ROMANOS 7 - Xochapa Mixteco

Na taꞌan yo xíni mií ndo ya köo íyo ka ndo tixin ley ya ta̱a ra Moisés xinaꞌa

¹ Ñani yo tin kuꞌva yo, káꞌan i xiꞌin ndiꞌi ndóꞌo̱ xíni ley ya ta̱a ra Moisés. Ta xa xíni mií ndo, ley ikán kúu mií ya ichí xáꞌnda chiñu ya nuu naꞌa ndisaa tá táku na.

² Ná ndituꞌun loꞌo i xiꞌin ndo kundaa ini ndo xaꞌa ley ya káꞌan tá íyo yá síꞌi iin taa, ta yá ikán ku yá síꞌi ra ndiꞌi saa kivi ya táku ra. Nda tá ndi̱xiꞌi ra saa kindoo ndika yá nuu ley ya káꞌan kúu yá síꞌi ra.

³ Tá tu síndoo yá ií yá ta tíndaꞌa yá xiꞌin inka taa tá táku ií yá, ta kuakiꞌvi yá nuu kuachi, saa chi yáꞌa yá nuu ley ya ta̱a ra Moisés, ya káꞌan küvi koo yá xiꞌin inka taa tá táku ií yá. Tá xa ndi̱xiꞌi ií yá ta saa ndóo ndíka yá nuu ley ikán, ta nda saa kuchiñu tindaꞌa yá xiꞌin inka taa, ta köo kíꞌvi yá kuachi saa.

⁴ Ta ná kundaa ini yo xaꞌa ya yóꞌó unkua kúni kachi ya ñani yo: Vitin ki̱ndoo ndika ndo nuu ley ya si̱naꞌa ra Moisés xinaꞌa. Xaꞌa ya iin ndu̱u ikin kuñu ndo xiꞌin ikin kuñu Jesucristo, ta iin káchi ndi̱xiꞌi ndo xiꞌin ra. Ta vitin tá íin ndo ndi̱xiꞌi saa ndu̱u ndo nuu ley ikán. Xaꞌa ya ikán kua ki̱ndoo ndíka ndo ya kuchiñu taxi ndo mií ndo ndaꞌa Jesucristo, ra ndi̱xiꞌi ta ndi̱taku ra. Yakan vaꞌa ikan ndo kuaꞌa ni ya vaꞌa nuu Ndioxi.

⁵ Chi tá täꞌan kandixa yo Jesucristo ta ndi̱xika yo ichí väꞌa nuu xa̱ꞌnda chiñu ni ndiꞌi ñaꞌa ya väꞌa nuu yo, tá ndi̱xiyo yo tixin ley ya ta̱a ra Moisés, ta si̱ndikaꞌán ni ka ya ikán ini yo ikan yo kuachi ku̱too ni mií ikin kuñu yo ikan ya. Ta ndiꞌi ñaꞌa i̱kan yo ta süvi ya vaꞌa ku ya, chi ya xa̱ꞌni mií va yo ndi̱xiyo ya.

⁶ Sundi vitin, tá íin naꞌa na xa ndi̱xiꞌi, saa íin yo nuu ley Ndioxi ya xa̱ꞌnda chiñu nuu ichí yata ya xi̱ndikun yo, ta vitin ki̱ndoo ndíka yo nuu ya. Köo ka ichí kúu mií ya kaꞌnda chiñu ya nuu yo. Chi vitin ta ya xáꞌnda chiñu nuu yo ku Tachi I̱í Ndioxi ya íyo ini yo, yakan ndíkun yo ichí xa̱á nuu xáa súvi yo ya kúni Tachi I̱í Ndioxi.

Ley Ndioxi ku ya táxi kundaa ini yo unkua väꞌa

⁷ Ta ¿unkua vaꞌa kaꞌan yo vitin?¿Án kaꞌan yo ya väꞌa ku ley Ndioxi ya ta̱a ra Moisés? ¡Küvi kaꞌan yo saa! Ta ndixa ley ku ya si̱naꞌa mií yo unku ya väꞌa. Saa chi íyo iin ley ya káꞌan soꞌva: “Küvi kutoo ni yo kuni yo ñaꞌa inka naꞌa”, káchi ya. Tá tu köo ley ya káꞌan saa, ndikuu, ta ni yeꞌe ta kündaa ini i ya väꞌa ku ya kútoo ni i ñaꞌa inka naꞌa.

⁸ Sundi ley yóꞌó ku ya si̱ndikaxin ini kuachi ya táku íyo ini i, ñaa xa̱á i kútoo ni i xíni i ndiꞌi ni kúu ñaꞌa ya kúu mií inka naꞌa. Sundi tá köo ley ya káꞌan unkua väꞌa, ta ya vaꞌa táku ini i, kündaa ini ya, ya chindaꞌa ya yeꞌe yaꞌa i nuu ley yóꞌó, ndíkuu.

⁹ Tá täꞌan kundaa ini i ley ya xáꞌnda chiñu Ndioxi, ta köo ndíkundaa ini i ya íyo kuachi i nuu ra, nda kivi tá ku̱ndaa ini i xaꞌa ley ra, nda kivi saa kú ya xa̱á kútoo i ikan i ya väꞌa nuu ra. Ta xaꞌa kuachi i yóꞌó ku ya ndu̱u i tá káa iin ra xa ndi̱xiꞌi saa ndu̱u i nuu Ndioxi, ta kuachi i ta ndu̱ndee va ya nuu i.

