachi I̱í Ndioxi xiꞌin mií ra.

²⁷ Ta mií Ndioxi ku ra xíni vaꞌa nima ndiꞌi yo, ta xíni ra ndá kuꞌva ndíkani ini yo, xíni ra unkua ndúku Tachi I̱í ra xaꞌa yo. Saa chi mií Tachi I̱í ra ndúku ya vaꞌa xaꞌa yo kúu ñuu Ndioxi, yo i̱í, ta nda tá kuꞌva kúni mií Ndioxi, saa ndúku ya xaꞌa yo.

Ndiꞌi saa ichí kúꞌvi ni ini Ndioxi xíni ra yoo, ni ndee ni ndee káa tindoꞌo ndóꞌo yo, ta íyo ra xiꞌin yo

²⁸ Xíni mií yo, ndiꞌi tindoꞌo ya ndóꞌo yo, ta ya vaꞌa ni mií yo kua ndóꞌo yo saa. Saa chi saa íkan Ndioxi xiꞌin ndiꞌi naꞌa, na kúꞌvi ni ini ra xíni ra, ta kána ra na ndikundikun na ra, chi saa chi̱tuni mií ra ikan ra xiꞌin na.

²⁹ Ta tá täꞌan ka kuaꞌa ñuu ivi yóꞌó, ta xa xíni mií ra unku na ndi̱kaxin ra ya kundikun na ra. Xa saa chi̱tuni mií ra ya nduu na seꞌe ra tá kuꞌva káa Jesucristo Seꞌe ra. I̱kan ra saa ya ná nduu Jesucristo, ra núnu̱ú nuu ndiꞌi ñani ra xiꞌin kuꞌva ra.

³⁰ Ta naꞌa yóꞌó ku na ndi̱kaxin Ndioxi yachi ka, saa ka̱na ra na ndu̱u na seꞌe ra, ka̱na ra na ndu̱u na tá íin naꞌa, na köo ka kuachi kúu mií nuu ra, ta ta̱xi ra koo na xiꞌin ra nuu íyo ndiꞌi ya luvi ni yéꞌe̱.

³¹ Xaꞌa ya vaꞌa ni íkan Ndioxi xiꞌin yo, íyo ra xiꞌin yo ta nda iin naꞌa küchiñu xaa nduvaꞌa xiꞌin yo.

³² Chi Ndioxi ta yáꞌa ni vaꞌa ini ra, nda ta̱xi ra Seꞌe ra, ra iindaa mituꞌun nuu ra, ta ndi̱xiꞌi ra xaꞌa kuachi ndiꞌi yo. Ta köo ndíkuxiꞌnda ñaꞌa ra, ta maa täxi vi ra ñaꞌa ya xíniñuꞌu yo ndaꞌa yo.

³³ ¿Án ndá naꞌa kuchiñu taxi kuachi xaꞌa yoo ndi̱kaxin Ndioxi? Ya ndaa kua nda iin naꞌa küchiñu ikan saa xiꞌin yo, chi mií Ndioxi ku ra xa nda̱sa vaꞌa yo, ndu̱u yo tá íin naꞌa, na köo ka kuachi kúu mií nuu ra.

³⁴ Ta ¿án ndá naꞌa káꞌan xaꞌa yo kuvi yo xaꞌa kuachi yo? Nda iin naꞌa küchiñu ikan saa xiꞌin yo, chi Jesucristo ku ra xa ndi̱xiꞌi xaꞌa kuachi yo, ta ndi̱taku ra, ta vitin íyo ra ñaꞌñu kuáꞌá Ndioxi, ta íyo ra xáku ndaꞌvi ra xaꞌa yo.

³⁵ Ta ¿án ndá ñaꞌa kuchiñu xaa xíka yo nuu ya ndee ni ndee kúꞌvi ini Jesucristo xíni ra yoo? ¡Nda iin ñaꞌa küchiñu ikan saa xiꞌin yo! Ni tindoꞌo ya ndóꞌo ni yo, ni ya kuaꞌa ni tindoꞌo ya ndíꞌi ni ini yo, ni ya sítixuꞌvi na yoo xaꞌa ya kándixa yo Jesucristo, ni tamá ya kaꞌni soko yoo, ni tá köo toto kundixi yo, ni ya ìyo ni kuvi yo, ni ya kaꞌni na yoo, nda iin ya yóꞌó küchiñu xaa xika yoo nuu ya ndee ni kúꞌvi ini Jesucristo xíni ra yoo.

³⁶ Nda tuꞌun Ndioxi ya ta̱a na xinaꞌa, káchi ya saa: Xaꞌa ya kándixa nde yóꞌo̱, Iva yo Ndioxi, ta kúni na kaꞌni na ndeꞌe ndiꞌi saa kivi. Íkan na saa xiꞌin nde tá kuꞌva íkan na xiꞌin iin kiti levo loꞌo, tá ku̱aꞌan ri nuu kuvi ri, káchi tuꞌun Ndioxi.

³⁷ Vani uꞌvi ni tíxuꞌvi yo, ta saa ni kúchiñu yo xáa taa yo nuu tindoꞌo. Chi Jesucristo ku ra kúꞌvi ni ini xíni yoo, ta táxi ra ndee ra ndaꞌa yo ya kuchiñu yo yaꞌa yo nuu tindoꞌo, ya uꞌvi ni vaxi nuu yo.

³⁸ Xíni teꞌe i, ya ndixa kua köo nda iin naꞌa, ni köo nda iin ndee ya kuchiñu xaa xíka yo nuu ya kúꞌvi ni ini Ndioxi xíni ra yoo. Ni ndee ya xáꞌni yoo, ni ya táku yo, ni ndee ya kúu mií na tatun Ndioxi, ni ndee kiti nǎꞌa, nda iin ndee yóꞌó küchiñu ya xaa xíka ya yoo nuu ya kúꞌvi ni ini Ndioxi xíni ra yoo, ni ya uꞌvi ni íyo nuu yo vitin, ni ya uꞌvi ni vaxi nuu yo,

³⁹ ni ndee ya íyo sukun ni, ni ndee ya íyo nuu kúnu ni, ni nda iin ñaꞌa ya ndi̱kuaꞌa, küchiñu ya xaa xika ya yoo nuu ya kúꞌvi ni ini Ndioxi xíni ra yoo, xaꞌa ya i̱kan Tata yo Jesucristo xiꞌin yo.