¹⁰ Ta saa ku̱ndaa ini i ley Ndioxi ya ndi̱kani ini i chindee yeꞌe kutaku i xiꞌin Ndioxi, ta ya xa̱ꞌni yeꞌe va ku ya, chi káꞌan ya xaꞌa i ya ndee ni íyo kuachi i nuu Ndioxi.

¹¹ Ta ndee kuachi i, ya táku ini i ku ya chíndaꞌa yeꞌe yáꞌa ndoso i nuu ley Ndioxi. Xaꞌa ya yóꞌó kua kúndaa ini i ndee kúu mií kuachi i ku ya si̱ndaꞌvi yeꞌe, chi xíniñuꞌu i kuvi i xaꞌa kuachi i, káchi ley Ndioxi.

¹² Ta ley Ndioxi ya ta̱a ra Moisés ku ya i̱í ni, ta ndiꞌi ya xáꞌnda chiñu ra ku tuꞌun ya ií ni, vaꞌa ni ya, ndaa ni ya.

¹³ Xaꞌa ya káꞌan i ya vaꞌa ni ku ley Ndioxi, ta ¿án xaꞌa ya vaꞌa ni ya, yakan xa̱ꞌni ya yeꞌe? ¡Süvi saa íyo ya! Köo káꞌan i xaꞌa ley ya väꞌa ya, chi mií kuachi íyo ini va i ku ya väꞌa ta ya ikán ku ya ndi̱kiꞌin nuu ya vaꞌa, ñaa si̱tuvi teꞌe ya kuachi i yakan ndi̱xiꞌi i nuu Ndioxi. Tixin ley ku ya ku̱ndaa teꞌe ini i xaꞌa kuachi i ya ndee ni kini káa ya.

¹⁴ Ta xa kúndaa ini yo ley Ndioxi ta mií ra chi̱nduꞌu ya, ya ke̱e ndivi ku ya. Ta yeꞌe ta ra ñuu ivi yóꞌó va ku i, tá káa iin ra núꞌni káa i ndíkaa i ndaꞌa kuachi i chi xáꞌnda chiñu ya nuu i.

¹⁵ Köo xíni i unkua ndóꞌo i: chi köo íkan i ya vaꞌa ya kúni i ikan i, ya kúndasi nuu i ku ya íkan i.

¹⁶ Tá tu íkan i ñaꞌa ya väꞌa, ya köo kútoo i ikan i, ta ya ñaa kúni kachi ya: kúndaa ini i ya ndaa ni ku ley Ndioxi.

¹⁷ Ta ya ndóꞌo i saa ta süvi yeꞌe ku i íkan ya väꞌa, saa chi mií kuachi i ya táku ini i ku ya xáꞌnda chiñu nuu ikin kuñu i ikan i saa.

¹⁸ Xa kúndaa va ini i, chi köo mií ya vaꞌa íyo vi ikin kuñu i, xaꞌa ya kúu i ra ñuu ivi yóꞌó. Saa chi ya vaꞌa ku ya kúni i ikan va i, sundi köo mií ndee ikin kuñu i ya ikan ya vaꞌa.

¹⁹ Ta köo íkan i ya vaꞌa, ya kúni i ikan i. Ya väꞌa, ya köo kúni i ikan i, ku ya íkan ka i.

²⁰ Tá íkan i ya väꞌa ya köo kúni i ikan i, ta süvi yeꞌe ku i íkan saa, kuachi i, ya táku ini i ku ya íkan saa xiꞌin i.

²¹ Ta xa ku̱ndaa ini i ya ndixa kua ndóꞌo i saa: chi tá kúni i ikan i ya vaꞌa, ta ya väꞌa íyo xiꞌin i kua köo táxi ikan i saa.

²² Ndinuꞌu ni va ini i kúsini i xíni i ley Ndioxi.

²³ Sundi yeꞌe ta kúni ni i ikan i ya vaꞌa ndíkani ini i ikan i, ta saa ni ini ikin kuñu i íyo inka ñaꞌa ya káni taꞌan ni xiꞌin ley Ndioxi. Ta ya ikán kua chi̱nduꞌu kuachi i. Saa chi íyo ya ini ikin kuñu i, ta táxi ya ndúu i tá íin naꞌa, na ñúꞌu veꞌe kàà, saa káa i ndíkaa i ndaꞌa kuachi i.

²⁴ ¡Ndaꞌvi ni i! ¿Unku na kuchiñu vi sikaku yeꞌe nuu ndee ya väꞌa, ya síndiꞌi xaꞌa yeꞌe kuvi i?

²⁵ Ta ndixaꞌvi ni Ndioxi xaꞌa chiñu ya xa̱a súvi Tata yo Jesucristo! Chi iindaa ra ikán ku ra kuchiñu sikaku yoo nuu ndee ya väꞌa. Ta vitin ku̱ndaa ini i, ni ndinuꞌu ni va ini i kúni i xaa súvi i ley Ndioxi, sundi xaꞌa ya kúu i ra ivi yóꞌó, yakan vita ni i nuu kuachi, kúchiñu ya xáꞌnda chiñu ya nuu i.